bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Matthew 18
Matthew 18
Quechuan (Tayta Diospa Wilakuynin) 2003
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 19 →
1
Juk kutimi discïpulunkuna Jesústa tapurqan kayno nir: «Tayta Dios mandaykashqancho ¿pitaq mas ali rikashqa kanqa, tayta?»
2
Tsaymi juk wamrata nawpanman Jesús qayaykur
3
kayno nirqan: «Rasunpami kayno nï: Wamrano mana karqa manami imaypis Tayta Dios mandaykashqanman yaykapäkunkipaqtsu.
4
Pipis kay wamrano humildi kaqmi Tayta Dios mandaykashqancho mas ali rikashqa kanqa.
5
Tsaynölami kay wamrano kaqkunata noqapa jutïcho pipis chaskirqa noqatapis chaskiykäman.
6
«Pipis noqaman yärakamaq juk wamralatapis jutsata ruratsiptinqa mas alimi kanman mulinu rumita kunkanman wataparkur lamarman qarpuriptinpis.
7
¡Wawalaw, imanöraq kanqa pitapis jutsata ruratsiqkuna! Tsayno runakunaqa kay patsacho imaypis kanqami. Paykunaqa fiyupa castigashqami kanqa.
8
«Tsayno kaptinqa makiki o chakiki jutsata ruratsishuptiki kutsuriykur jitariykuy. Imaypis mana upiq ninaman ishkay chakiyuq o ishkay makiyuq qaykushqa kanaykipa trukanqa mas alimi kanman juk chakiyuqla o juk makiyuqla Tayta Diospa nawpanman chayaptiki.
9
Tsaynöla nawikipis jutsata ruratsishuptikiqa oqtirir jitariykuy. Infiernuman ishkay nawiyuq qaykushqa kanaykipa trukanqa mas alimi kanman juk nawilaykiwanpis Tayta Diospa nawpanman chayaptiki.
10
«Noqa kaynömi nï: Kay wamrakunapa angilninkunami jana patsacho Taytäpa nawpancho imaypis karkaykan. Tsayno kaykaptinqa kay wamrakunata manakaqman ama churapäkuytsu.
11
[ Runapa Tsurin shamushqa oqrakashkunata salvananpaqmi.]
12
«Pipis pachak (100) uyshanpita jukta oqraykurqa ¿manaku wakin kaqta ayluykur jukla ashiq aywan?
13
Tariykurqa isqun chunka isqun (99) uyshankunapaq kushikushqanpitapis masraqmi kushikun.
14
Tsaynölami jana patsacho kaykaq Taytäpis mana munantsu juk wamralapis oqrakänanta.
15
«Yärakuq mayiki rabyanätsishuptikiqa tantiyatsinaykipaq japalanta parlapanki. Chaskishuptikiqa perdonanki.
16
Mana chaskishuptikiqa yapay tantiyatsinaykipaq juk ishkay yärakuq mayikita pushanki. Tsaynöpami ishkay o kimsa testïgu kaptin imata nipäkushqaykitapis mana ñëganqatsu.
17
Paykuna tantiyatsiptinpis mana chaskikuptinqa yärakuq mayikikuna juntakashqancho wilapäkunki tantiyatsipäkunanpaq. Paykuna nishqantapis mana chaskikuptinqa amana tsay runawan juntakankinatsu. Tsaypa trukanqa rikapäkunki mana Israel runatano y impuestu cobraq runatano.
18
«Rasunpami kayno nï: Kay patsacho watashqaykiqa jana patsachöpis watashqami kanqa. Kay patsacho paskashqaykiqa jana patsachöpis paskashqami kanqa.
19
Yapaypis qamkunata kaynömi nï: Ishkaqlapis tsay yarpayla manakäriptikiqa jana patsacho kaykaq Taytä yanapashunkimi.
20
Juk ishkaylapis jutïcho juntakäriptikiqa qamkunawanmi kaykäshaq».
21
Tsayno yachatsiptinmi Jesúsman witiykur Pedro tapurqan kayno nir: «Tayta, yärakuq mayï rabyanätsimaptinqa ¿ayka kutitaq perdonäman? ¿Qanchis kutitsuraq?»
22
Tsaymi Jesús kayno nirqan: «Manami qanchis kutilatsu perdonankiman, sinöqa qanchis chunka (70) kuti qanchispis perdonanki».
23
Tsaypitanami Jesús kayno nirqan: «Tayta Dios mandaykashqan imano kashqantapis wilapäshayki. Juk reyshi ashmayninkunata nirqan jaqan kashqanpita cuentata qonanpaq.
24
Jaqanta pägananpaqshi juk ashmayninta reyman pushapäkurqan. Tsay ashmayqa chunka waranqa (10,000) talentushi jaqan karqan.
25
Jaqanta pägayta mana kamäpakuptinshi yanapaqninkunata tsay rey kayno nirqan: «Qellaynïta tawqanäpaq kay runata, warminta, tsurinkunata y imaykankunatapis rantikäriy».
26
«Tsayno niptinshi ashmayninqa nawpanman qonqurpakuykur kayno ruwakurqan: «Ichiklata shuyaykalämay, tayta. Jaqaykita lapantachari pägaläshayki».
27
«Tsayno ruwakuptinshi tsay rey kuyapashpan lapan jaqanta perdonar mana rantikurqannatsu.
28
«Perdonarkuptin aywaykashqanchöshi tinkurqan jaqan kaq ashmay mayinwan. Tsay ashmay mayinqa pachak (100) denariulashi jaqan karqan. Tsayno kaykaptinpis kunkapita aptakurkurshi kayno nirqan: «¡Jaqäta pägamay!»
29
«Tsayno ruraptinshi qonqurpakuykur ruwakurqan kayno nir: «Ichiklata shuyaykalämay, tayta. Jaqaykita lapantachari pägaläshayki».
30
Tsayno ruwakuptinpis manashi perdonayta munarqantsu. Tsaypa trukanqa jaqanta pägananyaqshi carcilcho wichqarätsirqan.
31
«Tsayno rurashqanta rikaykurshi wakin ashmaykuna carcilcho kaq runata kuyapashpan reyman aywaykur wilapäkurqan ima pasashqantapis.
32
Tsayshi tsay runata qayaykatsir rey kayno nirqan: «¡Mana kuyapäkuq runa! Mayjina jaqä kaykaptikipis ruwakamaptikimi lapanta perdonashqä.
33
¿Imanirtaq qamta kuyapashqäno ashmay mayikita mana kuyapashqankitsu?»
34
Tsawraqa fiyupa rabyakurshi kikintapis carcilman wichqatsirqan. Tsaychöshi wardiakuna castigarqan reypa lapan jaqanta pägashqanyaq».
35
Tsayno wilaparkurmi Jesús kayno nirqan: «Yärakuq mayikita lapan shonquykiwan mana perdonaptikiqa tsaynömi qamkunatapis jana patsacho kaykaq Taytä rurashunki».
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28