Habakkuk 3

nyankole

← Chapter 2 Jump to:

1Okushaba kw'omurangi Habakuuku omu iraka ry'orikucura.

2Ai Nyakubaho, mpuriire ebi barikukugambaho n'ebi okora, byantiinisa. Mbwenu omuri egi myaka garuka obikore; omuri egi myaka obyorekye. Kwonka nobu oraagire ekiniga kiniga, ijuka okugira embabazi.

3Ruhanga akaruga Temani, Orikwera ogwo yaaruga omu Rushozi Pirani. Ekitiinwa kye kikashweka eiguru, ensi yaijura eby'okumuhimbisa.

4Okumurinkana kwe kukaba nk'omushana, amaranzi gatyankana nigaruga omu ngaro ze. Okwo niyo yaasherekire amaani ge.

5Omuze gukamwebembera, kahumpuri yaamuza omu ntegye.

6Akeemerera, yaagyera ensi; yaanaga amaisho, yaatengyeetsa amahanga; enshozi ezituuraho zaataataana, ebibungo by'ebiro byona byabandama. Emitwarize ye yaaba nk'eya ira.

7Nkareeba amahema ga Kushani gaine obwoba, emikingo ya Midiyani neetetema.

8Ai Nyakubaho, obu waatemba embaraasi zaawe, okaza aha kigaari kyawe ky'obusinguzi, okaba oiniire emigyera kashanga, oiniire egyo migyera ekiniga? Nari okaba ogwereirwe kubi enyana?

9Okashembuura obuta bwawe, waatamika emyambi. Ensi waagitamu emikura y'okurabwamu emitunga.

10Enshozi zikakureeba, zaayehinya, emyegyemure y'amaizi yaahimintika; okuzimu y'enyanja yaaranguuza eiraka, ebingonzi byayo byanaga emikono.

11Eizooba n'okwezi bikeemerera, byaguma omu myanya yaabyo, ahabw'okumurinkana kw'emyambi yaawe erikusyoka, n'ahabw'okurabya kw'eicumu ryawe eririkutyankana.

12Okagyenda nooraba omu nsi oine ekiniga kingi, waaribatiirira amahanga ogagwereirwe kubi.

13Okahurura kujuna abantu baawe, kujuna ou waasiigire amajuta. Waasingyeera omutwe gw'omuntu enyabibi, waamujweka busha okwiha aha bibero okuhitsya omu maraka.

14Okacumitsa emango zaawe emitwe y'abarwani be, abaizire nk'omuyaga gw'akasooroora kuntuntumura, obwo nibeesiima nk'abarikwenda kumariraho kimwe abooro bwesherekye.

15Okaribatiiriza enyanja embaraasi zaawe, amaizi gaayo maingi gaimukyeera,

16Ku mpuriire ebyo, omubiri gwangye gwona gwatetema, eminwa yaatengyeza ahabw'eryo iraka; obujunde bwantaaha omu magufa, amaguru gaajogajogoka. Mbwenu ntegyereize n'obucureezi obunaku kuhika, obu abarikuhurura kututeera baraareebereho enaku.

17Nobu emitiini eraabe etarikurabya, emizaabibu etariho bijuma, emioliva etarikwana, emisiri etarikwera byokurya, obusyo bw'entaama buhwaire omu itsibikiro, n'obw'ente buhwaire omu kibuga,

18kwonka niinyija kwesiimira omuri Nyakubaho, nshemerererwe omuri Ruhanga Omujuni wangye.

19Mukama Ruhanga niwe maani gangye. Ebigyere byangye abigira nk'eby'empara, angyendesa omu myanya yangye etunguukire. Eki n'eky'omukuru w'ebyeshongoro ebyeshongorerwa aha nanga z'emirya.

← Chapter 2 Jump to: