James 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1¿Imanirtä pelyallar y rimanakullar kawaykäyanki? Tsaynö kaykäyanki shonquykikunachö mana alli yarpay kaptinmi.

2Wakinkuna imaykayuqpis kaqta rikarmi qamkunapis paykunanö kayta munayanki. Tsaymi imaykanöpapis tariyta munar runa mayikitapis wanutsiyanki. Tsaynö rurarpis Tayta Diosta mana mañakurmi munayanqaykita tariyankitsu.

3Manakaqkunachö ushayänaykipä kaptinmi mañakurpis chaskiyankitsu.

4¡Mana cäsukuq jutsasapa runakuna! ¿Manaku musyayanki mana allikunata rurar Tayta Diospa contran kayanqaykita? Pipis mana allikunata rurarqa Tayta Diospa contranmi kaykan.

5¿Manaku criyiyanki Tayta Diospa palabran ninqanta? Tsaychömi nimantsik mana allikunata rurashqa noqantsikman mandamunqan Espíritu Santu rabyakunqanta.

6Peru tsaynö karpis kuyapämantsikmi. Tsaymi palabranchöpis nin: «Yachaq tukuqkunataqa Tayta Dios manam yanapantsu. Peru humildi kaqkunatam sïqa kuyapar yanapan».

7Tsaynö kaykaptinqa mana yachaq tukullar Tayta Dios ninqanta cäsukur diabluta pärapuyay. Pärapuyaptikiqa qeshpirmi aywakunqa.

8Tayta Dioswan imaypis kawayay. Tsaynö kawayaptikiqa paypis qamkunawanmi kaykanqa. ¡Jutsasapakuna! Makikikunata awikuyanqaykinö jutsa ruraykunata dëjayay. Janan shonqulla cäsuyänaykipa rantin llapan shonquykikunawan Tayta Diosta cäsuyay.

9Jutsa rurayanqaykipita pasaypa llakikur waqayay. Asikuyänaykipa rantin waqayay. Kushikuyänaykipa rantin llakikuyay.

10Tayta Diosta cäsur mana yachaq tukur kawayay. Tsaynö kayaptikiqa yanapayäshunkim.

11Wawqikuna y panikuna, mayqaykikunapis ama manakaqman churanakuyaytsu. Pitapis manakaqman churarqa Tayta Dios kuyanakunantsikpä nimanqantsik mandamientutam manakaqman churaykantsik. Tayta Diospa mandamientunqa manam manakaqman churanantsikpätsu, sinöqa cäsunantsikpämi.

12Tayta Diosmi leyninkunata qaramarquntsik. Payllam jutsayuq o jutsaynaq kanqantsikta nimäshun. Payllam salvamänapä o condenamänantsikpäpis poderyuq kaykan. Tsaynö kaykaptinqa ¿pitä qam kanki runa mayikita juzganaykipä?

13Wakikim niyanki: «Waraykuna juklä markapa aywar tsaychö juk wata negociuta rurashun atska qellayta gänamunantsikpä». Tsaynö niqkuna, shumaq wiyayämay.

14Manam musyantsiktsu waraykuna ima päsamänantsikpä kanqantapis. Pukutay yuriskamur illakanqannöllam noqantsikpis illakäshun.

15Tsaynö kaykaptinqa nishun: «Tayta Dios munaptin kawarqa imaykatapis rurashunmi».

16Peru tsaynö niyänaykipa rantinmi imata rurayänaykipäpis alabakuykäyanki. Tsaynö parlayanqayki manam allitsu.

17Allikunata ruranapä kanqanta musyaykar mana rurarqa jutsatam ruraykantsik.

← Chapter 3 Jump to: Chapter 5 →