Malachi 2

nyankole

← Chapter 1 Jump to: Chapter 3 →

1Mbwenu imwe bahongyerezi 'mwe, ekiragiro eki n'ekyanyu.

2Mukama ow'amahe naagira ati: Ku muraabe mutategire kutu eki ndikubagambira, ku muraabe mutataireho mutima kumpa ekitiinwa, niinyija kubooherereza omukyeeno, n'emigisha yaanyu ngihindure omukyeeno. Nangwa n'obu naagikyeenire, ahabw'okuba timurikukitaho mutima.

3Reeba, ndyafubira ab'oruzaaro rwanyu, naimwe mbasiigye aha maisho amasha g'enyamaishwa zi mutamba, mbacwe ahi ndi.

4Mubone kumanya ku ekyo niinye nkibaragiire, ngu mpamye endagaano yangye na Leevi, Mukama ow'amahe nikwo arikugira.

5Endagaano ei naaragaine nawe, ekaba eri ey'okumutungisa amagara n'obusingye. Kandi nkabimuha ngu abone kuntiina. Haza nawe kwo yantiina, yaaguma nampa ekitiinwa.

6Okwegyesa eby'amazima kukaba kutamuruga mu kanwa, kandi akaba atagamba ebitahikire. Akagira naanye emitwarize y'obusingye kandi ehikire, yaiha baingi omu bibi.

7Manya abantu beesiga ebi omuhongyerezi agamba, kandi niwe beebuuzaho okubaha obwengye n'okubahabura; ahabw'okuba n'entumwa ya Mukama ow'amahe.

8Kwonka mukateishuka omuhanda, mwateeza baingi entsibo ahabw'ebi murikubahabura; mwaita mutyo endagaano ei naaragaine na Leevi; Mukama ow'amahe nikwo arikugamba.

9Nikyo ndikubagayisiza, nkabahindura abataine ku muri omu maisho g'abantu boona, ahabw'okuba mukanga kukuratira emitwarize yangye, mwagwera orubaju omu bi murikwegyesa.

10Twena titwine tataitwe omwe? Ruhanga owaatuhangire t'omwe? Mbwenu ahanki omuntu atari mwesigwa ahari mugyenzi we; haza tukashiisha endagaano ya baatatenkuriitwe?

11Aba Yuda tibabaire beesigwa, bakorera omuri Isiraeli n'omuri Yerusalemu ebirikuzira, ahabw'okuba bahagaize Omwanya gwa Nyakubaho Ogurikwera, baashwera abakazi barikuramya baaruhanga b'abanyamahanga.

12Nkaahenwa ki Nyakubaho amariraho kimwe omu ba Yakobo omuntu weena orikukora ekyo, n'orikukihamya, nari orikukigarukamu, nainga orikureetera Mukama ow'amahe ekitambo.

13Eki nakyo nimukikora. Nimujubya eitambiro rya Nyakubaho n'amarira, nimurira kandi nimutsinda; ahabw'okuba takyeeta ha mitoijo ei mumureetera, nobu kwakuba okugiikiriza ashemereirwe.

14Nimubuuza muti: Ahanki atarikugiikiriza? Ahabw'okuba Nyakubaho akaba kareebi w'endagaano ei waaragaine n'omukazi waawe ou waashweire okiri omutsigazi, bwanyima okamureebya, haza ari mugyenzi waawe, omukazi ou waaragaine nawe endagaano.

15Ruhanga ogwo omwe tarahangire omuntu aine omubiri n'omwitsyo gw'amagara? Mbwenu akaba naayenda ki? N'okumuzaarira abaana barikumutiina. N'ahabw'ekyo mwerinde hatagira omuntu otari mwesigwa aha mukazi we, ou yaashweire ari omutsigazi.

16Manya Mukama Ruhanga wa Isiraeli naagira ati: Nyanga okushendana, n'omuntu orikweshwekyerera ari omubisha; Mukama ow'amahe nikwo arikugamba. N'ahabw'ekyo mwerinde, murekye kuba endeebya.

17Nyakubaho mumuruhize n'ebigambo byanyu. Haza mugira muti: Tumuruhize tuta? Mumuruhize ahabw'okugira muti: Abantu boona abakora ekibi, baba barungi omu maisho ga Nyakubaho, kandi abashemerererwa. Nari obu mwebuuraguza muti: Ruhanga okora eby'obwinganisa arahi?

← Chapter 1 Jump to: Chapter 3 →