Jonah 4

Quechuan (Tayta Diospa Wilakuynin) 2003

← Chapter 3 Jump to:

1Nínive runakunata Tayta Dios mana ushakätsiptinmi Jonás pasaypa rabyakurqan.

2Tsaymi Tayta Diosta kayno nirqan: « Tayta Dios, musyämi kuyapäkuq y perdonakuq Dios kashqaykita. Kuyakuq karmi juklaqa mana rabyakunkitsu. «Castigashaq» nirkurpis jutsankunata kachariptinqa manami castigankinatsu. Markächo kaykarmi maliciarqä Nínive runakunata kuyapänaykipaq kashqanta. Tsaymi Tarsisman qeshpir aywakuyta munarqä.

3Wilakarkatsimar mana ushakaykätsirqa jukla shuntakamay. Kay patsacho kawanäpa trukanqa jukla wanuküman».

4Tsayno manakuptinmi Tayta Dios kayno nirqan: «Rabyakushqaykiqa ¿alitsuraq kaykan?»

5Tsaypitami Nínive markapita Jonás aywakurqan inti jeqamunan läduman. Tsaychömi ramädata ruraykur Nínive markata ima pasashqantapis rikananpaq lantuman jamakurqan.

6Tsawraqa Jonás lantukunanpaqmi ramäda jananpa calabäzata Tayta Dios winatsimurqan. Calabäzapa raprankuna shumaq lantupaptinmi Jonás pasaypa kushikurqan.

7Tsayno kaykaptinmi calabäzapa yöranta mikunanpaq jukaqnin tuta shiwrita Tayta Dios yuritsirqan. Mikuptinmi calabäza tsakikäkurqan.

8Tsaypitanami inti jeqamuptin akaq wayrata Jonásman Tayta Dios wayrätsimurqan. Intipa shanayninpis fiyupa umanman chayaptinmi pitirpunanpaq kashqanta Jonás yarparqan. Tsaymi wanuyta munar kayno nirqan: «¡Kawanäpa trukanqa jina wanuküman!»

9Tsawraqa Tayta Dios kayno nirqan: «Calabäza tsakikäkushqanpita rabyakushqayki ¿aliku kaykan?» Tsayno niptinmi Jonás kayno nirqan: «Awmi. Pasaypami rabyanaykä».

10Tsawraqa Tayta Dios kayno nirqan: «Manami qamtsu tsay calabäzata murushqanki ni qamtsu winatsimushqanki. Juk tsakaymi winamushqa y jukaqnin junaqnami tsakikäkushqa. Tsayno kaptinpis tsay calabäzapaq lakikuykanki lantupäshunaykipaq manana kaptinmi.

11Nínive markachöqa pachak ishkay chunka waranqapita (120,000) masmi runakuna karkaykan. Paykunaqa manami musyapäkuntsu ali y mana ali kashqantapis. Tsaymi tsay calabäzapaq lakikushqaykipitapis masraq noqa lakikü Nínive markacho runakunapaq y uywakunapaqpis».

← Chapter 3 Jump to: