bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Acts 28
Acts 28
Quechuan (Tayta Diospa Wilakuynin) 2003
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
1
Lamarpita lapanï yarqurirmi musyapäkurqä Malta islacho karkaykashqäta.
2
Tsaycho taq runakuna alimi chaskipäkamarqan. Tsawraqa tamyar qasaptin ninata ratarkatsir qayapäkamarqan mashakärinäpaq.
3
Pablupis tsaki rämakunata shuntarkur ninaman qaykuykaptinmi ninapita culebra qeshpir makinta amukurkurqan.
4
Pablupa makincho warkaraykaqta rikaykurmi tsaycho taq runakuna kayno nipäkurqan: «¡Kay runaqa wanutsikuq imachari kashqa! Tsaymi lamarpita kawaykar yarqamuptinpis adorashqantsi diösa mana munantsu kawananta».
5
Makinpita ninaman culebrata Pablo tapsiriykuptin picashqan manami imanarqanpistsu.
6
Culebra picashqanwan jakananpaq kashqanta o wanunanpaq kashqantami runakuna yarpapäkurqan. May höra imapis mana pasaptinmi kayno nipäkurqan: «¡Kay runaqa juk dios imachari kaykan!»
7
Tsay mashakurkaykashqä cercanchömi Publio jutiyuq runapa chakrankuna karqan. Publiuqa tsay islacho mas mandaq autoridämi karqan. Noqakunata kimsa junaq patsatsimar alimi rikamarqan.
8
Tsaychömi Publiupa taytan disenteriawan y shanapäkuywan cämacho antsa jitaraykarqan. Tsayman Pablo yaykurir Tayta Diosta manakushpan yataykuptinmi aliyarqan.
9
Tsay runa aliyashqanta musyaykurmi wakin qeshyaykaqkunapis Pabluman shamuptin lapanta aliyätsirqan.
10
Tsayno aliyätsishqanpita agradëcikurmi ali rikapäkamarqan. Tsaypita aywakäriptïnami lapan nistashqäkunata kamaripämarqan.
11
Tamya killakuna pasashqanyaqmi Alejandríapita shamuq büqui tsay islacho ichirarqan. Tsawraqa kimsa killa tsay islacho qoyarkurmi aywakärinäpaq tsay büquiman witsäpäkurqä. Tsay büquipa senqanchömi Cástor y Pólux nishqan diosninkuna laqlaypa dibujashqa kaykarqan.
12
Tsaypita Siracusa markaman chayaykurmi kimsa junaq tsaycho qoyapäkurqä.
13
Siracusapitanami lamar kuchulanpa Regio markayaq aywapäkurqä. Sur kaq lädupita wayrämuptinmi Regiupita ishkay junaqlatana Puteoli markaman chayarqä.
14
Tsaychönami büquipita yarqur wawqikunawan tinkupäkurqä. Paykuna ruwakamaptinmi juk semäna paykunata qoyäparqä. Tsaypitanami chakilapana Romaman aywapäkurqä.
15
Aywarkaykashqäta musyarmi Romacho kaq wakin wawqikuna Foro de Apio markaman taripamarqan. Wakin kaqnami Kimsa Tabernas markacho noqakunata shuyarpämarqan. Paykunata rikaykurmi Tayta Diosta Pablo kushishqa agradëcikurqan.
16
Romaman chayaykuptïnami [capitanqa prësukunata comandantiman entregarqan]. Pablutami itsanqa juk wayiman aparqan tsaycho wichqaränanpaq. Tsaychömi juk soldädu täparqan.
17
Chayashqäpita kimsa junaqtanami Israel mayor runakunata Pablo qayatsirqan. Juntakaykuptinmi kayno nirqan: «Taytakuna, manami Israel mayintsikunatapis ni costumbrintsikunatapis manakaqman churashqätsu. Lutanta imatapis mana ruraykaptïmi Jerusaléncho prësu tsariykamar Roma autoridäkunaman apamashqa.
18
Tsay autoridäkuna juzgamarpis wanutsimänanpaqno ima jutsätapis mana tarirmi kacharimayta munarqan.
19
Israel autoridäkunami itsanqa wanutsimayta munarqan. Tsawraqa manakurqä mandaq César juzgamänanpaq. Tsayno kaptinpis Israel mayintsikunata manami quejätsu.
20
Lapan Israel runakunanölami Tayta Dios promitimashqantsikunaman noqapis criyï. Tsayno criyishqaläpitami wataraykä. Tsayta musyatsinäpaqmi qamkunata qayatsimushqä».
21
Tsayno niptinmi Israel mayor runakuna kayno nipäkurqan: «Imano kashqaykitapis musyanäpaq Judea provinciapita manami ima cartatapis chaskipäkushqätsu. Israel mayintsikunapis kayman chaykamur qampa contrayki manami imatapis rimakärishqatsu.
22
Itsanqa maytsaychöpis runakuna rimarkaykan lutanta yachatsishqaykitami. Tsawraqa imata yachatsishqaykitapis kikïkunami musyayta munapäkü».
23
Tsayno niptinmi juk junaq yapay juntakänanpaq wilanakurqan. Nishqan junaq chayamuptinnami Pablo patsaraykashqan wayiman atska runakuna juntakarqan. Tsawraqa tutapita tardiyaq Tayta Dios mandaykashqanpita Pablo yachatsirqan. Tsaynöpis Moisés qelqashqan leykunata y profëtakuna qelqashqankunata tantiyatsirmi Jesucristo salvamaqnintsi kashqanta yachatsirqan.
24
Tsayno yachatsiptinmi wakin runakuna criyipäkurqan y wakinna mana criyipäkurqantsu.
25
Apänakur aywakärinanpaqna kaykaptinmi Pablo kayno nirqan: «Rasun kaqtami unay ayluntsikunata wilapänanpaq Espíritu Santu profëta Isaíasta tantiyatsirqan kayno nir:
26
« «Aywar tsay runakunata niy: «Mayjina mayashpaykipis manami tantiyapäkunkitsu. Mayjina rikashpaykipis manami cuentata qokärinkitsu».
27
Tsay runakunapa shonqunkuna chukruyashqami karkaykan. Rinrinkunapis upayashqami karkaykan. Nawinkunapis qaprayashqami karkaykan. Tsayno karmi mana rikantsu, mana wiyantsu, mana tantiyakuntsu y jutsankunata mana kacharintsu. Tsayno kaptinmi noqapis mana aliyätsishaqtsu » ».
28
«Isaías nishqannöla qamkunapis kaptikimi mana Israel runakunatana wilapäshaq salvakärinanpaq. Paykunami itsanqa tantiyakärinqa».
29
[Pablo tsayno niptinmi Israel runakuna kikinpura rimanakur aywakärirqan.]
30
Ishkay watami arriendashqan wayicho Pablo tarqan. Tsaymanmi pïmaypis watukuq aywaq.
31
Tsaynöpis Tayta Dios mandaykashqanpita y Señor Jesucristupitami mana mantsakuypa yachatsiq. Yachatsiptin manami pipis michaqtsu.
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28