James 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Kuyay wawqikuna y panikuna, llutankunata yachatsiyaptikiqa Tayta Diosmi juzgayäshunki. Tsaynö kaykaptinqa qorikäyanqaykichö llapayki ama yachatsikuqllaqa kayaytsu.

2Pipis qallunta sujitakurqa jutsaynaqmi kanman. Tsay runaqa cuerpuntapis jutsa ruraypita sujitakunmanmi. Peru qalluntsikta sujitakuyta mana puëdirmi sïqa llapantsikpis jutsata rurantsik.

3Musyanqantsiknöpis caballupa shiminman bozalta churarkurmi munanqantsikpa puritsintsik.

4Jatunkaray büquita vientu apaptinpis ichiklla timunllawanmi manijar munanqanpa apayan.

5Upinaykaq ninapis tsariskirmi muntita rupar ushan. Tsaynöllam qalluntsikpis ichiklla kaykarpis imaykaman jitarpamantsik.

6Parlanqantsikpis imayka ninanömi. Mana allikunata parlarmi alli kawakuq runatapis mana alli kawayman churantsik. Qalluntsik ichiklla kaykarpis dominamashqam mana alli kawantsik. Nina imatapis rupar ushanqannömi mana alli parlanqantsikpis kaykan. Llutankunata parlarqa Satanás munanqantam ruraykantsik.

7Ima ashmatapis runakunaqa manshuyätsiyta yachayanmi: chucaru kaqkunata, päriqkunata, culebrakunata y lamarchö kaqkunatapis.

8Peru qallunkunatam sïqa pipis dominayta puëdiyantsu. Runapa qallunqa chucaru ashmanö y venënunömi.

9Tsay qalluntsikwanmi Tayta Diosta alabantsik y runa mayintsikpa wasantapis rimantsik. Kikin niraqta Tayta Dios kamashqa kaykaptinqa manam tsaynö rimashwantsu.

10Tsay qalluntsikwanmi allita y mana allitapis parlantsik. Kuyay wawqikuna y panikuna, ama tsaynöqa kashuntsu.

11¿Juk pukyullapita pochquq yaku y mishkiq yaku yarqamunmantsurä?

12¿Hïguspis aceitünasta wayunmantsurä? ¿Üvapis hïgusta wayunmantsurä? ¡Manam! Tsaynöllam juk pukyullapita pochquq yaku y mishkiq yaku yarqamuntsu. Tsaynö kaykaptinqa llutankunata parlanantsikpa rantin allillata parlashun.

13Qamkuna kaqchö mayqanpis yachaq y tantiyakuq karqa mana yachaq tukullar allikunata ruratsun. Tsaynö kawaptinrämi yachaq kanqanpis musyakanqa.

14Runa mayinta chikir shonqunchö rabyaparqa ama yarpätsuntsu yachaq kanqanta. Tsaynö alabakurqa manam rasun kaqtatsu parlaykantsik.

15Yachaq tukuyqa manam Tayta Diospitatsu, sinöqa runapa yarpayninpita y Satanáspitam.

16Chikinakur y rabyapänakur kawarqa pasaypa mana allim kawantsik.

17Tayta Dios yachayta qaramashqam sïqa pay munanqannö kawantsik. Tsaymi pïmaywanpis alli kawantsik, kuyanakuntsik, alli shonqu kantsik, kuyapäkuntsik, allikunata imaypis rurantsik, pïmaytapis alli rikantsik y rasun kaqta parlantsik.

18Runa mayintsikwan alli kawanqantsikta rikarmi wakin runakunapis tantiyakuyanqa runa mayinwan alli kawayänanpä. Tsaynöpam llapantsikpis Tayta Dios munanqannö kawashun.

← Chapter 2 Jump to: Chapter 4 →