bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Numbers 31
Numbers 31
Quechuan (Tayta Diospa Wilakuynin) 2003
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 32 →
1
Moiséstami Tayta Dios kayno nirqan:
2
«Israel runakunata jutsata ruratsishqanpita madianita runakunata ushakätsiy. Tsaypitaraqmi wanushpayki unay ayluykikunawan tinkuq aywakunkipaq».
3
Tsawraqa Israel mayinkunata Moisés kayno nirqan: « Tayta Diosta rabyanätsishqanpita madianita runakunata wanutsiq aywapäkunaykipaq akranakäriy.
4
Cada trïbupita waranqa (1,000) runakuna katsun guërraman aywapäkunanpaq».
5
Tsayno niptinmi cada trïbupita waranqa (1,000) runakunata akrapäkurqan. Tsawraqa guërraman aywapäkunanpaq chunka ishkay waranqa (12,000) runakunami karqan.
6
Tsay runakunatanami Moisés kacharqan guërraman aywapäkunanpaq. Paykunawanmi cüra Eleazarpa tsurin Fineespis aywarqan Tinkuna Sagrädu Toldupita sagrädu manëjukunata y cornëtakunatapis tukananpaq apakurkur.
7
Chayashpanmi Moisésta Tayta Dios nishqannöla madianita runakunata atacar lapan olqu kaqkunata wanutsipäkurqan.
8
Tsaychömi madianita runakunapa pitsqa mandaqnin reykunatapis wanutsipäkurqan. Tsay reykunami karqan Evi, Requem, Zur, Hur y Reba. Tsaynöpis wanutsipäkurqan Beorpa tsurin Balaamta.
9
Nirkurmi madianita runakunapa warminkunata, wamrankunata, uywankunata y imaykankunatapis chanin kaqtaqa apakärirqan.
10
Lapan markankunatapis y wayinkunatapis kanar ushapäkurqan.
11
Nirkurnami runakunapa imaykantapis y uywankunatapis shunta shuntarkur apakärirqan.
12
Lapan tsaykunatami apapäkurqan Moisés, cüra Eleazar y quëdaq Israel mayinkuna kaykashqan kaqman. Tsay witsan Israel runakuna Jericó tsimpan y Jordán mayu nawpan Moab pampachömi tarkaykarqan.
13
Campamentunman manaraq chayatsiptinmi Moisés, cüra Eleazar y Israel runakunapa lapan mandaqninkunapis taripaq aywapäkurqan.
14
Tsay mandaqkunaqa waranqa (1,000) soldädukunapa mandaqninkuna y pachak (100) soldädukunapa mandaqninkunami karqan. Paykunawan tinkurmi Moisés fiyupa rabyakurqan.
15
Tsaymi rabyashpan kayno nirqan: «¿Imanirtaq madianita warmikunataqa mana wanutsipäkushqankitsu?
16
Tsay warmikunami Balaam yätsiptin Israel runakunata pushapäkurqan Baal-peor diosta adorananpaq. Tsaypitami Tayta Dios fiyu qeshyata yuritsiptin noqantsicho atskaq wanupäkurqan.
17
Jukla wanutsipäkuy lapan olqu wamrakunata. Warmikunatapis runawan kakushqa kaqtaqa wanutsipäkuy.
18
Virginlaraq jipashkunata itsanqa apakäriy.
19
«Runakunata wanutsiq soldädukuna y ayata yataq soldädukunaqa qanchis junaqyaq campamentuman mana yaykuylapa juk läducho täkäritsun. Campamentuman yaykunanpaqqa paykunapis, apamushqan jipashkunapis y warmi wamrakunapis kananpita kimsa junaqta purificakur armakäritsun. Tsaynöpis purificashqa kananpaq qanchis junaqcho yapay armakäritsun.
20
Röpankunatapis taqshakäritsun. Tsaynöla purificatsun qarapita rurashqa kaqkunata, cabrapa aqtsanpita awashqa kaqkunata y qerupita laqlashqa manëjukunatapis».
21
Guërrapita kutimuqkunata shuntarkurnami cüra Eleazar kayno nirqan: «Kay leyta cäsukunantsipaqmi Moisésta Tayta Dios kayno nishqa:
22
«Campamentuman qamkuna yaykatsinaykipaqqa imatapis qoripita, qellaypita, fiërrupita, broncipita, estäñupita y plömupita rurashqa kaqkunata
23
ninawan waritsipäkunki. Nirkur purificakuna yakuwan maylapäkunki. Tsaynöpami purificashqana kanqa. Nina rupananpaq kaqkunatami itsanqa yakulawan maylarinki purificashqa kananpaq.
24
Qanchis junaqta cumplirkur purificashqa kanaykipaq röpaykita taqshakärinki. Tsaypitaraqmi qamkuna campamentuman yaykamunkipaq» ».
25
Tsaypitami Moisésta Tayta Dios kayno nirqan:
26
«Madianita runakunapa markankunapita uywakunata warmikunata aykata apapäkamushqantapis musyanaykipaq cüra Eleazarwan y Israel runakunapa mandaqninkunawan yupapäkuy.
27
Tsayno yuparkur pulanpura rakipäkuy. Pulan kanqa guërraman aywaqkunapaq y pulanna kanqa wakin Israel runakunapaq.
28
Guërraman aywaqkunapata noqapaq rakinki cada pitsqa pachak (500) jipashkunapita jukta. Tsaynöpis noqapaq rakinki wäkakunapita, bürrukunapita, uyshakunapita y cabrakunapitapis cada pitsqa pachakpita (500) jukta.
29
Noqapaq rakishqankunata cüra Eleazartana entreganki.
30
«Israel runakunapaq rakishqayki kaqkunatana cada pitsqa chunka (50) jipashkunapita jukta rakinki. Tsaynöpis rakinki wäkakunapita, bürrukunapita, uyshakunapita y cabrakunapitapis cada pitsqa chunkapita jukta. Tsaykunata levitakunaman apapanki. Paykunami täpan Tayta Diospa Sagrädu Toldunta ».
31
Tsayno niptinmi cüra Eleazarwan Moisésqa Tayta Dios nishqanno lapanta rurapäkurqan.
32
Guërraman aywaq runakuna apakamushqan kaqkunaqa karqan soqta pachak qanchis chunka pitsqa waranqa (675,000) cabrantin uyshakuna,
33
qanchis chunka ishkay waranqa (72,000) wäkakuna,
34
soqta chunka juk waranqa (61,000) bürrukuna,
35
y kimsa chunka ishkay waranqa (32,000) virginlaraq jipashkuna.
36
Tsaypita guërraman aywaqkunapaq rakipashqankunaqa karqan kimsa pachak kimsa chunka qanchis waranqa pitsqa pachak (337,500) cabrantin uyshakuna.
37
Tsay rakipashqanpitami Tayta Diospaq entregarqan soqta pachak qanchis chunka pitsqa (675) cabrakunata y uyshakunata.
38
Kimsa chunka soqta waranqa (36,000) wäkakunapita Tayta Diospaq entregarqan qanchis chunka ishkayta (72).
39
Kimsa chunka waranqa pitsqa pachak (30,500) bürrukunapitana Tayta Diospaq entregarqan soqta chunka jukta (61).
40
Chunka soqta waranqa (16,000) jipashkunapitana Tayta Diospaq entregarqan kimsa chunka ishkayta (32).
41
Tayta Dios nishqannölami tsaykunata Moisés entregarqan cüra Eleazarta.
42
Guërraman aywaqkunata rakipashqanpita pulan kaqta Israel mayinkunata Moisés rakipashqankunapis karqan
43
kimsa pachak kimsa chunka qanchis waranqa pitsqa pachak (337,500) cabrantin uyshakuna,
44
kimsa chunka soqta waranqa (36,000) wäkakuna,
45
kimsa chunka waranqa pitsqa pachak (30,500) bürrukuna,
46
y chunka soqta waranqa (16,000) virginlaraq jipashkuna.
47
Tayta Dios nishqannölami cada pitsqa chunka (50) jipashkunapita jukta Moisés rakiparqan levitakunata. Tsaynölami cada pitsqa chunka uywakunapita jukta rakiparqan levitakunata. Paykunami täpapäkun Tayta Diospa Sagrädu Toldunta.
48
Tsaypitami waranqa (1,000) soldädukunapa mandaqninkuna y pachak (100) soldädukunapa mandaqninkuna Moisésta
49
kayno nirqan: «Guërraman pushapäkushqä soldädukunata yupaptï manami juklaylapis pishintsu, tayta.
50
Tsaymi guërracho shuntapäkamushqankunata Tayta Diospaq aparkaykämü qoripita rurashqa brasilëtakunata, pulcërakunata, sortëjakunata, zarcïllukunata y wakin alhäjakunatapis. Tsaykunata aparkaykämü Tayta Dios mana ushakätsimänanpaqmi».
51
Tsayno niptinmi qoripita rurashqa adornukunata Moisés y Eleazar chaskipäkurqan.
52
Waranqa (1,000) soldädupa mandaqninkuna y pachak (100) soldädupa mandaqninkuna Tayta Diospaq apapäkushqan qorimi lasarqan pachak pusaq chunka chusku kïlu (184).
53
Tsay entregashqan qori alhäjakunaqa karqan guërraman aywaq soldädukuna cada ünun apakärishqanpitami.
54
Mandaqkuna apapäkushqan qoripita rurashqa alhäjakunata chaskirkurmi Moisés y Eleazar Tinkuna Tolduman churarqan Israel runakunata Tayta Dios yanapashqanta imaypis yarparänanpaq.
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 32 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36