Philippians 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Wawqikuna y panikuna, Tayta Diospa poderninchö kawaykarqa kushikuyay. Noqa manam ajayätsu tsayllata yapay yapay qellqamurpis. Tsaynö qellqamunqä qamkunapä allim.

2Llutan yachatsikuqkunapita cuidakuyay. Tsay allqukunam niyan: «Tayta Dios salvayäshunaykipäqa leyninkunata cumplir cuerpuykikunatarä roqur señalakuyay».

3Cuerpuntsikchö mana señalakurpis Espíritu Santu yanapamashqam Tayta Diosta sirviqkuna shonquntsikchö señalashqana kaykantsik. Tsaynöllam leykunata cumplirrätsu salvakuntsik, sinöqa Jesucristuman yärakurmi.

4Leykunata cumplir salvakunantsik kaptinqa noqapis leykunata cumplir salvakümanmi karqan. Noqanöqa manam pipis leykunata cumplishqatsu.

5Leykuna ninqannöllam yurinqäpita puwaq junaqyuq kaykaptï señalayämarqan. Tsaynöllam Benjamín trïbupita Israel runa kä. Manam mayqan hebreo mayïpis noqanöqa leykunata cumplishqatsu. Fariseo karmi Tayta Diospa leyninkunata imaypis cumplirqä.

6Tayta Dios munanqanta ruranqäta yarparmi Jesucristuman yärakuqkunatapis qatikachaq kä. Tsay leykuna ninqantaqa llapantam cumplirqä.

7Tsaynö cumplinqä llapanpitapis mas alli kanqantam yarparqä. Peru kananmi sïqa noqantsik raykur Jesucristo wanunqanta musyar tsay cumplinqäkuna imapäpis mana välinqanta tantiyä.

8Señornï Jesucristuta reqinqämanqa manam imapis iwalantsu. Tsaymi ñöpata ruranqäkunaman yärakunäpa rantin Jesucristuman yärakü. Ñöpata ruranqäkunaqa manam imapäpis sirvimantsu.

9Manam leyninkunata cumplinqäpitatsu munanqanta ruraqtanö Tayta Dios chaskimashqa, sinöqa Jesucristuman yärakunqäpitam.

10Jesucristutam mas reqiyta munä. Payta Tayta Dios poderninwan kawatsimunqannö noqatapis tsay poderninwan yanapamänantam munä. Tsaymi Jesucristo ñakanqannö ñakarpis y payta wanutsiyanqannö wanutsiyämaptinpis pay cäsukunqannö noqapis cäsukushä.

11Tsaymi shuyaykä Jesucristuta Tayta Dios kawatsimunqannö noqatapis wanuptï kawatsimänanta.

12Manam jutsaynaq ni santu kanqätanatsu nï, sinöqa Jesucristo munanqannö kawanäpämi qoyay qoyay sïguï. Tsaynö kawanäpämi Jesucristo salvamashqa.

13Wawqikuna y panikuna, manam Tayta Dios munanqannötsu llapanta ruraykä. Peru unay kawanqäta yarparänäpa rantinqa qoyay qoyaymi yarpachakü Tayta Dios munanqannö kawanäpä.

14Premiuta chaskinanpä llallinakur cörriqnömi noqapis Tayta Diospa puntanman chänäpä pay munanqannö kawaykä. Tsayman chänäpämi Jesucristo raykur Tayta Dios qayamashqa.

15Jesucristuman firmi yärakuqkuna, ninqäkunata tantiyakuyay. Tantiyayta mana puëdiyaptikim Tayta Dios tantiyatsiyäshunki.

16Peru imanö kaptinpis Jesucristo munanqannölla kawashun [y tsay yarpaylla kashun.]

17Wawqikuna y panikuna, imanö kawanqätapis rikayämay. Noqakuna kawayanqänö kawaqkunapitapis yachakuyay.

18Wakin runakunaqa mana alli kawarmi Jesucristo cruzchö wanunqanta manakaqman churayan. Tsaynö kayanqantam atska kutina qamkunata nirqü. Kananpis waqarmi willaykä.

19Tsay runakunaqa Jesucristo munanqannö kawayänanpa rantin shonqunkuna yarpanqannöllam kawayan. Llutankunata rurayanqanpita penqakuyänanpa rantinmi alabakuyan. Kay patsachö kawayänallanpämi yarpachakuyan. Tsay runakunaqa infiernuman qaykushqam kayanqa.

20Peru noqantsikpa markantsikmi sïqa gloria kaykan. Tsaymi salvamaqnintsik Señor Jesucristo gloriapita kutimunanta shuyaraykantsik.

21Payqa llapanpä poderyuq karmi kay ushakaq cuerpuntsikta mushuq cuerpuman tikratsinqa. Tsay mushuq cuerpuntsikmi kikinpa cuerpunnö mana ushakaq kanqa.

← Chapter 2 Jump to: Chapter 4 →