Hosea 14

Nigerian Pidgin Bible

← Chapter 13 Jump to:

1Israel pipol, make una turn back kom meet di Oga una God, bikos una sin don make una fall.

2Make una turn kom meet God and pray to am sey: “Make Yu forgive us awa sin kon asept awa prayers, so dat wi go praiz Yu.

3Assyria pipol nor go fit save us and awa shariot nor go fit protet us. Wi nor go ever tell juju again sey, ‘Na yu bi awa god!’ Na Yu God dey save doz wey nor get papa and mama again.”

4So God ansa, “I go bring my pipol kom back to mi. I go love dem with all my heart and I nor go vex for dem again.

5I go bi like dew to Israel pipol. Dem go shine like lily flower kon strong for groun like Lebanon tree.

6Dia branches go spread kom out like fine olive tree. Dem go get good smell like Lebanon trees.

7I go protet dem again. Dem go prosper like betta korn wey dem plant kon fine like grape gardin. Pipol go know dem like di way dem know Lebanon wine.

8Efraim pipol nor go get anytin to do with juju again. I go ansa dia prayers kon kare for dem. I go give dem house like betta green fig tree and na mi go bless dem.”

9Make doz wey dey wise, undastand dis tins. Make doz wey get sense, listin well-well. God ways dey true and e dey rite too and pipol wey dey raitious, dey follow am as dem dey live dia life. But doz wey dey sin, go stagga fall.

← Chapter 13 Jump to: