Micah 2

nyankole

← Chapter 1 Jump to: Chapter 3 →

1Ebishi baryakareeba abacuma enaama mbi, bakabyama aha bitanda byabo nibateekateeka oku baraakore eby'obwinazi! Haza omushekye gukijuguta, bakabikora; ngu ahabw'okuba baine obushoboorozi bw'okubikora.

2Beetenga ebibanja by'abandi, babihamba, bataho n'okunyaga amaju. Bahata omuntu n'ab'eka ye, batwara omuntu n'ebi atungire.

3Nikyo Nyakubaho arikugirira ati: Reeba, nincumira oru ruganda enaama y'okurureetaho akabi, aku mutaribaasa kwihamu ebitsya byanyu. Kandi timurigyenda nimwekunika, ahabw'okuba buryaba buri obunaku bw'akabi.

4Obunaku ku burihika, baryabagambaho oku mwahikiriirwe, beeshongore ekyeshongoro ky'obwehwa mantsiko bwanyu bati: Twakiirwe kimwe ebyaitu byona. Ensi y'abantu baitu bagicwiremu ebicweka, baagibagana. Tihariho oraagibagarurire, ahabw'okuba ebibanja byaitu Nyakubaho abigabiire abaatukwatsire.

5Nikyo omu bantu ba Nyakubaho muriburira ow'okubabaganisiza eitaka n'omugoye, naabateerera enteenyu.

6Abantu bagambisibwa nibagira bati: Otagambira eryo, omuntu tashemereire kurangirira ebintu nk'ebyo; ahabw'okuba titurikwija kuhemuka.

7Imwe ab'omuryango gwa Yakobo, ekyo kikaagambirwe? Mutima wa Nyakubaho takiine kugumisiriza? Mbwenu ebyo niwe arikubikora? Ebigambo byangye tibirikugasira oine emitwarize ehikire?

8Kwonka nimwimuka kurwanisa abantu bangye nk'abazigu. Abaine obusingye, abarikuhingura n'obwesigye, bataine kiteekateeko ky'okurwana, mubaaka eminagiro yaabo.

9Abakazi b'abantu bangye mubabinga omu maju gaabo agu barikukunda; abaana baabo abato mubaihiraho kimwe ekitiinwa ki naabahaire.

10Nimwimukye mugyende! Manya ogu ti mwanya gw'okuhuumuriramu; ahabw'okuba ebihagaro bi murikukora nibigureetera okucwekyerera.

11Omuntu ku yaakugyendagyenda naagamba ebitaine muhoho n'ebishuba ati: Ka mbarangire ebya viino n'eby'amakuuta, niwe yaakuba omurangi w'aba bantu!

12Imwe aba Yakobo, buzimazima mwena ndyabarundaana. Ndyarundaana aba Isiraeli abaatsigaireho; babe nk'entaama eziri omu ruhimbi rwazo; nari nk'obusyo oburi omu iriisizo ryabwo, bateere akaari ahabw'obwingi bw'abantu.

13Orikusheenya ah'okuraba aryabeebembera. Baataguze, barabe omu irembo nibashohora. Omugabe waabo arabeho, abaze omu maisho, Nyakubaho abeebembeire.

← Chapter 1 Jump to: Chapter 3 →