Ecclesiastes 11

Quechuan (Tayta Diospa Wilakuynin) 2003

← Chapter 10 Jump to: Chapter 12 →

1Tantaykita yakuman jitay. Wara warantinqa tsay jitashqaykita tarinkipaqmi.

2Tsay nishqannöla kashqalanpita pïmaytapis yanapay. Wara warantinkuna imapis pasashuptiki kikikitapis yanapashunkimi.

3Pukutay yanawyayparaq juntaptinqa musyantsimi tamyamunanpaq kashqanta. Yöraqa witsaypa tuniptin o uraypa tuniptinpis musyantsimi tunishqalancho ushakänanpaq kashqanta.

4Tsaki jirka lädupita wayra shamuptinqa musyantsimi manaraq murunantsipaq kashqanta. Lamar lädupita pukutay juntämuptinqa musyantsi manaraq cosechanantsipaq kashqanta.

5Itsanqa manami musyantsitsu wayra maypa aywashqanta, mamanpa pachancho wamra imano rurakashqanta y imaykatapis kamaq Tayta Dios imata rurashqantapis.

6Tsaynöpis manami musyantsitsu punta muruy o qepa muruy mas ali wayunanpaq kashqanta. Capazchari ishkanpis ali wayunqa. Tsayno kaptinqa puntatapis y qepatapis murukushun.

7Atsikyay patsacho kawayqa pasaypa kushikuypaqmi kaykan.

8Atska wata kushishqa kawarpis wanurqa atsikyay patsata manami imaypis rikankipaqnatsu. Manami musyankitsu wanukur imano kanaykipaq kashqantapis.

9Mözukuna, mözu kashqaykiyaq shonquyki munashqanno kushishqa kawapäkuy. Itsanqa tantiyakäriy lapan rurashqaykipita Tayta Dios juzgashunaykipaq kashqanta.

10Mözu kashqaykipis pasaqla kaykaptinqa mana rabyanaypa y jutsata mana ruraypa kawapäkuy.

← Chapter 10 Jump to: Chapter 12 →