Ephesians 1

Oromo Bible (WAADAA LAMMATAA) 2013

Jump to: Chapter 2 →

1Ka fedha Rabbiitiin ergamaa Yesuus Kiristoosii ta'e Phaawuloosiin, worra Kiristoos Yesuusitti amantanii, Rabbiif woyyoota taatan ka Efesooniin keessa jirtaniif.

2Rabbi Abbaa keennaa fi Gooftaa Yesuus Kiristoosiin irraa badhaadhaa fi nageenni isiniif haata'u.

3Kiristoosiin keessaan samii irratti eebba sami'ii maraan ka nu eebbise, Rabbi Abbaan Gooftaa keenna Yesuus Kiristoosii haa eebbifamu.

4Uduu adunyaan hin uumamne, afoo isaatitti woyyootaaf worra mudaa hin qabneef jaalalaan akka jiraannuuf karaa Kiristoosiitiin nu filate.

5Akkuma fedha isaa misha'aan nu jaalate, hujii Kiristoos Yesuusiitiin ijoollee isaa akka taanu firrisee murteese.

6Wonti ilma ufii jaalatamaa akkanumaan nuu kenneef akka ulfinni badhadhummaa isaa galateeffamuuf kana godhe.

7Akkuma durummaa Ayyaana Rabbiititti, dhiiga Kiristoosiitiin furamuu, araara cubbuu keennaa arganne.

8Badhaadhaa fi ogummaa sammuu kenna maraa keessatti nuu dhangalaase.

9Akkuma karaa Kiristoosiitiin hojjachuu jaalatetti akka yaada dhossaa fedha isaa wonti nutti beessiseef,

10Bara dhumaa keessa waan godhu'uuf karoorfate, waan ardi'ii fi samii irra jiru maraa, karaa Kiristoosiitiin wolitti qabu'uuf.

11Rabbi waa maraa akka fedha ufiitii fi gorsa ufiititti hojjatu, akkuma duraan murteesse ammallee isaa akka taanuuf karaa Kiristoosiitiin nu filate.

12Kunillee karaa Kiristoosiitiin firrifnee nu worri abdii goone, ulfinna galata isaa akka taanuuf.

13Isinillee akkasuma dubbii dhuga'aa, innillee Oduu Nagayaa keenna ka isin fayyise dhageettanii akkasuma Kiristoositti amantanii Ayyaana abdi'iitiin Ayyaana Woyyu'uun chaappeffamtaniirtan.

14Ayyaanni waan Rabbi banii ufiitiif waadaa gale fudhachuu keenna hin mirkaneessa. Ulfinna Rabbiitiif galata haa galchinuu.

15Kanaafuu anillee akkasuma isin biratti waan ta'uuf waan Gooftaa Yesuus Kiristoositti amanu'uutiif jaalala isin woyyoota maraaf qabdan dhagayee,

16waan keessaniif Rabbiin galateeffata'aa hennaa faateffadhullee, waan keessan qaabachuu hin dhiisu

17Abbaan ulfinnaa Rabbiin Abbaa keenna Yesuus Kirstoosii akka isin isa beettan, Ayyaana Ogumma'aatii fi mudhata akka isinii kennu Rabbiin kadhadha.

18Kunillee ijji qalbii keessanii yoo ifu, abdiin waamicha isaa maal akka ta'u ka woyyoota bira jiru, ulfinna risti'iitiif durummaan maal akka ta'e, nu worra amannuuf hunnaan ka maraa caalu maal akka ta'e akka beettaniif.

20Kiristoosiinillee du'oota keessa yoo kaasu hangafumma'aa fi baalliillee, hunnaaf gooftummaa maraa oliif adunyaa kana callaa irratti uduu hin taane, haata'uu ammoo, adunyaa dhufuufillee, akkasuma ammoo maqaa waamamu maraa maqaa caalu sami'itti mirga ufii hennaa isa kaayu, hujii Kiristoosiin hojjattan jabeenni hunna isaa hin mudhata.

22Waa maraa luka isaa jala galchee maraa olitti mataa godhee Woldaa Kiristaanaatiif kenne.

23Isiinillee ta karaa maraan guutummaa isaa guuttu.

Jump to: Chapter 2 →