1 Peter 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Jesucristupa willakuyninta chaskishqana kaykarqa llutan ruraykunata dëjayay. Ama llullakuyaytsu, ama pitapis allish tupäyaytsu, ama chikinakuyaytsu, ni wasarima kayaytsu.

2Llullu wamra alläpa gustapäkur mamanta chuchunqannö llapan shonquykikunawan Tayta Diospa palabranta yachakuyay. Tsaynöpam wamra wiñar tantiyakunqannö Tayta Dios munanqannö kawayänaykipä tantiyakuyanki. Tsaypämi Tayta Dios salvayäshurquyki.

3Tsaynö yachakuyänaykipämi Tayta Dios kuyakuq kanqanta tantiyayarquykina.

4Jesucristuta runakuna mana alli rikayaptinpis cimientuchö maestra ruminö kananpämi Tayta Dios churashqa. Tsaynö kaykaptinqa Jesucristuman yärakuyay.

5Qamkunapis ruminö kayaptikim Tayta Dios churaykäyäshunki templun kayänaykipä y payta sirviq santu sacerdötikuna kayänaykipä. Tsaymi altarman churashqa sacrificiunö kar llapan shonquykikunawan payta sirviyänayki. Jesucristo raykur sirviyanqaykim Tayta Dios munanqannö kanqa.

6Jesucristupämi Tayta Diospa palabran nin: «Siónmanmi cimientupä allinnin rumita churä. Tsay rumiqa akrashqam kaykan. Pipis payman criyikurqa manam manakaqllapätsu criyikunqa».

7Criyikuqkunapäqa Jesucristo kushikuypämi kaykan. Peru mana criyikuqkunapämi sïqa Tayta Diospa palabranchö nin: «Wayi shäritsiqkuna «kay rumiqa manam allitsu» nir jitariyanqanmi maestra rumiman tikrashqa kaykan».

8Mastam nin: «Tinkakätsikuq y ishkitsikuq ruminömi kashä». Jesucristuman mana criyikuqkunaqa Tayta Diospa palabranta mana cäsurmi tsay rumichö tinkakaqnö kaykäyan. Tsaynö kayänanpämi destinashqa kayarqan.

9Peru qamkunam sïqa kaykäyanki Tayta Dios akranqan runakuna, payta sirviq sacerdötikuna, kuyanqan santa nación runakuna y paypa poderninchö kaykaq runakuna. Tsakäpakushqanö kayanqaykipitam aktsinman jipiyäshurquyki kuyakuq kanqanta pïmaytapis willayänaykipä.

10Ñöpataqa manam Diospa wamrantsu kayarquyki. Peru kananmi sïqa wamranna kaykäyanki. Ñöpataqa manam kuyapäyäshurquykitsu. Peru kananmi sïqa kuyapäyäshurquykina.

11Kuyay wawqikuna y panikuna, kay patsachö qorpanölla kayaptikim qamkunata rugä mana alli yarpaynikikunata mana rurayänaykipä. Tsay yarpaynikikunaqa contraykikunam kaykan.

12Jesucristuman mana criyikuqkunawan alli kawayay. Alli kawayanqaykita rikarmi contraykikuna kanan parlarpis Jesucristo kutimunan junaq Tayta Diosta alabayanqa.

13Señor Jesucristuta manakaqman mana churayänanpä llapan mandayäshuqnikikunata cäsuyay nación mandaq rey kaptinpis

14y autoridäkuna kayaptinpis. Autoridäkunatam rey churashqa mana alli ruraqkunata castigayänanpä y alli ruraqkunapa favornin kayänanpä.

15Tayta Diosqa munan allita rurar kawayänaykitam. Tsaynö kawayaptikiqa Diosta mana cäsuq runakuna qamkunapä contraykikuna manam imatapis parlayanqanatsu.

16Munayanqaykinö kawayänaykipä librim kaykäyanki. Librina karpis jutsata ama rurayankitsu, sinöqa Tayta Diosta sirvir pay munanqannö kawayay.

17Llapan runakunata respitayay. Criyikuq mayikikunawan kuyanakuyay. Tayta Diospita mantsapakur kawayay. Reyta respitayay.

18Sirviqkuna, patronnikikuna alli runa kaptinpis o mana alli runa kaptinpis respitar cäsuyanki.

19Tayta Dios munanqannö kawayanqaykipita jutsayuqtanö ñakatsiyäshuptiki ama qallayäyaytsu. Mana qallayaypa kawarqa allitam ruraykäyanki.

20Llutanta rurayanqaykipita ñakarqa ¿ima allitatä ruraykäyanki? Peru allikunata rurayanqaykipita ñakarmi sïqa Tayta Dios munanqannö kawaykäyanki.

21Tsaynö ñakayänaykipämi Tayta Dios qayayäshurquyki. Jesucristo noqantsik raykur ñakashqa kaptinmi musyantsik pay ñakanqannö noqantsikpis ñakanantsikpä kanqanta.

22Payqa manam ima jutsatapis rurarqantsu ni pitapis llullaparqantsu.

23Runakuna ashlliyaptinpis manam imatapis nirqantsu. Ñakatsiyaptinpis manam juraparqantsu, sinöqa pipa favornin mana shäriypa juzgaq Tayta Dios juzgananpämi jaqiskirqan.

24Jesucristo cruzchö ñakarmi noqantsik raykur jutsantsikpita wanurqan. Tsaynö wanurqan noqantsikpis jutsa ruraypä wanur Tayta Dios munanqannö kawanantsikpämi. Yawarninta jicharmi allïtsimarquntsik.

25Ñöpataqa oqrakashqa üshanömi karquntsik. Peru kananmi sïqa Jesucristupana kantsik. Paymi mitsimaqnintsik y alli cuidamaqnintsik.

← Chapter 1 Jump to: Chapter 3 →