Philippians 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Jesucristupa poderninchö allim kawaykantsik. Pay kuyamashqam kushishqa kawantsik. Espíritu Santupis noqantsikwanmi imaypis kaykan. Tayta Diosmi tantiyaykätsimantsik llakinakur y kuyanakur kawanantsikpä.

2Tsaynö kaykaptinqa tsay yarpaylla y juk shonqulla imaypis kuyanakur kawayay. Tsaynö kuyanakuyanqaykita musyarmi kushikushä.

3Runa mayikiwan ama chikinakuyaytsu ni yachaq tukuyaytsu, sinöqa pïmaytapis respëtuwan rikayay.

4Kikillaykikuna alli kawayänaykipä yarpachakuyänaykipa rantinqa wakinkunapis alli kawayänanpä yarpachakuyay.

5Jesucristo kawanqannö qamkunapis kawayay.

6Payqa Dios kaykarpis manam ciëlullachötsu täkurqan.

7Poderösu kayninta jaqiskirmi sirviqnölla kananpä noqantsiknö yurirqan.

8Runa karmi Tayta Dios munanqanta rurar cruzchö wanurqan.

9Tsaymi Tayta Dios payta churashqa llapanpitapis mas poderyuq kananpä. Paypa jutintam churarqan llapanpitapis mas poderyuq kaqta.

10Tsaymi ciëluchö kaqkuna, kay patsachö kaqkuna y infiernuchö kaqkunapis Jesucristuman qonqurikuyanqa.

11Tsaychömi pïmaypis niyanqa Jesucristo Señornintsik kanqanta. Tsaynö nirmi Tayta Diosta llapanpis alabayanqa.

12Kuyay wawqikuna y panikuna, tsaynö kaykaptinqa qamkunawan kaykar yachatsinqäkunata cäsuyanqaykinölla karuchö kaptïpis cäsuyämay. Salvashqana kayanqayki musyakänanpäqa Tayta Diospita mantsapakur llapan shonquykikunawan pay munanqannö kawayay.

13Pay munanqannö kawayänaykipämi kikin valuratsiyäshunki y poderta qarayäshunki.

14Manakaqman mana churanakuypa y mana rimanakuypa imaypis kawayay.

15Tsaynö kawayaptikiqa Diospa wamran kayanqaykita tantiyakur manam pipis wasaykita rimanqatsu. Tsaymi mana cäsukuqkunapa markanchö tärarpis tsakaypa aktsi atsikyanqannö kayanki.

16Salvakunantsikpä willakuyta imaypis cäsuyay. Tsaynöpam Jesucristo kutimuptin willakuyninta allipä willakunqäpita pasaypa kushikushä.

17Tsaynö kaptinmi wanutsiyämänan kaptinpis kushikü. Wanutsiyämaptin sacrificiu jananman vïnuta wiñayanqannömi kashä. Tayta Diosta mana ajayaypa sirviyanqaykipis sacrificiunö kaptin qamkunapis kushikuyay.

18Noqa kushikunqänölla qamkunapis kushikuyay.

19Señor Jesucristo permitiptinqa Timoteutam prontu mandamushä. Qamkuna kaqpita kutiykamur imanö kaykäyanqaykita willamaptinmi kushikushä.

20Timoteunöqa manam pipis kantsu. Payllam qamkunapä noqanö yarpachakun.

21Wakinkunaqa Jesucristo munanqanta rurayänanpa rantinmi kikinkuna yarpäyanqallanta rurayan.

22Qamkuna musyayankim Tayta Dios munanqannö Timoteo kawanqanta. Payqa imayka tsurïnömi yanapaykäman Jesucristupa alli willakuyninta willakunäpä.

23Tsaymi prësu kanqäpita yarqamunäpä o mana yarqamunäpä kanqantapis musyaskirrä payta mandamushä.

24Tayta Diosmanmi yärakü wichqaranqäpita yarqaskamur noqapis watukakuq shamunäpä kanqanta.

25Wawqintsik Epafroditutam qamkuna kaqman mandamushä. Kushikuypämi payta mandayämunqayki. Tayta Diospa soldädunnö karmi imanö ñakarpis yanapamashqa.

26Qeshyaptin llakikuyanqaykita musyarmi qamkuna kaqman kutimuyta munaykan.

27Rasunpapis pasaypam qeshyashqa. Wanukunanpäna kaykaptinmi Tayta Dios kuyaparnin allïtsishqa. Tsaynöpam pasaypa mana llakikunäpä noqatapis Tayta Dios kuyapämashqa.

28Tsaymi paywan tinkur kushikuyänaykipä juklla mandamushä. Payta rikaskir kushikuyaptikim noqapis llakikushänatsu.

29Pay chämuptin Señor Jesucristupa jutinchö kushishqa chaskiyanki. Paynö yanapakuqkunataqa llapantapis alli chaskiyay.

30Jesucristuta sirvir qamkunapa trokiki yanapaykämanqanchömi cäsi wanushqa.

← Chapter 1 Jump to: Chapter 3 →