2 Samuel 22

Oromo Gujiii (KITAABA WOYYICHA) - No Year

← Chapter 21 Jump to: Chapter 23 →

1Mootiin Waan Maraa harka diinota isaa maraa fi harka Saa'olii jalaa yennaa isa baase Daawiti faaruu asii gad jirtu tana Mootii Waan Maraatiif faarse:

2Inni, «Mootiin Waan Maraa rassaa kiyya, waan itti golladhu; ka na baasulle'e.

3Waaqi kiyya rassaa kiyya ka ani itti baqadhu; wontee tiyya, ka akka gaafaa woy na irraa dhooggu. Inni kushee tiyya jaddu'u; ta ani itti baqadhu; fayyisaa kiyyalle'e; namoota hunnaan nama irratti ka'anu jalaa na hin baasa.

4Ani Mootii Waan Maraa leellifamaa hin waammadha; innille diinota kiyya jalaa na hin baasa.

5«Danbaliin du'aa na marsitee, lolaan badi'ii na gad liqinse.

6Wodaroon awwaalaa na xaxxee, tiyyoon du'aa na qabatte.

7Rakkinna kiyya keessatti ani Mootii Waan Maraa kiyya waammadhe; akka na qarqaaruuf, Waaqa kiyyatti iyye. Inni Dunkaanii Woyyittii ifii keessaa qoonqoo tiyya dhage'e; iyya tiyyalle caqase.

8«Mootiin Waan Maraa waan aareef, latti rommitee tachoote; hundeen ol-gubba'aalle daaxxee hollatte.

9Funnaan isaa keessaa aarri baye; afaan isaa keessaa ibiddi luxub godhuu fi kashilli ibiddaa baye.

10Inni ol-gubbaa dayyaasee gad bu'e; duumensi gurraachi miila isaa jala jiraayyu.

11Inni dada ol-gubba'aa ta koola qaddu irra tee'ee koolaan ka'e; koola qilleensaa irra tee'ee xinniqe.

12Inni dukkana gollaa ifii godhatee, dunkaaniin isaa adaala isaa jirtiiyyu; duumensi gurraachi, bisaaniin guutame, isa marseera.

13Calalaqa addee inni jiruu keessaa, balaqqeettiin balaqqitte.

14Mootiin Waan Maraa ol-gubbaa irraa mandi'e; Waaqi Ol Aanaan qoonqoo ifii dhageessise.

15Inni daaya ifii darbatee diinota ifii bittinneesse; balaqqeessa balaqqeetti'iitiin haxowee isaan balleesse.

16Xixicha Mootii Waan Maraatiin, dhowicha hafuura funnaan isaatiin, dhooqoti abbaayaa jalaa mudhatane; hundeen lafaa marti qullaa hafane.

17«Inni gubbaa irraa gad hiixatee, na qabe; bisaan qilee keessaa harkisee na baase.

18Isaan akka malee hunnaan waan na caalanuuf, inni diinota kiyya hunnaameyyii, worra na jibbu jalaa na baase.

19Yennaa ani rakkadhe, isaan na irratti ka'ane; Mootiin Waan Maraa ammoo na qarqaare.

20Inni gara addee badho'oo na geessee, waan natti gammadeef, na baase.

21«Mootiin Waan Maraa akkuma balchummaa tiyyaatitti naaf godhe; inni waan ani yakkaa hin qanneef gatii naa kaffale.

22Ani karaa Mootii Waan Maraa waan hordofeef, Waaqa kiyya irraa deebi'ee waan hantuu hin hunye.

23Ani seera isaa mara muummesseera; seerata isaalle irraa hin gorre.

24Ani isa duratti komii hin qabuuyyu; cubbuu irralle'ee ifi eeggadheera.

25Mootiin Waan Maraa akkuma balchummaa tiyyaatitti, ani waan yakkaa hin qanneef badhaasa naaf kenne.

26«Ee, Mootii Waan Maraa, ati worra addatama'aaf, ka addatante; worra komii hin qanneef, ka komii hin qanne.

27Worra qulqullu'uuf, ati qulqullu'u; worra dabaalessaaf, akka daba isaaniititti gatii isaaniif kennita.

28Ati worra gad ifi qabu hin baatta; worra kooru ammoo hin salphitta.

29Ee, Mootii Waan Maraa, ati ifa naaf hin issita; Waaqa kiyya, ati dukkana tiyya hin issita.

30Qarqaarsa keetiin ani loltoota hin lola; qarqaarsa Waaqaatiin dalleya gubba'aan utaaluu dande'a.

31«Karaan Waaqaa dhidhinna hin qabu; jechi Mootii Waan Maraa dhuga'a; worra isatti baqatuuf, inni wonte'e.

32Waaqa malee Mootiin Waan Maraa eennu? Waaqa keenna malee rassaan eennu?

33Jabeenna ka anaaf kennu, ka karaa naaf qajeelchu Waaqa.

34Inni miila kiyya akka miila gadansaa hin jabeessa; koobota gubbaa sodaa malee na dhaabbachiisa.

35Inni harka kiyya lolaaf hin leenjisa; guubee sageettu'uu harkisuu akka dande'u, irree tiyya hin jabeessa.

36Wontee teeti ta fayyinnaa naa kenniteerta; qarqaarsi keeti guddaa na godheera.

37Karaa ideemmaa tiyyaa naaf badhittee, miilli kiyyalle hin mucucaanne.

38«Ani diinota kiyya ari'ee isaan balleesse; haga isaan badanutti ani duubatti hin deebine.

39Akka isaan dande'anee hin kaane, gad isaan dhowe; isaan miila kiyya jalatti jigane.

40Ati lolaaf hunna naaf kennite; mormitoota tiyya miila kiyya jalatti jilbiiffachiitte.

41Ati diinoti kiyya worri na jibbu duubatti deebi'anee akka baqatanu goote; anille isaan balleesse.

42Isaan qarqaarsa gaafatiisaaf iyyane; ammoo nami tokkolle isaan hin qarqaarre. Isaan Mootii Waan Maraa waamane; inni ammoo deebii hin kennine.

43Akka bukuu qilleensi afuufuu, ani isaan butuche; akka dhoqqee karaa keessaa, ani isaan irra sirbe.

44«Ati kolbaa tiyya ta na loltu jalaa na baatte; gosa biyya adda addaa irratti bulchaa na goote; kolbaan ani hin beenne na tajaajilte.

45Worri ormaa na sossobatane; gurra kiyya akkuma dhage'aneen, naaf ajajamane.

46Isaan Sodaatanee addii kutatane; raafamanee kushee jadduu ifii lakkisanee bayane.

47«Mootiin Waan Maraa jiraata'a! Rassaan kiyya leellifamuu ti! Waaqi fayyisaan kiyya jajamuu ti.

48Inni Waaqa diinota kiyya haluu naa bayu; gosa biyya adda addaa harka kiyya jala galcha.

49Inni diinota kiyya jalaa na baasa. Diinota kiyya irratti ol ol na qaba; kolbaa hunnaan na irratti kaatu jalalle'ee na baasa.

50Tanaaf, Mootii Waan Maraa, gosa biyya adda addaa oddu'utti si leellisa; faaruu leellisaatiin maqaa keeti faarfadha.

51Mootiin Waan Maraa mooticha mootii godheef, injifachaa kenna; ka ifii muude Daawitii fi sanyii isaatiifille, jaalala ifii ka bara baraa itti mudhisa» jedhe.

← Chapter 21 Jump to: Chapter 23 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible Oromo Gujiii (KITAABA WOYYICHA) - No Year Study Bible →