1 Peter 5

Quechuan QXO (Biblia en Quechua del sur de Conchucos)

← Chapter 4 Jump to:

1Mayor wawqikuna, noqapis qamkunanö mayor wawqim kä. Jesucristo ñakanqankunatam rikarqü. Jesucristo kutimurmi llapantsiktapis qorikamäshun. Tsaymi qamkunata yätsï:

2Tayta Diosman criyikuqkunata rikayänaykipä churashqa kaykarqa üsha mitsiqkuna üshankunata cuidayanqannö shumaq cuidayay. Qelanaykar cuidayänaykipa rantinqa alli voluntäwan cuidayay. Ama qellaypä raykullaqa cuidayankitsu, sinöqa Tayta Dios munanqannö kushishqa cuidayanki.

3Yaqa patronnöqa criyikuq mayikikunata ama ñakatsiyankitsu, sinöqa allita rurar kawayay paykunapis rikayäshurniki allita rurar kawayänanpä.

4Tsaynö kawarmi pastorkunapa pastornin Jesucristo kutimuptin imayyaqpis mana ushakaq corönata chaskiyanki.

5Jövinkuna, mayor wawqikunata cäsuyay. Llapaykipis mana yachaq tukur respitanakuyay. Yachaq tukuqkunataqa Tayta Dios manam yanapantsu. Peru humildi kaqkunatam sïqa kuyapar yanapan.

6Tsaynö kaykaptinqa poderösu Tayta Diosta cäsur mana yachaq tukur kawayay. Paymi dispöninqan höra chämuptin respitashqa kayänaykipä churayäshunki.

7Tayta Dios yanapaykäyäshuptikiqa llapan llakikuynikikunata paypa poderninman churayay.

8Shumaq tantiyakurnin maya mayalla kawayay. Chikimaqnintsik diabluqa imayka mallaqashqa leonnömi pitapis jutsata ruratsinanpä qayararrä puriykan.

9Criyikuq mayintsikkuna maytsaychöpis qamkunanö ñakayanqanta musyaykarqa Tayta Diosman yärakur diabluta ama cäsuyaytsu.

10Noqantsik raykur Jesucristo wanushqa kaptinmi kuyapäkuq Tayta Dios qayamarquntsik gloriachö imayyaqpis kawanantsikpä. Tsaymi kay patsachö ñakashqapis Tayta Dios yanapamäshun jutsata mana ruranantsikpä, pay munanqannö kawanantsikpä y payman shumaq yärakunantsikpä.

11¡Tayta Dios poderösu kanqanpita imayyaqpis alabashqa kaykullätsun! Amén.

12Wawqintsik Silvanuwanmi kay cartata cartakayämü. Payqa Tayta Dios munanqannömi imaypis kawan. Kay cartächömi qamkunapä qellqamü Tayta Dios kuyapäyäshunqaykita tantiyayänaykipä. Payman imaypis yärakuyay.

13Babiloniachö criyikuq mayintsikkunam saludakayämushunki. Paykunatapis qamkunatanöllam Tayta Dios akrayäshurquyki. Tsaynöllam kuyanqä wawqintsik Marcuspis saludakayämushunki.

14Jukniki juknikipis cäraykikunachö mutsanakur saludanakuyay. Jesucristuchö kaqkuna alli kawaychö kaykuyällay. [Amén.]

← Chapter 4 Jump to: