Ecclesiastes 6

Quechuan (Tayta Diospa Wilakuynin) 2003

← Chapter 5 Jump to: Chapter 7 →

1Kay patsacho mastapis mana alikunata maytsaychöpis rikashqämi.

2Rikashqä imaykayuqpis kananpaq y respitashqa kananpaq pitapis Tayta Dios yanapashqanta. Tsayno yanapaptinmi imatapis munashqanta tarin. Tsayno tarirpis manami kikinqa probichantsu, sinöqa jäpa runakunami imaykantapis probichan. Tsayqa kaykan pasaypa lakikuypaqmi.

3Aybësis cäsu kanmanmi juk runa pachak (100) tsuriyuq karpis y atska wata kawarpis lakishqala kawashqan y wanuptin shumaq mana pampashqan. Tsay runapaqqa mas alimi kanman karqan manaraq yurir shulu wamrano wanuptin.

4Shuluqa mas alimi kaykan manakaqlapaq kashqa karpis, mana musyakayla pampashqa karpis, jutiynaqla kashqa karpis,

5atsikyay patsata mana rikashqa karpis y imatapis mana musyashqa karpis.

6Tsay runa ishkay waranqa (2,000) wata kawarpis kushishqa mana kawarqa shulupitapis peormi kaykan. Ishkanpis wanukuqlami karkaykan.

7Runaqa pachalanpaqmi waran waran arun. Tsayno kaptinpis nistashqankunaqa manami imaypis ushakantsu.

8Tsaynölami tantiyakuq karpis y mana tantiyakuq karpis, waktsa karpis y rïcu karpis imalatapis nistantsi.

9Tsayno kaykaptinqa imatapis tsararashqantsiwan contentakushun. Tsayqa mas alimi kaykan «kayta wakta tsararäman» nir mana contentakushqantsipitaqa. Tsayno kawarqa wayrata tsariyta munaqnömi kaykantsi.

10Lapan pasashqankunatapis unaypitanami Tayta Dios kamakätsirqan. Imano kanantsipaq kashqantapis Tayta Dios maynami destinarqan. Noqantsipita mas munayniyuq kaykaptinqa yarpashqanno kamakätsishqanpita Tayta Diospa contran ama rimashuntsu.

11Aläpa rimarqa mana conviëniqkunatami rimantsi. Tsayno rimarqa manami imatapis jorquntsitsu.

12Kay patsacho kawashqantsi lantuyno pasaqla kaptin manami pipis musyantsu noqantsipaq ima mas ali kashqanta. Tsaynöpis manami pipis musyantsu wanukuptin kay patsacho ima pasananpaq kashqanta.

← Chapter 5 Jump to: Chapter 7 →