Nehemiah 13

nyankole

← Chapter 12 Jump to:

1Eryo izooba bakashomera abantu eby'omu kitabo kya Musa, baashanga hahandiikirwemu ekirikugira kiti: Tihariho Omuamoni nari Omumoabu oriikirizibwa kuza ahu abantu ba Ruhanga bateeraniire.

2Ahabw'okuba tibarabuganiise Baisiraeli byokurya na maizi, kureka bakaguriirira Balaamu kubakyeena kwonka Ruhanga waitu, ogwo mukyeeno yaaguhindura omugisha.

3Abantu ku baahuriire eryo iteeka, baiha omu Baisiraeli ebizaarwa byona ebirikukomooka omu banyamahanga.

4Mbwenu ebyo bitakabaireho, Eliyashibu omuhongyerezi owaatairweho kureeberera ebishengye by'omuri Nyaruju ya Ruhanga waitu ahabw'okugira obuzaare na Toobiya,

5akamuteguurira ekishengye kihango, eki ira baabaire batamu emitoijo y'ebyokurya by'esaano, obubaani, ebirikukoresibwa omuri Nyaruju, kimwe kya ikumi ky'eby'okurya by'omujuma, viino n'amajuta, ebyabaire biragiirwe kuheebwa Abaleevi n'abeeshongozi n'abakumiirizi, hamwe n'ebyabaire bitoijwa kuheebwa abahongyerezi.

6Haza obu ebyo byakorwa, nyowe nkaba ntari omuri Yerusalemu, ahabw'okuba omu mwaka gw'ashatu n'ebiri ogw'omu busingye bwa Arutazaakiseesi omugabe wa Babulooni, nkaba ngiire ow'ogwo mugabe. Reero ku haahingwireho ebiro, naashaba omugabe kuunyikiriza kugyenda.

7Ntyo ngaruka Yerusalemu. Bwanyima mmanya ekibi ki Eliyashibu yaakozire, ahabw'okuteguurira Toobiya ekishengye omu bikaari by'enju ya Ruhanga.

8Naanye ekyo kingwisa kubi munonga, mpuruutura ebintu bya Toobiya byona omuri ekyo kishengye, mbinaga aheeru.

9Reero ndagiira, beeza ebyo bishengye, mbona kubigaruramu ebintu ebyabaire nibikoresibwa omu nju ya Ruhanga, hamwe n'emitoijo y'esaano n'obubaani.

10Kandi nkeetegyereza ku Abaleevi batarahairwe migabo yaabo. Ekyo kyareetera Abaleevi n'abeeshongozi, abaabaire nibakora ogwo murimo, kuhunga buri omwe akagaruka omu kibanja kye.

11Njuukirira abatware nti: Ahabw'enki Nyaruju ya Ruhanga etsigirweho? Mpaho ntaaruura abo bantu, mbagarura omu myanya yaabo.

12Bwanyima Abaayuda boona bakareeta omu mabiikiro kimwe kya ikumi ky'ebyokurya by'omujuma, na viino n'amajuta.

13Naanye naataho aba kuba ababiiki b'okureeberera ago mabiikiro: Shelamiya omuhongyerezi na Zadoki omuhangu w'eiteeka, na Pedayiiya ow'omu Baleevi, nibahwerwa Hanani Zaakuri, mwijukuru wa Mataniiya; ahabw'okuba bakaba nibamanywa ku bari abeesigwa, kandi omurimo gwabo gukaba guri ogw'okuha beene waabo egabo yaabo.

14Ai Ruhanga wangye, onyijukye ahabw'ekyo, kandi oteebwa ebirungi bi naakozire ahabwa Nyaruju ya Ruhanga wangye, n'ahabw'emirimo yaamwo ey'okumuheereza.

15Omu biro ebyo, nkareeba abantu omu nsi ya Yuda nibanyuuka viino ahari Sabato, kandi nibareeta ebiba by'ebyokurya by'omujuma nibabyekoreza endogoya. Kandi hoona bakaba nibareeta omuri Yerusalemu aha izooba rya Sabato, viino, ebijuma by'emizaabibu n'eby'emitiini, n'emitwaro y'emiringo yoona. Naanye nikwo kubateisa aha izooba ri baabaire nibatundiraho ebyokurya.

16Kandi n'abantu ba Tuuro, abaabaire batwire omu rurembo, bakaba bareetamu ebyenyanja n'ebindi bintu by'okuguza, babiguza abantu b'omu nsi ya Yuda n'ab'omuri Yerusalemu ahari Sabato.

17Ntyo njuukirira abakungu b'omu nsi ya Yuda, mbagira nti: Ahabw'enki nimukora ekibi kirikushusha kiti, kushiisha ekiro kya Sabato?

18Ekyo tikyo baashwenkuriimwe baakozire, na Ruhanga waitu akatureetaho aka kabi koona akakareeta n'ahari oru rurembo? Mbwenu reeba, ahabw'okushiisha Sabato mwaza kureeta ahari Isiraeli ekiniga ekirikukiraho.

19Ku bwabaire nibutandika kwira, ndi aha marembo ga Yerusalemu, Sabato eri haihi kuhika, naaragiira ku bakinga enyigi, haza naagira nti: Zitaigurwa okuhitsya obu Sabato eraahwe. Kandi naataho bamwe aha baheereza bangye kurinda ago marembo, ngu hatakaagira owaataasyamu omutwaro aha izooba rya Sabato.

20Ekyo kyareetera abashuubuzi n'abarikutunda ebintu by'emiringo yoona kuraara aheeru ya Yerusalemu, rimwe nari kabiri.

21Naanye naabateisa nimbagira nti: Ahabw'enki nimuraara enyima y'orugo? Ku muraakigarukire, nimbakwata. Okwiha obwo tibaagira bu baizire ahari Sabato.

22Mpaho naaragiira Abaleevi kweyeza, bakaija, bakarinda amarembo; Sabato ekaguma eri erikwera. Ai Ruhanga wangye, ekyo nakyo okiinyijukire kandi onsaasire, nk'embabazi zaawe nyingi oku ziri.

23Kandi omu biro ebyo, nkareeba Abayudaaya abaabaire bashweire abakazi omu Baashidoodi n'omu Baamoni n'omu Bamoabu.

24Kimwe kya kabiri ky'abaana baabo bakaba nibagamba Oruashidoodi, nibaremwa kugamba Oruyudaaya, kureka nibagamba orurimi rumwe aha z'ago mahanga.

25Ntyo mbatonganisa, mbakyeena, na bamwe omuribo mbateera, mbamaanyura eishokye. Mbarahiza Ruhanga; bagira bati: Titurihingira bahara baitu batabani baabo, nobu kwakuba okushwererera batabani baitu bahara baabo, nari itwe okubeeshwererera.

26Mbagira nti: Timurikumanya ku Solomooni omugabe wa Isiraeli, abakazi nk'abo baamureeteire kukora ekibi? Omu mahanga goona hakaba hatariho mugabe ori nkawe, kandi akaba naakundwa Ruhanga we. Ruhanga ogwo yaamuhindura omugabe wa Isiraeli yoona. Kwonka shi, abakazi abanyamahanga baarugaho baamukoresa ekibi.

27Mbwenu twikirize ebyanyu, tukore ekibi kihango ekirikwingana kityo, tureebye Ruhanga waitu, tushwere abanyamahangakazi?

28Haza obwo, omwe ahari batabani ba Yehoyaada, mwene Eliyashibu omuhongyerezi omukuru, akaba ari mukwe wa Sanibalati Omuhooroni. Ntyo mmubinga omu maisho gangye.

29Ai Ruhanga wangye, guma obaijukye ahabw'okuba bahagaize obuhongyerezi, n'endagaano y'abahongyerezi n'ey'Abaleevi.

30Nikwo naabeerize ntyo, nkabamaramu kyona ekyetwa eky'abanyamahanga, nkagaruraho emirimo y'abahongyerezi n'Abaleevi, buri omwe omu murimo gwe;

31nkataho ebiragiro by'okureeta enku omu bunaku bwazo obwatairweho, kandi n'eby'emiganuro. Ai Ruhanga wangye, guma onyijukye, onzimuurire ebirungi.

← Chapter 12 Jump to: