Ecclesiastes 3

Quechuan (Tayta Diospa Wilakuynin) 2003

← Chapter 2 Jump to: Chapter 4 →

1Kay patsachöqa lapanpis tiempuyuqlami kaykan.

2Tayta Diosmi tiemputa kamakätsin yurinantsipaqpis y wanunantsipaqpis. Tiemputa kamakätsin murukunantsipaq y cosechanantsipaq.

3Tiemputa kamakätsin wanutsinantsipaq y jampinantsipaq. Tiemputa kamakätsin juchutsinantsipaq y sharkatsinantsipaq.

4Tiemputa kamakätsin waqanantsipaq y kushikunantsipaq. Tiemputa kamakätsin lütunantsipaq y fiestata ruranantsipaq.

5Tiemputa kamakätsin rumikunata jitanantsipaq y shuntanantsipaq. Tiemputa kamakätsin makalanakunantsipaq y mana makalanakunantsipaq.

6Tiemputa kamakätsin ashinantsipaq y oqranantsipaq. Tiemputa kamakätsin pirwakunantsipaq y jitarinantsipaq.

7Tiemputa kamakätsin rachinantsipaq y shilpanantsipaq. Tiemputa kamakätsin upälakunantsipaq y rimanantsipaq.

8Tiemputa kamakätsin kuyanantsipaq y chikinantsipaq. Tiemputa kamakätsin guërrata ruranantsipaq y guërrata mana ruranantsipaqpis.

9Mayjina arurpis ¿imatataq runa jorqun?

10Tsayno kaptinpis tantiyakushqämi runa arunanpaq Tayta Dios kamakätsishqanta.

11Paymi lapantapis tiempulancho kamakätsin. Tsaynölami Tayta Dios kamakätsishqa mana ushakaq kaway kashqanta tantiyanantsipaq. Tsayno karpis manami tantiyayta atipantsitsu qalaykunanpita ushananyaq Tayta Dios imata rurashqantapis.

12Imano kaptinpis tantiyakushqä alita rurar kushishqa kawashqantsi mas ali kashqantami.

13Tsaynöpis tantiyakushqä arushqantsipita mikur y upur kushishqa kawanantsita Tayta Dios munashqanta.

14Tsaynöpis tantiyakushqä Tayta Dios lapan kamashqankuna imaypis tsaynöla kashqanta. Kamashqankunamanqa manami imatapis yapantsitsu ni tsaypita manami imatapis jorquntsitsu. Tayta Dios lapantapis tsayno kamashqa payta mantsakunantsipaqmi.

15Kanan pasashqannömi unaypis pasarqan. Unay pasashqankunapis yapaymi pasanqa. Puntata kashqanno yapay kananpaqmi Tayta Dios kamakätsin.

16Kay patsacho rikashqämi autoridäkuna shumaq arreglananpa trukan sakyapakur jutsaynaq runapa contran sharkuykaqta.

17Tsaymi shonqulächo kayno nirqä: «Lapanpis tiempuyuqla kaykaptinqa tiempu chayamunqami ali runatapis y fiyu runatapis Tayta Dios juzgananpaq».

18Tsaynöpis shonqulächo kayno yarparqä: «Runakunataqa Tayta Dios tantiyatsin uywakunanöla kashqanta.

19Runapapis y uywapapis tsaylami destïnun kaykan. Lapanpis jämayniyuqkunaqa wanuqlami kaykan. Runapis uywapis ushakaqlami kaykan».

20Wanurqa lapantsipis ushakäshunmi. Lapantsitapis alpalapitami ruramashqantsi. Wanurqa lapantsipis alpamanmi tikrashun.

21¿Piraq musyan runapa alman jana patsaman aywakushqanta y uywapa alman patsa rurinman yaykushqanta?

22¿Piraq musyan shamuq watakunacho imano kananpaq kashqanta? Tsaymi runapaqqa mas ali kaykan arukushqanwan kushishqa kawashqan. Tsayno kushishqa kawashqanmi pägun kaykan.

← Chapter 2 Jump to: Chapter 4 →