Nehemiah 5

nyankole

← Chapter 4 Jump to: Chapter 6 →

1Bwanyima bamwe omu Bayudaaya n'abakazi baabo bakeetomboitera munonga Abayudaaya beene waabo.

2Ahabw'okuba hariho abaayetomboitsire, ngu bakaba nibakwatiriza batabani baabo na bahara baabo, ngu babone kutunga ebyokurya by'okubahaisa amagara.

3Kandi haabaho abaagizire bati: Ahabw'enjara, ku turikuza kutunga ebyokurya, tukwatiriza emisiri yaitu, n'ey'emizaabibu n'amaka gaitu.

4Reero abandi baagira bati: Twegurize empiiha, twakwatiriza emisiri yaitu, n'ey'emizaabibu, ahabw'okuha omushoro gw'omugabe.

5Mbwenu n'obu turaabe turi ab'omubiri gumwe na beene waitu, n'abaana baitu bari nk'abaabo, kwonka nitugyema batabani baitu na bahara baitu kuba abahuuku, kandi bamwe omuri bahara baitu baahindwirwe abazaana. Kwonka titwine oku turaakigire, ahabw'okuba abandi bantu baine emisiri yaitu hamwe n'ey'emizaabibu.

6Ku naahuriire ebi baayetomboita n'ebi baagamba, naaguubwa kubi munonga.

7Naayehanuuza omu mutima, bwanyima naatonganisa abakungu n'abatware, naabagira nti: Nimushaba ekiteebwamu, buri muntu akiiha ahari mwene ishe. Ntyo nteerana abantu baingi kubeemeza;

8haza mbagira nti: Itwe tukakora eki turikubaasa, twacungura beene waitu Abayudaaya abu baabaire bagurize Abanyamahanga; mbwenu imwe nimutunda beene waanyu, ngu itwe tubacungure! Batyo bahunama, babura eky'okugamba.

9Naanye mbagira nti: Eki murikukora, ti kirungi. Timushemereire kuguma nimutiina Ruhanga waitu, mukareka kutujumisa Abanyamahanga abazigu baitu?

10Nangwa naanye na beene waitu n'abaheereza bangye, nitubaguza empiiha n'ebyokurya. Mbwenu ka turekye ekyo kiteebwamu.

11Eri izooba mutoosha, mubagarurire emisiri yaabo n'ey'emizaabibu n'ey'emioliva n'amaju gaabo na kimwe kya igana ky'empiiha n'eky'engano n'ekya viino n'eky'amajuta, ebi mubaire nimubacwera.

12Nabo baagira bati: Ebyo nitwija kubigaruraho, kandi titwine ki turaabenze. Twaza kukora nk'oku waagamba. Kandi naayeta abahongyerezi, naabarahiza kukora nk'oku baaraganiise.

13Ntyo nkunkumura omunagiro gwangye, ngira nti: Omuntu oraabe atahikiriize ki yaaraganisa, Ruhanga naakamukunkumure atyo, akamwiha omu nju ye n'aha murimo gwe. Kandi naakakunkumurwe atyo, akaba omurangara. Reero boona abateeraniire aho baagira bati: Kibe kwo; kandi baahimbisa Nyakubaho. Haza abo bantu baatwaza nk'oku baaraganiise.

14Mbwenu okwiha omu bunaku bu naateereirweho kuba omutegyeki waabo mukuru, omu nsi ya Buyudaaya, okwiha omu mwaka gwa makumi abiri, okuhitsya omu gwa makumi ashatu n'ebiri ogw'omu busingye bwa Arutazaakiseesi omugabe, niyo myaka ikumi n'ebiri, n'obu yaakuba nyowe, nari beene waitu, tihariho owaariire ebyokurya ebitoijerwa omutegyeki omukuru.

15Abategyeki abakuru abambandiize bakaba baremeerera abantu, nibabacwera ebyokurya na viino, otabariiremu shilingi makumi ana z'efeeza. Nangwa n'abagaragwa baabo bakaba bategyekyesa abantu eikama; kwonka nyowe tindatwarize ntyo, ahabw'okuba nkaba nintiina Ruhanga.

16Naahamira aha murimo gw'okukora ekyo kigo, tinaayetungira itaka, n'abagaragwa bangye boona baaguma nibateeranirayo kukora omurimo.

17Kandi aha meeza yangye hakaba hariiraho abantu igana na makumi ataano; Abayudaaya n'abatware, otabariiremu abaabaire batwijamu, nibaruga omu mahanga agatwehinguririize.

18Reero egabo ya buri izooba ekaba eba enimi emwe n'entaama mukaaga enungi, kandi hoona naanye bambonereza enkoko; na buri biro ikumi batuteeraho endyanga ikumi za viino nyingi. Kwonka omuri ebyo byona, nkaba ntakenzaga bantu byokurya ebitoijerwa omutegyeki omukuru, ahabw'okuba abo bantu bakaba baruhiibwe obuhuuku.

19Ai Ruhanga wangye, ijuka byona ebi naakoreire abo bantu, onzimuurire ebirungi.

← Chapter 4 Jump to: Chapter 6 →