Daniel 12

nyankole

← Chapter 11 Jump to:

1Omu bunaku obwo haryaimuka Mikaeli omukuru rugambwa, oreeberera abantu baawe, habeho obunaku bw'obusaasi obutakabahoga eihanga ryaba kubaho. Obunaku obwo ku burihika, abantu baawe boona abu amaziina gaabo garishangwa gahandiikirwe omu kitabo, baryajunwa.

2Kandi baingi omu bariba bagwejegyereire omu mucuucu gw'ensi, baryasisiimuka; abamwe basisiimukire amagara agatahwaho, abandi basisiimukire okuhemuka n'okugaywa kw'obutwire n'obutwire.

3Abaine obwengye baryayaka nk'omushana gurikujwera ahaiguru omu kaabunga; n'abarikuhindura baingi bakabahitsya aha kuhikiirira, baryayaka nk'enyonyoozi ebiro n'ebiro.

4Kwonka iwe Daniyeli, ebyo bigambo obimirire enda, ekitabo kyabyo okikomese akamanyiso, okuhitsya omu bunaku bw'aha mperu. Baingi baryairuka nibakora oku n'oku, n'okumanya kuryakanya.

5Bwanyima nyowe Daniyeli, ku naagiire kugira nti, naareeba abandi babiri beemereire, omwe aha nkungu ya seeri y'omugyera, n'ondi aha nkungu ya seenu yaagwo.

6Ntyo ngambira omushaija ojwaire kitaani, owaabaire ari ahaiguru y'amaizi g'omugyera nti: Ebyo by'okutangaaza nibiija kumara mwanya ki bitakahwaireho?

7Ogwo mushaija ojwaire kitaani, ari ahaiguru y'amaizi g'omugyera, yaimutsya omukono gwe gwa buryo n'ogwa bumosho naagyorekyeza ahaiguru; ntyo mpurira naarahira Ogwo obaho ebiro byona, ngu biryamara emyaka eshatu n'ekicweka. Kandi ngu, ku bariheza kusheenyagura amaani g'eihanga eririkwera, ebyo byona nibwo birihikiirizibwa.

8Ebyo nkabihurira, kwonka tindabyetegyereize; nikwo, kugira nti: Mukama wangye, ebyo bintu biryazaarukwamu ki?

9Yangira ati: Daniyeli, yegyendere, ahabw'okuba ebyo bigambo n'eby'omubonano, kandi bikomesiibwe akamanyiso, okuhitsya omu bunaku bw'aha mperu.

10Baingi baryayemaraho oburofa, beeyeze, bashemere; kwonka ababi baryagumizamu nibakora ebibi, kandi tihariho n'omwe omuribo oryetegyereza; kureka abaine obwengye nibo baryetegyereza.

11Okwiha aha bunaku obu ekitambo kicwekize, ekituura nikitambwa, kiriihwaho, n'ekirikuzira, ekirikucwekyereza kikateebwaho, haryahinguraho ebiro rukumi na magana abiri na makumi mwenda.

12Oritegyereza akaguma ahamire okuhitsya aha kiro kya rukumi na magana ashatu na makumi ashatu na bitaano, aryaba ahiiriirwe.

13Kwonka iwe, oyegyendere, okuhitsya obu ogwo muheru gurihika, okeemerera omu mwanya ogwakuteekateekyeirwe, muheru y'obunaku yaahika.

← Chapter 11 Jump to: