Daniel 7

nyankole

← Chapter 6 Jump to: Chapter 8 →

1Omu mwaka gw'okubanza ogw'omu busingye bwa Belishazaari omugabe wa Babulooni, Daniyeli akaroota, aine ebi arikworekwa omu biteekateeko, abyami aha kitanda. Ekirooto ki yaarootsire, yaakihandiika, yaashoboorora ebikirimu.

2Daniyeli ogwo akagira ati: Omu kworekwa kwangye nyekiro, nkareeba emiyaga ena y'omu iguru neetabangura enyanja mpango,

3kandi enyamaishwa ina mpango zitarikushushana zaatuuhuuka omuri egyo nyanja.

4Ey'okubanza ekaba neeshusha entare, eine amapapa g'empungu. Ku naabaire nkihangireyo amaisho, amapapa gaayo gaakuuka, yaimuka ahansi, yaayemerera n'ebigyere byayo nk'omuntu, yaaheebwa obwengye bw'abantu.

5Kandi naayecura enyamaishwa ya kabiri erikushusha edubu, etunguukire orubaju rumwe, eine embaju ishatu omu kanwa, ezirumiise amaino; baagigira bati: Imuka, oshonshomere enyama nyingi.

6Ekyo ku kyahwaire, ku naagiire kugira nti, naareeba endiijo nyamaishwa erikushusha engwe, eine amapapa ana g'enyonyi aha mugongo gwayo, yaaheebwa obutegyeki.

7Ekyo nakyo ku kyahwaire, omu kworekwa kwa nyekiro, ku naagiire kugira nti, naareeba enyamaishwa ya kana erikutiinisa, erikwitsa obwoba kandi ey'amaani garengyesereize, eine ebiino by'ekyoma, yaagira ebi yaashonshomera, ekabicwagacwagura, n'ebyatsigaraho ekabiribatiirira. Ekaba etarikushusha n'enyamaishwa ezaagibandiize, kandi eine amahembe ikumi.

8Ku naabaire ninkyetegyereza ago mahembe, ndeeba gaamerwamu erindi ihembe, erikye, eri amahembe ashatu g'okubanza gaakuukire n'emizi, kurihigiza. Kandi omuri eryo ihembe hakaba harimu amaisho garikushusha ag'omuntu, n'akanwa karikugamba ebintu bikuru.

9Ku naabaire nkihangireyo amaisho, ndeeba ebitebe by'obukama byateebwaho, Owa iranaira yaashutama; ebijwaro bye nibyera tiitiiti, n'eishokye ry'aha mutwe gwe niryera nk'ebyoya by'entaama, ekitebe kye ky'obukama kiri endimi z'omuriro, n'enyamuziga zaakyo ziri omuriro gurikwaka.

10Omugyera gw'omuriro gwahimintika niguruga omu maisho ge, enkumi n'enkumi baamuheereza, kandi kakumi emirundi kakumi haabaho okucwa emanja, n'ebitabo byashuuruurwa.

11Naahangayo amaisho, ahabw'eiraka ry'ebigambo bikuru ebi eihembe ryabaire nirigamba. Ku naabaire nkihangireyo amaisho, egyo nyamaishwa yaitwa, omutumbi gwayo gwacwekyerezibwa, gwaheebwayo kwokibwa n'omuriro.

12Ezindi ezaatsigaireho zaayakwa obutegyeki, kwonka amagara gaazo gaayongyerwaho omwanya n'obunaku kugumizamu.

13Omu bi naayorekirwe nyekiro, ku naagiire kugira nti, naareeba orikushusha Omwana w'omuntu, naizira omu bicu by'omu iguru; yaija yaahika Owa iranaira kandi baamumumurikira,

14Yaaheebwa obutegyeki n'ekitiinwa n'obugabe, ngu ab'amahanga goona n'enganda na ibara rurimi bamuheereze; obutegyeki bwe n'obutegyeki oburigumaho ebiro byona, obutarihwaho, n'obugabe bwe tiburicwekyerezibwa.

15Kwonka nyowe Daniyeli, nkeemereza omutima, n'ebi naayorekirwe omu biteekateeko byantiinisa.

16Nairira omwe aha baabaire beemereire aho, naamubuuza kummanyisa eby'amazima ebikwatiraine n'ebyo bintu byona. Nawe angambira nammanyisa amakuru gaabyo, ati:

17Enyamaishwa mpango ina nibo bagabe bana abariimuka omu nsi.

18Kwonka abarikwera ba Rukiraboona nibo bariheebwa obukama, bukaba obwabo okuhitsya ryari na ryari.

19Bwanyima naayenda kumanya eby'amazima ebikwatiraine n'enyamaishwa ya kana, eyaabaire etarikushushana na zindi, erikutiinisa munonga, eine amaino g'ekyoma n'ebyara by'omuringa; eyaabaire neerya neecwanyagura, kandi neeribatiirira ebyatsigaraho;

20kandi n'ebikwatiraine n'amahembe ikumi, agaabaire gagiri aha mutwe, n'erindi ihembe eryamezire, ashatu omurigo gaakuukire: eihembe eryabaire riine amaisho n'akanwa akaagambire ebintu bikuru, kandi eryabaire nirishusha oti nirikira agandi magyenzi gaaryo.

21Ku naabaire nkihangireyo amaisho, eryo ihembe ryarwanisa abarikwera, ryabasingura,

22okuhitsya obu Owa iranaira yaizire, akacwa orubanja, abarikwera ba Rukiraboona bakarusinga, obunaku bukahika, abo barikwera bakaheebwa obukama.

23Mpaho yaagira ati: Eby'enyamaishwa ya kana nibyo ebi: Haryabaho obugabe bwa kana omu nsi, obutarishushana na bugabe bwona, haza bushonshomere ensi yoona, bugiribatiirire, bugicwanyagure.

24Reero eby'amahembe ikumi, omuri obwo bugabe haryaimuka abagabe ikumi, kandi bwanyima haimukye ondiijo mugabe otarikushushana n'abaamubandiize, abundikye bariya abashatu.

25Aryagamba eby'okugomera Rukiraboona, anyangaraze abarikwera be, ateekateekye aha by'okuhindura obunaku n'eiteeka, abarikwera abo baheebweyo omu mikono ye okumara nk'emyaka eshatu n'ekicweka.

26Kwonka haryabaho okucwa orubanja, obutegyeki bwe bumwakwe, bumarweho, kandi bucwekyererezibwe kimwe.

27Obukama n'obutegyeki n'obukuru bw'obugabe bwona oburi ahansi y'eiguru, buryaheebwa eihanga ry'abarikwera ba Rukiraboona; obukama bwabo bube obw'ebiro byona, ab'obushoboorozi boona babaheereze, kandi baboorobere.

28Ebyo aha niho byagarukira. Nyowe Daniyeli, ebiteekateeko byangye bikantiinisa, naahinduriza; kwonka ebyo bintu naabigumya aha mutima.

← Chapter 6 Jump to: Chapter 8 →