Daniel 3

nyankole

← Chapter 2 Jump to: Chapter 4 →

1Omugabe Nebukadenezaari akakora ekishushani ky'ezaabu ky'obwemi bwa mikono makumi mukaaga, n'obukiizi bwa mikono mukaaga. Yaakita omu ruhita rwa Duura omu ishaza rya Babulooni.

2Yaaragiira ab'amashaza, abareeberezi, abategyeki bakuru, abahanuuzi, ababiiki, abahi b'ebiragiro, abaramuzi n'abakungu boona ab'omu mashaza, kuteeranira hamwe kuhaasirira ekishushani ki yaataireho.

3Mpaho ab'amashaza n'abareeberezi n'abategyeki bakuru n'abahanuuzi n'ababiiki n'abahi b'ebiragiro n'abaramuzi n'abakungu boona ab'omu byanga, baateeranira hamwe kuhaasirira ekishushani ki Omugabe Nebukadenezaari ataireho, baayemerera omu maisho gaakyo.

4Omurangirizi yaarangirira n'eiraka rihango ati: Imwe abantu b'amahanga n'ab'enganda n'aba ibara rurimi nimuragiirwa,

5ngu ku muraahurire amaraka g'enzamba, esheegu, endingiri, amakondere, enanga, obunyamurera n'emiringo yoona ey'ebirikujumeeza amaraka, mujuumare ahansi, muramye ekishushani ky'ezaabu eki Omugabe Nebukadenezaari ataireho.

6Kandi weena oraabe atajuumaire ahansi akakiramya, naija kunagwa ahonaaho omu kikoomi ky'omuriro ogurikubuguma.

7Ahonaaho abantu boona ku baahuriire amaraka g'enzamba n'esheegu n'endingiri n'amakondere n'enanga n'obunyamurera na byona ebirikujumeeza amaraka, ab'amahanga goona n'enganda n'endimi baajumara ahansi, baaramya ekishushani ky'ezaabu eki Omugabe Nebukadenezaari yaataireho.

8Omuri ago magingo Abakaludaaya abamwe bakaija baarega Abayudaaya.

9Baagira Omugabe Nebukadenezaari bati: Nyakusinga, karamaare!

10Nyakusinga, otaireho ekiragiro ngu omuntu weena oraahurire amaraka g'enzamba, esheegu, endingiri, eikondere, enanga, obunyamurera, na kyona ekirikujumeeza amaraka, ajuumare ahansi aramye ekishushani ky'ezaabu;

11kandi ngu weena oraayangye kujuumara ahansi, akakiramya, anagwe omu kikoomi ky'omuriro gurikubuguma.

12Mbwenu hariho Abayudaaya bamwe, abu waataireho kureeberera eishaza rya Babulooni, nibo aba: Shaduraaki, Meshaki na Abedineego. Nyakusinga, abo bantu tibarikukwetaho, tibarikuheereza baaruhanga baawe, nari okuramya ekishushani ky'ezaabu eki otaireho.

13Nebukadenezaari nikwo kuragiira, n'ekiniga kingi, ku bareeta Shaduraaki, Meshaki na Abedineego. Batyo bareeta abo bashaija omu maisho g'omugabe.

14Nebukadenezaari abagira ati: Imwe Shaduraaki na Meshaki na Abedineego, n'eky'amazima mwangire kuheereza baaruhanga bangye, nari okuramya ekishushani ky'ezaabu eki ntaireho?

15Mbwenu ku muraahurire amaraka g'enzamba, esheegu, endingiri, amakondere, enanga, obunyamurera, na byona ebirikujumeeza amaraka, mwaikiriza kujuumara ahansi kuramya ekishushani ki naakozire, biri obwo ni gye; kwonka ku muraayangye kukiramya, ahonaaho nimwija kunagwa omu kikoomi ky'omuriro gurikubuguma. Mbwenu ni Ruhanga ki oraabaanyihe omu mikono?

16Shaduraaki na Meshaki na Abedineego bagarukamu omugabe bati: Nyakusinga Nebukadenezaari, tikirikutwetengyesa kukugarukamu eki waatugambira.

17Ku kiraabe kwo, Ruhanga waitu ou tuheereza naabaasa kutwiha omuri ekyo kikoomi ky'omuriro ogurikubuguma, kandi atwihe omu mikono yaawe, Nyakusinga Omugabe.

18Kwonka n'obu kiraabe kitabaire kityo, Nyakusinga Omugabe, okimanye ku tutarikwija kuheereza baaruhanga baawe, n'obu kwakuba okuramya ekishushani ky'ezaabu eki otaireho.

19Nebukadenezaari ekiniga kyayenda kumubarura, yaahinduriza ahamaisho ateire Shaduraaki na Meshaki na Abedineego ekitsyori. Yaaragiira ku beenegyeza omuriro omu kikoomi emirundi mushanju okukira oku batakagwenegyezaga.

20Kandi yaaragiira abashaija b'amaani ab'omu ngabo ze kuboha Shaduraaki, Meshaki na Abedineego, bakabanaga omu kikoomi ky'omuriro ogurikubuguma.

21Abo bashaija baababoha bajwaire eminagiro yaabo n'ekanzu n'enkofiira n'ebindi bijwaro, baabanaga omu kikoomi ky'omuriro gurikubuguma.

22Kandi ahabw'ekiragiro ky'omugabe kuba ekihamire, n'ekikoomi kwotsya munonga, endimi z'omuriro zaita abashaija abaanagiremu Shaduraaki na Meshaki na Abedineego.

23Reero aba bashaija bonshatu, Shaduraaki, Meshaki na Abedineego, baagwa gangari omu kikoomi ky'omuriro gurikubuguma babohirwe.

24Bwayima Omugabe Nebukadenezaari akatangaara, yaimuka n'obwira, yaabuuza abahanuuzi be ati: Beitu omu muriro titwanagamu abashaija bashatu? Nabo baamugarukamu bati: N'eky'amazima, Nyakusinga Omugabe!

25Nawe yaabagarukamu ati: Kwonka shi, ka nindeeba abashaija bana batabohirwe, nibagyendagyenda ahagati y'omuriro, kandi batabaireho kabi; haza enshusha y'owa kana ni nk'ey'omwana wa baaruhanga!

26Mpaho Nebukadenezaari airira aha munwa gw'ekikoomi ky'omuriro gurikubuguma, agira ati: Imwe Shaduraaki na Meshaki na Abedineego, abaheereza ba Ruhanga Rukiraboona, nimurugyeyo mwije aha! Batyo Shaduraaki na Meshaki na Abedineego baruga omuri ogwo muriro.

27Ab'amashaza n'abareeberezi n'abategyeki bakuru n'abahanuuzi b'omugabe baateeranira hamwe, baashanga ogwo muriro gutaine ki gwitsize emibiri y'abo bashaija, eishokye ry'aha mitwe yaabo ritababukire, eminagiro yaabo etabaireho kabi, kandi batarikunuuka kibabo ky'omuriro.

28Nebukadenezaari nikwo kugira ati: Ruhanga wa Shaduraaki na Meshaki na Abedineego, asiimwe, Ogwo owaayohereza maraika we, akajuna abaheereza be abaamwesiga, bakahindura busha ekiragiro kyangye omugabe, bakahayo emibiri yaabo okukira okuheereza n'okuramya ruhanga ondi otari Ruhanga waabo.

29N'ahabw'ekyo naataho ekiragiro nti: Ab'amahanga goona n'ab'enganda n'ab'endimi abarirogota ahari Ruhanga wa Shaduraaki na Meshaki na Abedineego, baryataanyaguzibwa, amaka gaabo gahindurwe amatongo; ahabw'okuba tihariho Ruhanga ondi weena orikubaasa kujuna omu muringo nk'ogu.

30Bwanyima ogwo mugabe yaakuza Shaduraaki, Meshaki na Abedineego omu ishaza rya Babulooni.

← Chapter 2 Jump to: Chapter 4 →