Habakkuk 1

nyankole

Jump to: Chapter 2 →

1Ebi n'eby'okuragura ebi omurangi Habakuuku yaayorekirwe Ruhanga.

2Ai Nyakubaho, ndyahitsya hi okukutakira ngu ompwere, okanga kumpurira? Nari okukutakira ahabw'okwitwa kubi, otanjune?

3Ahabw'enki nondeebesa ebitahikire, nkareeba enaku? Okucwekyerera n'obubisha bindi omu maisho, entongane n'empaka ziri aha iguru.

4Nikyo eiteeka ririkwegandirwaho, emanja zikareka kucuubwa omu buryo. Manya enyabibi zeehinguririize abahikiriire, nikyo emanja z'oburyo zirikwitirwa.

5Nimunagye amaisho omu mahanga, mureebe, mutangaare, kandi mute engaro aha munwa. Manya omu biro byanyu ninkora omurimo ogu mutarikwikiriza, nobu baakugubagambira.

6Reeba, niinyimutsya Abakaludaaya, eihanga enshaarizi kandi eririkubakuka, abarikuhurura bakabuga ensi yoona kukubuura amaka gatari gaabo.

7Nibatiinisa, kandi nibaitsa obwoba. Nibo barikweshoboororera eby'oburyo, bakeeha n'obukuru.

8Embaraasi zaabo nizikiza engwe amaguru, kandi nizishaarira okukira emishega y'omu mwabazyo. Abazitembire nibazikinisa n'eigundu. Buzimazima abazitembire nibaruga hare, kandi nibaguruka nk'eishamba ririkusyoka kuteera eki riraashonshomere.

9Boona nibareetwa okukora eby'obubisha. Nibatiinisa abantu batakabahikire. Nibarunda enkwatwa nk'omusheenyi.

10Nibateerera abagabe enaku, bagaaniiza abategyeki. Buri kigo nibakishekyeerera, ahabw'okuba nibakirundaho eitaka, bakikwata.

11Bwanyima barabaho nk'omuyaga, bagyenda, abo bantu babi, abu amaani gaabo gari ruhanga waabo.

12Ai Mukama Ruhanga wangye Orikwera, tiiwe oba otahwaho ebiro byona? Titurikwija kufa. Ai Nyakubaho, obataireho kworeka eby'oburyo, kandi iwe Rukiri, waabahamya ku baba nibo baatufubira.

13Iwe ow'amaisho gashemeire, agatenda kureeba kibi; kandi agateemera kureeba ebitahikire, mbwenu ahabw'enki nooreeba abantu endeebya? Kandi omuntu enyabibi akiba naamira kwo orikumukiza okuhikiirira okeetsiza?

14Manya abantu noobatwaza nk'ebyenyanja nari nk'ebirikugyendesa enda, ebitagira mutegyeki.

15Ogwo muntu abatuuhuuzisamu eirobo, abaihisamu akatimba ke, abarundaanira omu ntukuru ye; atyo ashemererwa, kandi ayesiima,

16Nikyo atambirira akatimba ke ebitambo, akooterera entukuru ye obubaani; ahabw'okuba nibyo bimwiniire omugasho.

17Mbwenu naija kuguma naafukunkura entukuru ye, naita amahanga ebiro byona ataine saasi?

Jump to: Chapter 2 →