Malachi 3

nyankole

← Chapter 2 Jump to: Chapter 4 →

1Reeba, nintuma entumwa yangye kumbandizayo, akantebeekanisiza omuhanda. Kandi Nyakubaho ou musherura aryaija kitaraariire omuri Nyaruju ye. Entumwa y'endagaano ou mutuura mwiniire ekihika, reeba neija, Mukama ow'amahe nikwo arikugamba.

2Kwonka n'oha oribaasa kwemera eizooba ri ariiziraho, kandi ku ariboneka n'oha origumaho ayemereire? Manya we ni nk'omuriro gw'omuheesi ogushemeza ebyoma, nari ni nk'esabundi y'omwozya w'emyenda.

3Aryashutama nk'omuheesi orikushemeza efeeza, akagimaramu enkamba. Nikwo arishemeza Abaleevi, akabeeza nk'ezaabu n'efeeza, okuhitsya obu baritoijera Nyakubaho emitoijo ehikire.

4Nibwo emitoijo y'aba Yuda n'aba Yerusalemu erigwisa gye Nyakubaho, nk'omu biro bya ira, n'omu myaka eya bwabiso.

5Obwo nibwo imwe ndibairira haihi kubacwera orubanja. Ndyaba mushinja w'obwira, w'okwemeza abarogi, abashambani, abarikurahira ebishuba, abarikuryangatanisa abakozi bakabaima ebihembo byabo; abarikunyaga eby'abafaakazi n'eby'efuuzi; n'okushinja abarikuteeza enkokora abashuuhuuki, n'abatarikuntiina; Mukama ow'amahe nikwo arikugamba.

6Manya Nyowe Nyakubaho timpinduka, nikyo imwe beene Yakobo mutarikumarirwaho.

7Okwiha omu biro bya baashwenkuriimwe, mutuura nimuteishuka ebi naataireho, mutarikubikuratira. Nimungarukire, naanye mbagarukire; nikwo Mukama ow'amahe arikugamba. Kwonka nimugira muti: Tugarukye tuta?

8Mbwenu omuntu akaaryangatanisa Ruhanga? Manya nimundyangatanisa. Kwonka nimugira muti: Nitukuryangatanisa tuta? Nimundyangatanisiza omuri byakimwe kya ikumi kyanyu, n'omu mitoijo yaanyu.

9Mwena ab'eihanga ryona mukyeenirwe, ahabw'okuba nimundyangatanisa.

10Mureete kimwe kya ikumi omu ibiikiro, Nyaruju yangye ebone kubamu ebyokurya, reero mubingyerezeho; Mukama ow'amahe nikwo arikugamba; haza mureebe ku ndaabe ntarikwija kubaigurira amadirisa g'eiguru, nkabashukyeera emigisha ekasheesheka.

11Ahabwanyu ndyakabukira enzigye zirikugungunura zirekye kucwekyereza emyaka yaanyu, n'emizaabibu y'omu misiri yaanyu erekye kubura kwana; Mukama ow'amahe nikwo arikugamba.

12Obwo amahanga goona nibwo garibeeta abaine omugisha, ahabw'okuba muryaba mutwire omu nsi y'okushemerererwamu; Mukama ow'amahe nikwo arikugamba.

13Nyakubaho naagira ati: Ebi mungambireho ti birungi. Haza mugira muti: Tukugambireho kubi tuta?

14Mugizire muti: Tikiine muhoho okuheereza Ruhanga. Mbwenu nikitugasira ki, okukora ebi arikuturagiira, tukaguma turi nk'abarikuganya omu maisho ga Mukama ow'amahe?

15Muti: Nikyo turikuteekateekyera ngu ab'amaryo baine omugisha; n'enkozi z'ebibi tizigogyeera kwonka, kureka nobu zigyeza Ruhanga, zikira.

16Bwanyima abaatiinire Nyakubaho bakagambirana; Nyakubaho yaatega okutu, yaabahurira. Abo abaabaire batiina Nyakubaho bakamuha ekitiinwa, ekitabo ky'okubaijukiraho kikahandiikirwa omu maisho ge.

17Mukama ow'amahe yaagira ati: Baryaguma bari abangye ahabwangye, aha izooba ri nditaho. Haza mbagirire embabazi, nk'oku omuntu azigirira omutabani orikumuheereza.

18Bwanyima muryagaruka mumanye omutaano gw'abahikiriire n'enyabibi, ogw'oheereza Ruhanga n'ogw'otamuheereza.

← Chapter 2 Jump to: Chapter 4 →