Esther 7

nyankole

← Chapter 6 Jump to: Chapter 8 →

1Omugabe na Hamani bakataaha omu nju kurya obugyenyi n'Omwigarire Esiteeri.

2Aha izooba rya kabiri ku baabaire nibanywa viino, omugabe yaagaruka yaabuuza Esiteeri ati: Omwigarire Esiteeri, nooshaba ki? Haza nkikuhe! Kandi nooyenda ki? Nobu kyakuba ekicweka ky'obugabe bwangye, niinyija kukikuha.

3Mpaho Omwigarire Esiteeri agarukamu ati: Nyakusinga, ku ndaabe naagirirwa embabazi omu maisho gaawe; kandi waaba nookisiima, ninshaba amagara gangye, kandi ninshaba n'ag'ab'eihanga ryangye.

4Manya nyowe n'ab'eihanga ryangye tuguzirwe, ngu tucwekyerezibwe, twitwe kandi tumarweho. Kuri tuguzirwe kuba abahuuku n'abazaana kusha, nkaahunamire; ahabw'okuba okubonabonesibwa kwaitu tikwakwingaine n'ebi omugabe yaakufeerwa.

5Omugabe Ahaswero nikwo kubuuza Omwigarire Esiteeri ati: Ogwo orikwehangamura kukora ekyo n'oha? Kandi ari nkahi?

6Esiteeri amugarukamu ati: Omuzigu kandi omubisha! N'ogu mwinazi Hamani! Hamani atetemera aho omu maisho g'omugabe, n'ag'Omwigarire.

7Omugabe aimuka, aruga aha bugyenyi, ekiniga nikyenda kumubarura, aza omu musiri gw'omu kikaari; kwonka Hamani aguma aho, kweshengyereza Omwigarire Esiteeri kukiza amagara ge; ahabw'okuba akareeba ku omugabe amaririire kumukora kubi.

8Bwanyima omugabe ku yaagarukire naaruga omu musiri gw'omu kikaari, yaataaha omu kishengye eki baabaire nibanyweramu viino, yaashanga Hamani ajuumaire aha kitanda eki Esiteeri yaabaire abyamiho; omugabe nikwo kugira ati: Kandi yaataho n'okwenda kuhambira Omwigarire omu maisho gangye, omu nju yangye? Ebyo bigambo ku byarugire biti omu kanwa k'omugabe, baakoma Hamani ahamaisho.

9Reero omwe aha bashaahu barikuheereza omugabe orikwetwa Haruboona, yaagira ati: Manya n'ekiti ky'oburaingwa bwa mikono makumi ataano, eki Hamani abyariire Morodekai, ou ekigambo kye kyakirize omugabe, kitsimbire omwa Hamani.

10Omugabe nawe nikwo kuragiira ati: Mube nikyo mwamuhanikaho. Batyo baahanika Hamani ahari ekyo kiti ki yaabaire abyariire Morodekai. Ekiniga ky'omugabe kyaikaikana.

← Chapter 6 Jump to: Chapter 8 →