Nehemiah 1

nyankole

Jump to: Chapter 2 →

1Ebi n'ebi Nehemiya mwene Hakaliiya yaatebize. Mbwenu omu kwezi kwa Kisileevi, omu mwaka gwa makumi abiri, ogw'omu busingye bw'Omugabe Arutazaakiseesi, ku naabaire ndi omuri Susa orurembo rukuru,

2naayecura Hanaani, omwe ahari beene waitu; yaija n'abandi bantu nibaruga Buyudaaya. Naababuuza eby'Abayudaaya abaahonokireho bakakira okuzaahibwa, n'ebya Yerusalemu.

3Bangira bati: Abaahonokireho bakakira okuzaahibwa, abatwire omuri ekyo kyanga baine enaku nyingi, n'enshoni z'okuhemuka, ahabw'okuba ekigo kya Yerusalemu kisheenyukire, n'amarembo gaayo gacwekyereziibwe omuriro.

4Ku naahuriire ebyo bigambo, ekibunu naakiteera ahansi, naarira, naamara ebiro nincura; naaguma niinyesiibyakwo, kandi ninshaba Ruhanga ow'omu iguru.

5Reero naagira nti: Ai Mukama, Ruhanga ow'omu iguru, Ruhanga omukuru kandi orikutiinisa, iwe orinda endagaano, okagira rukundo etahararuka aha bakukunda, bakoorobera ebiragiro byawe,

6tega okutu, kandi oreebe, ohurire okushaba kw'omuheereza waawe, oku nyowe hati ndikushabira omu maisho gaawe nyomushana na nyekiro, ahabw'Abaisiraeli abaheereza baawe, niinyatura ebibi byabo ebi twakucumwireho. Eego, nyowe n'ab'enju ya tata tukacumura.

7Tukakukorera ebitahikire, titwakuratira biragiro bi waaragiire omugaragwa waawe Musa.

8Ijuka ekigambo ki waaragiire omugaragwa waawe Musa, noogira oti: Ku muriba mutabaire beesigwa, ndyabataataanira omu mahanga;

9kwonka ku muringarukira mwakuratira ebiragiro byangye, mwabihitsya, abaanyu n'obu bariba bataataaniire ei eiguru riherera, ndyabataarurayo, mbareete omu mwanya gu naatooraine kugumyamu eiziina ryangye.

10Nibo bairu baawe, kandi n'abantu baawe abu waacungwize obushoboorozi bwawe obwingi n'omukono gwawe ogw'amaani.

11Ai Nyakubaho, tega okutu ohurire okushaba kw'omuheereza waawe, n'okw'abaheereza baawe abashemerererwa okutiina eiziina ryawe; haza nyowe omuheereza waawe ompe okugyenderwa gye eri izooba, kandi ompe okugirirwa embabazi ogu muntu. Mbwenu obwo, nyowe nkaba ndi orikubonetsya omugabe ekikopo kya viino.

Jump to: Chapter 2 →