James 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Kuyay wawqikuna y panikuna, poderösu Señornintsik Jesucristuman criyiykarqa llapan runakunata iwal rikashun.

2Qorikäyanqaykiman alli röpashqa y qori sortïjashqa rïcu runa chämuptin y pasaypa makwa röpashqa pobri runa chämuptin

3¿imanirtä rïcu kaqta alli rikar «kay allinnin bancaman jamaykuy» niyanki y pobri kaqtaqa «qamqa qepachö ichiräkuy» o «patsaman jamakuy» niyanki?

4Tsaynö nirqa ¿manaku jukninta alli rikayanki y juknintana mana alli rikayanki? Tsaynö karqa mana alli jueznömi kaykäyanki.

5Kuyay wawqikuna y panikuna, wiyayämay. ¿Manaku Tayta Diosqa pobrikunata akrashqa wakin runakunapita payman mas criyikuyänanpä y mandakuyninchö imayyaqpis kawayänanpä? Tsaynö kawayänanpämi kuyaqninkunata promitirqan.

6Tsaynö kaykaptinpis qamkunaqa pobrikunata mana allim rikaykäyanki. ¿Manaku rïcu runakunaqa munayanqanta ruratsir ñakatsiyäshunki? ¿Manaku maqaraykar juezkunamanpis apatsiyäshunki?

7¿Manaku paykunaqa salvamaqnintsik Jesucristutapis manakaqman churayan?

8Tayta Diospa palabranmi nin: «Kikiki kuyakunqaykinö runa mayikita kuyanki». Tsay leyta rasunpa cumplirqa allitam rurantsik.

9Rïcu runakunata alli rikar y pobrikunata mana alli rikarqa tsay leyta mana cumplirmi jutsata ruraykantsik.

10Mayqanpis «Tayta Diospa llapan leyninkunata cumplïmi» nikar juk mandamientullatapis mana cumplirqa llapanta mana cumpliqnömi kaykäyan.

11Tayta Diospa mandamientunmi nin «ama adulteriu jutsata rurankitsu» y «ama runa mayikita wanutsinkitsu». Tsaynö kaptinqa adulteriu jutsata mana rurarpis runa mayinta wanutsirqa Tayta Diospa leyninkunata manam cumplintsu.

12Tsaynö kaykaptinqa imata parlayänaykipä y imata rurayänaykipäpis shumaq yarpachakuyay. Willakuynin ninqannöllam juiciu finalchö Tayta Dios juzgayäshunki.

13Runa mayikita mana kuyapäyaptikiqa qamkunatapis Tayta Dios manam kuyapäyäshunkitsu. Runa mayikita kuyapäyaptikim sïqa qamkunatapis kuyapäyäshunki.

14Kuyay wawqikuna y panikuna, «Tayta Diosmanmi criyikuykä» nirpis pay munanqannö mana kawashqaqa criyinqantsikpis ¿imapätä välin? Tsaynö kawaq runakunataqa Tayta Dios manam salvanqatsu.

15Tayta Diosman criyikuq mayintsikta röpaynaqta o mallaqaykaqta rikaykar

16mana yanapashqaqa ¿imapätä välin «Tayta Dios yanapaykulläshuy qoñu qoñu kanaykipä y pacha junta mikunaykipä» ninqantsikpis?

17Tsaynöllam runa mayintsikta mana yanapashqaqa Tayta Diosman criyinqantsikpis manakaqllapä.

18Wakin runakunam niyan: «Mana yanapakuq karpis Tayta Diosmanmi criyikü». Tsaynö niyaptinpis noqam nï: Mana yanapakuq karqa manam rasunpatsu Tayta Diosman criyikuyanki. Peru runa mayikita yanaparmi sïqa Tayta Diosman rasunpa criyikuyanki.

19Tayta Dios jukllaylla kanqanta criyiyanqayki alli kaptinpis tsay criyiyanqallaykiwanqa manam salvakuyankitsu. Tayta Dios kanqantaqa supaykunapis criyiyanmi. Tsaynö criyirpis infiernuman qaykushqa kayänanpä kanqanta musyarmi mantsakaywan tsuktsukyäyanrä.

20¡Alläpa upam kayanki! Runa mayikita mana yanapayaptikiqa Tayta Diosman criyiyanqaykipis manakaqllapämi.

21Yarpäshun unay castantsik Abraham imanö kanqanta. Payshi Tayta Diosta cäsur tsurin Isaacta altarchö wanutsinanpä pushanä. Tsaynö cäsuptinshi Tayta Dios payta jutsaynaqtanö chaskinä.

22Tsaynöpam Abraham rasunpa criyinqanta musyantsik.

23Tayta Diospa palabranmi nin: «Tayta Dios ninqanta Abraham criyiptinmi jutsaynaqtana chaskirqan». Tsaynöllam nin Abraham Tayta Diospa amïgun kanqanta.

24Tsaynö kaykaptinqa manam criyikunqallantsikpitatsu Tayta Dios salvamantsik, sinöqa payman criyikurnin allikunata ruranqantsikpitam.

25Tsaynölla yarpäshun prostitüta Rahab imata ruranqantapis. Israel runakuna Jericó markaman rikapakuq chäyaptinshi wayinman pakaykunä. Tsaypitanash Jericó runakuna ashiyaptin jukläpana aywakuyänanpä mandanä. Tsaynö ruranqanpitam paytapis Tayta Dios jutsaynaqtanö chaskirqan.

26Tsaymi allikunata mana rurashqaqa Tayta Diosman criyinqantsikpis manakaqllapä kaykan. Cuerpunpita alma yarquptin runa wanunqannömi criyikuynintsikpis wanushqanö kaykan.

← Chapter 1 Jump to: Chapter 3 →