2 Thessalonians 3

Quechuan QXO (Biblia en Quechua del sur de Conchucos)

← Chapter 2 Jump to:

1Wawqikuna y panikuna, alli willakuyninta maytsaymanpis chätsiyänäpä Tayta Diosta mañakuyay. Tsaynölla mañakuyay qamkunata willaptï kushishqa chaskikuyanqaykinölla wakin runakunapis chaskikuyänanpä.

2Tsaynölla mana alli runakunapita tsapämänanpä Tayta Diosta mañakuyay. Musyayanqaykinöpis manam llapan runakunatsu Jesucristuman yärakuyan.

3Tayta Diosmi imaypis yanapaykäyäshunki payman yärakuyänaykipä y ima jutsamanpis Satanás mana ishkitsiyäshunaykipä.

4Tayta Dios tsaynö yanapayäshuptikim musyayä yachatsiyanqäta imaypis cäsuyänaykipä kanqanta.

5Tayta Dios yanapaykuyälläshuy pay kuyakuq kanqannö qamkunapis kuyakuq kayänaykipä. Tsaynölla yanapaykuyälläshuy imanö ñakarpis Jesucristunö pacienciakur kawayänaykipä.

6Wawqikuna y panikuna, Señornintsik Jesucristupa jutinchömi qamkunata nï: Yachatsiyanqäta mana cäsukuq qela wawqikunapita y panikunapita witikuyay.

7Musyayankim noqakunata rikayämanqaykinö qamkunapis kawayänaykipä kanqanta. Qamkuna kaqchö kar manam imaypis jitaräkuyarqütsu.

8Debaldillaqa manam mikuyarqütsu, sinöqa mana yarpachakuyänaykipämi paqaspa y junaqpa aruyarqü.

9Apóstol kar yanapayämänaykipä mañakuyänä kaptinpis manam mañakuyarqätsu, tsaypa rantinqa aruyarqä qamkunapis rikayämar arukuyänaykipämi.

10Qamkuna kaqchö kaykar maynam yachatsiyarqä pipis aruyta mana munaptinqa mikuytapis mana qarayänaykipä.

11Tsaynö yachaykätsiyaptïpis ¿imanirtä wakin wawqikuna y panikuna aruyänanpa rantin runa imanö kawanqantapis rikapar puriykäyan?

12Señornintsik Jesucristupa jutinchömi tsaynö kawaq wawqikunata y panikunata nï: Wayin wayin puriyänaykipa rantinqa mikuyänaykipä arukuyay.

13Wawqikuna y panikuna, mana ajayaypa alli kaqkunallata imaypis rurayay.

14Kay cartachö qellqamunqäta mayqanpis mana cäsukuptinqa paywan amana qorikäyaynatsu. Tsaynöpaqa penqakurnin capazchi tantiyakunmanpis.

15Peru ama chikiyaytsu, tsaypa rantinqa wawqikitanö y panikitanö shumaq tantiyatsiyay.

16Ima päsayäshuptikipis alli kawanapä yanapamaqnintsik Tayta Dios alli kawayänaykipä imaypis yanapaykuyälläshuy. Tayta Dios qamkunawan kaykullätsun.

17Kay cartata dictaptï juk qellqashqa kaptinpis ushanantaqa noqa Pablum qellqamurqü. Llapan cartakunqäkunachöpis ushanantaqa kikïmi qellqä.

18Señornintsik Jesucristo kuyapäyäshurniki imaypis yanapaykuyälläshuy. [Amén.]

← Chapter 2 Jump to: