bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Acts 1
Acts 1
Quechuan (Tayta Diospa Wilakuynin) 2003
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 2 →
1
Tayta Teófilo, punta kaq libruchömi qelqamurqä Jesús lapan rurashqankunata y yachatsishqankunata. Tsaykunata rurarqan y yachatsirqan wilakuyta qalaykushqanpita
2
jana patsaman aywakushqan junaqyaqmi. Jana patsaman manaraq aywakurmi akrashqan apostolninkunata Espíritu Santupa munayninwan tantiyatsirqan imata rurananpaq kashqantapis.
3
Wanushqanpita kawarirkamurmi chusku chunka (40) junaqyaq paykunata yuriparqan. Rasunpa kawaykashqanta criyinanpaqmi tukuynöpa tantiyatsirqan. Tsaynölami Tayta Dios mandaykashqanpitapis shumaq tantiyatsirqan.
4
Apostolninkunawan kaykarmi Jesús kayno nirqan: «Qamkunata wilashqänömi promitishushqaykita Taytä kachamunqa. Tsayta manaraq chaskirqa Jerusalénpita ama aywakäriyraqtsu.
5
Juanqa yakulawanmi bautizarqan. Qamkunami itsanqa Espíritu Santuwan bautizashqa kankipaq. Bautizashqa kanaykipaq walka junaqlanami pishiykan».
6
Jesúswan juntakashqa kaykaqkunami tapupäkurqan kayno nir: «Tayta, ¿kananpitaqa Israel nacionnintsipa mandaqnintsuraq kanki?»
7
Tsayno tapuptinmi Jesús kayno nirqan: «Tsaytaqa manami musyapäkunkimantsu. Imay junaq imay höra tsayno kananpaq kashqantaqa Tayta Dioslami musyan. Paymi munayniyuq kaykan munashqan höra tsayta kamakätsinanpaq.
8
Tsayno kaptinpis Espíritu Santu qamkunaman shamuptinmi poderninta chaskipäkunkipaq. Chaskirkurnami wilakuynïta wilakärinki Jerusaléncho, intëru Judeacho, Samariacho y maytsay markakunachöpis».
9
Tsayno parlayta usharkurmi jana patsapa witsayta qalaykurqan. Rikarpaykaptinmi pukutay tsaparkuptin elqakäkurqan.
10
Jana patsapa nukirpaykaptinmi yoraq röpashqa ishkay runakuna elaqpita yuriparkur
11
kayno nipäkurqan: «Galilea runakuna, ¿imanirtaq jana patsapa rikarpaykanki? Nawpaykikunapita jana patsaman aywakushqannölami Jesús yapay kutimunqa».
12
Tsayno niptinmi Olivos jirkancho kaykashqanpita apostolkuna Jerusalénman kutikärirqan. Tsay jirkanpita Jerusalénmanqa manami aläpa karutsu karqan, sinöqa jamay junaqcho puripäkushqannölami.
13
Chayaykushpannami witsäpäkurqan patsarashqan altusman. Paykunami karqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote nishqan Simón y Santiagupa tsurin Judas.
14
Paykunami Jesúspa maman Maríawan, Jesúspa wawqinkunawan y wakin warmikunawanpis Tayta Diosta manakunanpaq imaypis juntakaq.
15
Tsay junaqkunami Jesúsman yärakuqkuna pachak ishkay chunkano (120) juntarpaykaptin ichirkur Pedro kayno nirqan:
16
«Wawqi panikuna, musyashqantsinöpis Judasmi runakunata pusharqan Jesústa prësu tsaripäkunanpaq. Tsayno kananpaq kashqanta qelqananpaqmi Espíritu Santu rey Davidta tantiyatsirqan. Tsawraqa Judasta pasananpaq kashqanta Tayta Diospa palabran nishqannölami kanan cumplishqa.
17
Judasqa noqakunawanmi purirqan. Paytapis apóstol kananpaqmi Jesús akrarqan».
18
(Jesústa rantikushqan qellayta Judas kutitsishqanwanmi chakrata rantipäkurqan. Judasqa pachanpis pashtaqpaq uray senqaypa jeqaptinmi aqishninpis mashtakarqan.
19
Tsayta musyarmi Jerusaléncho taq runakuna tsay chakrapa jutinta churaparqan Acéldama jutin kananpaq. Paykunapa idiömancho Acéldama ninanqa Yawar Pampa ninanmi.)
20
«Judasta pasananpaq kaqtaqa Salmo librucho kayno nirmi qelqaraykan: « «Wayinpis chunyaq rikakutsun. Tsaycho pipis ama tätsunnatsu». Maspis kaynömi qelqaraykan: «Pay rurananpaq kaqta jukna ruratsun».
21
«Tsayno kaykaptinqa juktana churashun Judaspa trukan apóstol kananpaq. Tsay runa katsun Jesús wilakuyta qalaykushqanpita patsa noqakunawan puriq.
22
Tsaynöpis Jesústa Juan bautizashqanpita patsa jana patsaman kutikushqanyaq qatiraq katsun. Tsay runata churashun noqakunano apóstol kar Jesús kawarimushqanta wilakur purinanpaq».
23
Tsayno niptinmi ishkay runakunata akrapäkurqan. Jukmi karqan Matías. Jukaqnami karqan José. Wakin runakuna Joséta Barsabás nipäkuq y wakinnami Justo nipäkuq.
24
Nirkurmi Tayta Diosta manakur kayno nipäkurqan: «Tayta Dios, qam musyankimi lapan runakunapa shonqun imata yarpashqantapis. Kanan musyaykatsimay mayqantapis akrashqaykita.
25
Akrashqayki runami apostolniki kanqa Judas Iscariotipa trukan. Judasqa jutsata rurarmi nakay patsaman aywakushqa».
26
Tsayno manakurir suertita jitaptinmi Matíaspaq yarqurqan. Matíaswanmi apostolkuna yapay chunka ishkay karqan.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28