Malachi 4

nyankole

← Chapter 3 Jump to:

1Mukama ow'amahe naagira ati: Reeba, ekyo kiro kiryaija nikyotsya nk'eiziiko; obu abanyamaryo boona baryokibwa nk'embuba. Ahari ekyo kiro baryahiira kimwe, harekye kutsigaraho ekyeetwa omuzi gwabo, nari eitaagi ryabo.

2Kwonka imwe abantiina, amaani gangye agajuna garyabaturukiraho nk'eizooba, gabaakize nk'amaranzi gaaryo; mugyende nimukina nk'enyana zirikuruga omu kihongore;

3muribatiirire abanyabibi, babe eiju ahansi y'amara g'ebigyere byanyu, aha izooba eri nditaho; Mukama ow'amahe nikwo arikugamba.

4Mwijukye eby'omu iteeka ry'omugaragwa wangye Musa; ebyatairweho n'ebyaragiirwe, ebi naamuragiriire ahari Horebu, ngu Abaisiraeli boona babyorobere.

5Reeba, ndyabatumaho Eliya omurangi, ekyo kiro kya Nyakubaho ekikuru kandi ekirikutiinisa kitakahikire,

6ahindure emitima ya baishe abaana, bagarukane n'abaana baabo; n'ey'abaana, bagarukane na baishebo; ntakaija nkaitsa ensi omukyeeno.

← Chapter 3 Jump to: