Micah 4

nyankole

← Chapter 3 Jump to: Chapter 5 →

1Kwonka omu biro ebiriija, obunaku buryahika, orushozi rwa Nyaruju ya Nyakubaho ruhamibwe, rube orurikukira ezindi zoona aha mutwe; kandi rutunguurwe, rukire ebibungo byona, amahanga garuhimintikire.

2Amahanga maingi garyaija, gagire gati: Nimwije twinamukye aha rushozi rwa Mukama, ahari Nyaruju ya Ruhanga wa Yakobo, atwegyese emitwarize ye tugikuratire. Manya omuri Siyooni nimwo eby'omu iteeka biriruga; n'omuri Yerusalemu hakarugamu ekigambo kya Mukama.

3Aryaramura amahanga maingi; ashoboorore amahanga g'amaani aga haihi n'aga hare. Zaarurara zaabo baziheeshemu amafuka; n'amacumu gaabo baganaguremu empabyo. Eihanga rirekye kubangira rigyenzi ryaryo rurara, nobu kwakuba okugaruka kutendekwa eby'orugamba.

4Kureka baryashutama buri muntu omu muzaabibu gwe n'omu mutiini gwe. Kandi tiharibaho n'omwe oribatiinisa, ahabw'okuba ekyo Mukama ow'amahe niwe yaakigamba.

5Manya agandi mahanga goona gahurura nigeesiga ruhanga waago; kwonka itwe ebiro byona turyahurura nitwesiga Mukama Ruhanga waitu.

6Nyakubaho naagira ati: Eryo izooba ndyateeranira hamwe abarema, ntaaruure abaabingirwe, n'abu naabonaboneise.

7Omu barema nimwo ndiiha abaritsigaraho, n'omu bazaahiibwe nimwo ndiiha eihanga ry'amaani. Nyakubaho abategyekyere aha rushozi Siyooni, okwiha obwo okuhitsya ryari na ryari.

8Naiwe munaara gw'obusyo we, ekibungo kya muhara wa Siyooni niiwe kirihikaho; obutegyeki bwa ira, obugabe bwa muhara wa Yerusalemu bugarukyeho.

9Mbwenu nu, nooboroogibwa ki? Omuriiwe tiharimu mugabe? Omuhanuuzi waawe afiire, ngu obone kugira ebisha nk'omukazi orikurumwa?

10Iwe muhara wa Siyooni 'we, yenyogoore, otsinde nk'omukazi orikurumwa, ahabw'okuba hati ori ow'okuruga omu rurembo, okatuura omu nsi y'obwerere; okaza Babulooni. Okwo niyo orirokorerwa Nyakubaho akakucungura omu bazigu baawe abaakukwatsire.

11Hati amahanga maingi gakuteeraniireho kukurwanisa nigagira gati: Ka tuhagaze Siyooni, haza tugishamaarire.

12Kwonka tigarikumanya ebi Nyakubaho arikuteekateeka, nobu kwakuba okwetegyereza enaama ye; ku agarundaine nk'ebiba by'engano ebirunzirwe aha mbuga.

13Mbwenu iwe muhara wa Siyooni, imuka ogahuure ahabw'okuba amahembe gaawe ndyagahindura ekyoma, ebinono byawe mbihindure omuringa; osheenyagure amahanga maingi, eminyago y'ebi gatungire ogimpongyere, nyowe Nyakubaho w'ensi yoona.

← Chapter 3 Jump to: Chapter 5 →