1 Peter 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Warmikuna, Jesucristupa willakuyninman mana criyiyaptinpis runaykikunata cäsuyay. Tsaynö kawayaptikim mana willaykäyaptikipis tantiyakur criyikuyanqa.

2Kuyayanqaykita y respitayanqaykita rikarmi tantiyakuyanqa.

3Kuyayllapä kayanqaykiqa manam aqtsaykikunata imaykaläyaman naqtsakuyanqaykitsu, qori adornukunata jatikuyanqaykitsu ni pasaypa chaniyuq röpakunata jatikuyanqaykitsu. Tsaykunaqa janaykikunallatam shumaq rikakatsin.

4Tsaypa rantinqa llänu shonqu kayanqayki y pïmaywanpis alli kawayanqaykim kuyayllapäqa kaykan. Tsaynö kawayanqaykim Tayta Diospä mas alli kaykan.

5Tayta Diosman yärakuq unay santa warmikunapis manam adornakuyänallanpätsu yarpachakuyaq, sinöqa runankunapa poderninchö kawayänanpämi.

6Tsaynöllam Sarapis runan Abrahamta cäsur «papä» nir respëtuwan rikarqan. Runakuna chikiyäshuptikipis allita rurarqa Saranömi kaykäyanki.

7Ollqukuna, warmikita imanö kuyayänaykipä shumaq tantiyakuyay. Tayta Dios kuyayäshurnikim warmikikunatapis y qamkunatapis salvayäshurquyki. Warmikiqa delicädu väsunömi kaykan. Tsaynö kaykaptinqa shumaq respitarnin cuidayay. Warmikiwan mana alli kawayaptikiqa mañakuyanqaykitapis Tayta Dios manam wiyayäshunkitsu.

8Llapaykipis juk shonqulla llakipänakur y tsay castanölla kuyanakur pïmaywanpis shumaq kawayay.

9Runa mayikikuna chikiyäshuptikipis ama chikiyaytsu. Ashlliyäshuptikipis ama ashlliyaytsu. Bendicionta chaskiyänaykipä Tayta Dios akrayäshunqaykita musyaykarqa chikishuqnikikunapis bendicionta chaskiyänanpä Tayta Diosta mañakuyay.

10Tayta Diospa palabranmi nin: «Alli kawayta munarqa y kushishqa kawayta munarqa llutankunata ama parlayaytsu. Tsaynölla imaypis ama llullakuyaytsu.

11Llutankunata rurayänaykipa rantinqa allillata rurayay. Rimanakuyänaykipa rantin pïmaywanpis shumaq kawayay.

12Alli ruraqkunataqa Tayta Dios imaypis cuidanmi. Mañakuyanqantapis wiyanmi. Peru mana alli ruraqkunatam sïqa rikaytapis munantsu».

13Allillata ruraykäyaptikiqa ¿pirä mana allita rurayäshunkiman?

14Peru allillata rurayaptikipis ñakatsiyäshuptikiqa Tayta Diosmi yanapayäshunki. Tsaymi pitapis mantsayankitsu ni chikiyäshuptikipis llakikuyankitsu.

15Tsaypa rantinqa Jesucristo mandashuqniki kanqanta tantiyar pay munanqannö kawayanki. Jesucristuman imanir criyikuyanqaykita pipis tapuyäshuptiki tantiyatsiyänaykipä imaypis listu kaykäyay.

16Tantiyatsirqa alli shimillaykikunapa parlapäyay. Tsaynölla runa mayikikunawanpis shumaq kawayay. Tsaynö kawayanqaykita rikarmi wasayki rimaqkunapis penqakuyanqa.

17Llutanta rurayanqaykipita ñakayänaykipa rantin mas allim kanman Tayta Dios munaptinqa allita rurayanqaykipita ñakayaptiki.

18Jesucristupis jutsaynaq kaykarmi jutsasapakuna raykur ñakarqan. Tayta Diosman pushamänantsikpämi jutsantsikpita juk kutilla wanurqan. Wanuptinpis Espíritu Santum kawatsimurqan.

19Espíritu Santupa poderninwanmi prësu wichqaraykaq espïritukunaman willaq aywarqan.

20Tsay espïritukunaqa Noé kawanqan witsan Diosta mana cäsuqmi kayarqan. Tsay witsan runakuna jutsata rurayaptinpis Tayta Dios manam rastsu castigarqan, sinöqa arca rurayta Noé ushanqanyaqmi shuyararqan. Tsay arcaman puwaq runakunallam yaykuyarqan. Paykunallam yaku aynatsiptin diluviupita salvakuyarqan.

21Tsay yakuqa bautizakunqantsik yakunömi. Bautismuqa manam cuerpuntsik limpiu kananpätsu, sinöqa jutsantsikta dëjar Tayta Dios munanqannöna kawanantsikpämi. Tsaymi Jesucristo kawamushqa kaptin salvakuntsik.

22Paymi ciëluman kutir Tayta Diospa derëcha lädunchöna kaykan. Tsaymi angelkunapis y mandakuqkunapis paypa poderninchö kaykäyan.

← Chapter 2 Jump to: Chapter 4 →