Habakkuk 2

nyankole

← Chapter 1 Jump to: Chapter 3 →

1Niinyija kwemerera kureeba, ngume aha munaara. Nnagye amaisho, ndeebe eki arangambire, n'eki ndaagarukyemu ahabw'ebi ndikutongyeza.

2Nyakubaho yangarukamu ati: Handiika ebi waayorekwa, obite gye aha bishate by'amabaare, birahukire orikubishoma.

3Manya ebi waayorekwa bikiine obunaku bwabyo. Kwonka n'eby'okubaho juba, kandi tibiribura kubaho. Nobu byakutuuraho, obitegyereze. Buzimazima biryaija, tibirikyerererwa.

4Reeba, abatahikiriire tibarigumaho; kwonka abahikiriire baryagira amagara ahabw'okwikiriza kwabo.

5Ekindi, viino eba bareebyana; omuntu w'amaryo tarigumaho. Omururu gwe ni muhango nk'Okuzimu owa Nyamuteza, ninka rufu etakahaagaga. Ayeteeraniraho amahanga goona. Ayeshangururiza enganda zoona nk'eze.

6Mbwenu abo boona tibarimugaya, bakamugaaniiza nibagira bati: Ebishi ogu muntu orundaana ebitari bye, aryakareeba! Mbwenu aryaherera hi? Ogwo oyerundaho emikwato!

7Abu orikwihuza tibariimuka ekitaraariire, n'abarikutetemesa bakasisiimuka? Haza naiwe okaba omunyago gwabo!

8Manya nk'oku waanyagire amahanga maingi, agandi goona agaatsigaireho naiwe garyakunyaga, gakuture eshagama y'abantu n'eby'obubisha ebi waakoreire ensi n'endembo n'abantu boona abazituuramu.

9Ebishi otungira eka ye amagoba mabi ngu akaatunguura ekyashuri kye kireka kuhikwaho akabi, aryakareeba!

10Enaama ei waagizire kucwekyereza amahanga maingi, ehemwire ab'eka yaawe, waareebya amagara gaawe.

11Manya eibaare ry'omu kisiika riryakuteerera enduuru, omutambiko gw'omu rukanga gurigarukyemu.

12Omuntu oyombekyesa ekirorero eshagama, akatembuuza orurembo ebicumuro, aryakareeba!

13Mbwenu eki tikirikuruga ahari Mukama ow'amahe abantu okuhendekyera omuriro, amahanga gakeeruhiza busha?

14Manya ensi eryabugwa okumanya ekitiinwa kya Nyakubaho, nk'oku amaizi gabuga enyanja.

15Ogwo orikunywaisa bataahi be ekikopo ky'ekiniga kye, akabasinza ngu abone kureeba oku bajwaire busha, aryakareeba!

16Omu mwanya gw'okuheebwa ekitiinwa, oryagaywa. Mbwenu iwe nywa, otaruze! Kwonka ekikopo kya Nyakubaho eky'omu mukono gwe gwa buryo kiryakuhikaho; ekitiinwa kyawe kihindukye enshoni.

17Eby'obubisha ebi waakoreire Lebanooni, biryakuhwerekyereza. Okucwekyereza enyamaishwa kwawe kuryakutiinisa, oturwe eshagama y'abantu, n'eby'obubisha ebi waakoreire ensi, n'endembo n'abantu boona abazitwiremu.

18Mbwenu ekishushani kirikuramibwa nikigasha ki, omukozi waakyo yaaheza kukibumburika? Ekyo kishushani ky'ekyoma ekyegyesa ebishuba! Mbwenu omunyamwoga orikukikora, aba naayesigira ki ekyo kishushani kitarikubaasa nangwa n'okugamba?

19Ogwo orikugira ekiti ati: Sisiimuka; nari orikugira eibaare ritarikugamba ati: Imuka, aryakareeba! Mbwenu ebyo nibibaasa kugira eki byaragura? Reeba, bihumbikirwe ezaabu n'efeeza, kandi tibigira mwitsyo n'akakye.

20Kwonka Nyakubaho ari omuri Nyaruju ye erikwera. K'ab'omu nsi yoona bahuname omu maisho ge.

← Chapter 1 Jump to: Chapter 3 →