Jonah 3

Quechuan (Tayta Diospa Wilakuynin) 2003

← Chapter 2 Jump to: Chapter 4 →

1Tsaypitanami Jonásta Tayta Dios yapay kayno nirqan:

2«Nínive jatun markaman aywar noqa nishqäta wilakuy».

3Tsawraqa Tayta Dios nishqanno Nínive jatun markaman Jonás aywarqan. Tsay markataqa kimsa junaqraqmi pipis puriyta ushapäkuq.

4Níniviman chayaykurmi juk junaq qoyayta wilakur Jonás purirqan. Wilakurmi kayno nirqan: «¡Kananpita manaraq chusku chunka (40) junaq kaptinmi kay markata Tayta Dios ushakätsinqa!»

5Tsayno wilakushqanta mayarmi Nínive runakuna criyishpan rïcupis waktsapis qachqa röpata jatikurkur ayunapäkurqan.

6Jonás wilakushqankunata mayaykurmi Nínivicho mandaq reypis qachqa röpata jatikurkur uchpaman jamaykur Tayta Diosta manakurqan.

7Tsaynöpis Nínive runakuna ayunapäkunanpaq autoridäninkunawan wilakatsirqan kayno nir: «Pipis ama mikutsuntsu ni yakutapis ama uputsuntsu. Uywankunata ama mitsikutsuntsu ni yakutapis ama uputsitsuntsu.

8Tsaypa trukanqa lapan runakuna qachqa röpata jatikurkur lapan shonqunwan Tayta Diosta manakäritsun. Tsaynöpis jutsa rurayta y wanutsinakuyta kacharir alina kawapäkutsun.

9Tsayno ruraptintsiqa capazchari Tayta Dios kuyapämashpantsi mananapis ushakätsimashwantsu».

10Nínive runakuna jutsa rurashqanta kachariptinmi ushakätsinanpaq wilakatsishqa kaykarpis Tayta Dios manana ushakätsirqannatsu.

← Chapter 2 Jump to: Chapter 4 →