Micah 7

nyankole

← Chapter 6 Jump to:

1Ai bambe! Naaba nk'omu kyanda, obu ebijuma biba bishoromirwe, n'emizaabibu ehumbirwe, hakabura omugimba gw'okurya, nobu kyakuba ekijuma ky'omutiini ekibandize kuhiisa, eki omutima gwangye gurikwetenga.

2Manya omu nsi tihaakirimu muntu orikutiina Ruhanga, n'omu bantu tihaakirimu ohikire. Boona nibagwera ab'okwita, buri omwe naatega mwene ishe ekigoye.

3Emikono yaabo n'enyabwangu y'okukora ekyetwa ekibi, kandi bakikora bakyezirikiire; omutegyeki n'omuramuzi bashaba enguzi, n'omuntu mukuru agamba butunu ekibi ki omutima gwe gurikwetenga. Nikwo bacwa batyo obwengye.

4Omurungi omuribo ni nk'omukwatangwe, n'ohikire omuribo ni nk'orugo rw'amahwa. Mbwenu eizooba ry'okubafubira, eryarangirwe abarinzi baabo ryahika.

5Muteesiga omutaahi, mutagira obwesigye ahari munywani waanyu. Kandi okwate akanwa, nangwa n'aha mukazi waawe ou ofumbata.

6Ahabw'okuba omwojo naagaya ishe, omwishiki agomera nyina, omukazi muto ahakanisa nyinazaara. Manya abazigu b'omuntu baba ab'omu ka ye.

7Kwonka nyowe amaisho ndyagahanga Nyakubaho. Ngume ntegyereize Ruhanga omujuni wangye; kandi Ruhanga wangye aryampurira.

8Iwe muzigu wangye 'we, reka kuunyesiimirana. Manya nobu ndigwa, ndyaimuka. Ku ndishutama omu mwirima, Nyakubaho aryampwezesa.

9Ndyayemera ekiniga kya Nyakubaho, ahabw'okuba mucumwireho; okuhitsya obu arintonganira, akaanyihaho orubanja. Aryanshohoza, ampitsye aharikuhweza, ndeebe oku ajuna.

10Obwo omuzigu wangye aryakireeba; n'owangizire ati: Mukama Ruhanga waawe arahi, aitwe enshoni. Ndyamureebesa ekiziizi, aribatiirirwe nk'ebyondo by'omu muhanda.

11Eizooba ry'okugarurayo ebigo byawe riri haihi kuhika. Ahari eryo izooba emyatano y'ensi yaawe eryairizibwayo.

12Eryo izooba abantu baawe baryakugarukira, nibaruga Asiriya n'omu ndembo za Misiri; okwiha Misiri okuta aha mugyera Eufuraati; okwiha aha nyanja okuta aha ndiijo, n'okwiha aha rushozi okuta aha rundi.

13Kwonka ensi eryahinduka eihamba, ahabw'ebibi by'abagitwiremu.

14Riisa abantu baawe n'enkoni yaawe; obusyo bwawe ahabwawe, abatuura bonka omu kibira, ahagati y'ensi erikweza. Obariisize omuri Bashani na Gileadi nk'omu biro bya ira.

15Nk'omu biro bi waarugiiremu Misiri niinyija kubooreka eby'okutangaaza.

16Amahanga gakireebe, haza gaitwe enshoni ahabw'amaani gaago. Engaro gazite aha munwa, amatu gagahenderemu ebiti.

17Garigatse omucuucu nk'enjoka, n'eby'omu nsi ebigyendesa enda. Garyaija nigatetema, nigaruga omu bigo byago ebigumire, gakubuukire Mukama Ruhanga waitu, gaitsirwe obwoba, kandi gatiine ahabwawe.

18Mbwenu ni Ruhanga ki oshushana naiwe, osaasira ebibi, ekeehuzya ebicumuro by'abantu be abaatsigaireho? Manya ebiro byona tagumya kiniga aha mutima, ahabw'okuba akunda kutworeka rukundo ye etahararuka.

19Aryagaruka atugirire esaasi aribatiirire ebicumuro byaitu, abisiitagure. Ebibi byaitu byona aryabinaga okuzimu omu nyanja.

20Oyorekye Yakobo ku ori omwesigwa, na Aburahamu ku omwiniire rukundo etahararuka; nk'oku waarahiire nookiraganisa baatatenkuriitwe okwiha omu biro bya ira.

← Chapter 6 Jump to: