Jonah 2

Quechuan (Tayta Diospa Wilakuynin) 2003

← Chapter 1 Jump to: Chapter 3 →

1Tsawraqa pescädupa pachancho kaykarmi Tayta Diosta Jonás kayno manakurqan:

2« Tayta Dios, pasaypa lakikur manakamuptïmi mayamashqanki. Wanunäpaqna kaykar qayakuptïmi salvamashqanki.

3Lamarman jitarpamaptikimi ruriyaq talpukashqä. Lamar fiyupa pulchaqyar shamuqpis janäpami pasashqa.

4Nawpaykipita qarqamashqaykitami yarpashqä. Tsaynöpis yarpashqä sagrädu templuykiman imaypis manana yaykunäpaq kashqantami.

5Yaku pasaypa tsaparämaptinmi lamar rurincho kashqä. Yaku rurincho qewa winamuqpis umämanmi laqakashqa.

6Pasaypa ruriyaqmi chayashqä. Mananami yarqamunäpaq kashqanta yarpashqänatsu. Wanunäpaqna kaykashqäpita qammi salvamashqanki, Tayta Dios.

7Wanunaykarnami qamta manakamushqä, Tayta Dios. Manakamushqätami santu templuykipita mayamashqanki.

8Ïdulukunata adoraqkunaqa Diospa kuyakuyninta wasqipanmi.

9Noqami itsanqa lapan shonqüwan agradëcikur sacrificiukunata qampaq rupatsishaq. Qamta promitishqätaqa lapantami cumplishaq. Qamlami munayniyuq kaykanki pitapis salvanaykipaq».

10Tsaymi Tayta Dios mandaptin pescäduqa lamar kuchunman Jonásta gumitarirqan.

← Chapter 1 Jump to: Chapter 3 →