Esther 9

nyankole

← Chapter 8 Jump to: Chapter 10 →

1Mbwenu omu kwezi kwa ikumi n'abiri, nikwo kwa Adaari, aha kiro kya ikumi na bishatu eky'okwo kwezi, ekiragiro ky'omugabe n'ekihandiiko kye bikaba biri haihi kuhikiirizibwa. Haza ekyo kiro abazigu b'Abayudaaya bakaba baine amatsiko g'okubasingura, kwonka kyaba okundi, Abayudaaya baaba nibo baasingura abo bazigu.

2Abayudaaya baateeranira omu birorero byabo omu mashaza goona ag'Omugabe Ahaswero, kurwanisa abaabaire nibenda kubakora kubi. Haza tihaabaho n'omwe owaabaasize kubaza omu kaso, ahabw'okuba amahanga goona gakaba nigabatiina.

3Abainginya b'omu byanga boona n'ab'amashaza n'abategyeki abakuru n'abakungu b'omugabe, nabo baaha Abayudaaya emikono, ahabw'okutiina Morodekai.

4Manya Morodekai akaba ari omuntu mukuru omu kikaari ky'omugabe, okurangaanwa kwe kubugire omu mashaza goona, ahabw'okuba Morodekai ogwo akaguma naayeyongyera kugira obushoboorozi.

5Batyo Abayudaaya baitsa abazigu baabo boona rurara, baabaita, baabacwekyereza, n'abaabaire nibabanga baabagira nk'oku barikwenda.

6Omu rurembo rukuru Susa rwonka, Abayudaaya baitamu abantu magana ataano, baabacwekyereza,

7kandi baita Parishanidaata na Dalifoni na Asipaata

8na Porata na Adaliya na Aridaata

9na Paramashita na Arisaayi na Aridaayi na Vayizaata,

10batabani ba Hamani ikumi, mwene Hamedaata omuzigu w'Abayudaaya; kwonka tibaagira ki baataho engaro kukinyaga.

11Eryo izooba abantu baagambira omugabe omubaro gw'abaitiirwe omuri Susa orurembo orukuru.

12Omugabe yaagira Omwigarire Esiteeri ati: Omuri Susa orurembo orukuru, Abayudaaya baita abantu magana ataano, hamwe na batabani ba Hamani ikumi. Mbwenu shi omu gandi mashaza g'omugabe baagira bata? Mbwenu kandi nooshaba ki? Haza nkikuhe. Kandi ekindi nooyenda ki, nkakikukorera?

13Esiteeri amugarukamu ati: Nyakusinga, ku oraabe nookisiima, ikiriza Abayudaaya abari omuri Susa, nyencakare nabwo bakore nk'oku ekihandiiko ky'eri izooba kiri. Kandi oikirize batabani ba Hamani ikumi, emitumbi yaabo ehanikwe aha biti.

14Omugabe nawe aragiira ku kiba nikwo kyaba; ekiragiro kibugibwa omuri Susa, batabani ba Hamani ikumi bahanikwa.

15Abayudaaya b'omuri Susa nabwo beeteerana aha kiro kya ikumi na bina ky'okwezi Adaari, baita abantu magana ashatu omuri Susa; kwonka tibagira ki baakozaho engaro kukinyaga.

16Abandi Bayudaaya abaabaire bari omu byanga by'omugabe nabo baayeteerana kwerwanaho, baayekiza abazigu baabo, baabaitamu abantu obukumi mushanju n'enkumi itaano abaabaire nibabanga; kwonka tibaagira ki baakozaho engaro kukinyaga.

17Ebyo bikabaho aha kiro kya ikumi na bishatu eky'okwezi Adaari; reero aha kya ikumi na bina baahuumura. Ekyo kiro baakigira eky'okuriiraho obugyenyi n'okushemererwa.

18Kwonka Abayudaaya ababaire bari omuri Susa, bakeeteerana aha kiro kya ikumi na bishatu n'aha kya ikumi na bina, haza baahuumura aha kya ikumi na bitaano, baaba nikyo baahindura eky'okuhuumuriraho n'okushemererwa.

19Nikyo Abayudaaya b'omu byaro, abatwire omu birorero ebitazitiriirwe, barindira ekiro kya ikumi na bina eky'okwezi kwa Adaari, kuba eky'okushemerererwaho n'okuriiraho obugyenyi n'okuhuumuriraho, kandi n'okuba ekiro ky'okutwekyeraniraho ebyokurya birungi.

20Ebyo ku byahwaire, Morodekai yaahandiika ebyo byona omu kitabo, kandi Abayudaaya boona abaabaire bari omu byanga by'Omugabe Ahaswero, aba haihi n'aba hare, yaabatwekyera ebaruha

21naabeehanangiriza kuguma nibarinda ekiro kya ikumi na bina eky'okwezi kwa Adaari, kandi n'ekya ikumi na bitaano eky'okwo kwezi, buri mwaka,

22kuba ebiro ebi Abayudaaya baakiriireho abazigu baabo, kandi kuba okwezi okwabahindukiire okw'okushemererwa omu mwanya gw'okuba okw'obusaasi, n'okuba okw'okuruhuuka omu mwanya gw'okucura; ngu babihindure ebiro by'amagyenyi n'okushemererwa, kandi eby'okutwekyeraniraho ebyokurya birungi, n'okuha abooro ebiconco.

23Abayudaaya baayehayo kuguma nibakora nk'oku baatandika, nk'oku Morodekai yaabahandiikiire.

24Manya Hamani Omuagagi mwene Hamedaata, omuzigu w'Abayudaaya boona, akaba abacumiire enaama y'okubacwekyereza, kandi ateerize enteenyu kumanya eizooba ri aribacwekyererezaho.

25Kwonka Esiteeri ku yaizire omu maisho g'omugabe, omugabe yaahandiika naaragiira ku we n'abatabani bahanikwa aha biti:

26Ebyo biro nikyo byayeteirwe Purimu, ekirikumanyisa omu Ruyudaaya enteenyu. Reero ahabw'ebyahandiikirwe omuri egyo baruha, n'ebi baabugabugaine nabyo, na byona ebyabagweraire,

27Abayudaaya bakeeteeraho ekiragiro nibaragaanisa ku bo, na baijukuru baabo n'abaabaire bakwataniise nabo, bataribura kurinda ebyo biro byombi, nk'oku kyahandiikirwe, n'oku obunaku obwatairweho buri mwaka buri.

28Kandi ngu ebyo biro bigume nibiijukwa, nibikorerwaho emikoro obusingye bwona omu buri ka, omu buri ishaza, n'omu buri rurembo, ngu ebyo biro bya Purimu Abayudaaya bataribifiisa busha, n'obu baakuba baijukuru baabo okureka kubiijuka.

29Bwanyima Omwigarire Esiteeri, muhara wa Baihayili, na Morodekai Omuyudaaya, baahandiika n'obushoboorozi bwona, nibahamya egyo baruha ya kabiri aha bya Purimu.

30Ebaruha zaatwekyerwa Abayudaaya boona omu mashaza igana na makumi abiri na mushanju ag'omu bugabe bwa Ahaswero, zirimu ebigambo by'obusingye n'eby'amazima,

31niziragiira ku ebiro bya Purimu biguma nibikorerwaho emigyenzo omu bunaku bwabyo obwatairweho, nk'oku Omuyudaaya Morodekai n'Omwigarire Esiteeri baayehanangiriize Abayudaaya, n'oku Abayudaaya baayeteereireho ekiragiro ahabwabo n'ahabwa baijukuru baabo, ekikwatiraine n'okwesiibyakwo n'okuganya kwabo.

32Ekiragiro ky'Omwigarire Esiteeri kyahamya emigyenzo ya Purimu, kandi kyahandiikwa omu kitabo.

← Chapter 8 Jump to: Chapter 10 →