Zechariah 13

Kiche 1995 (Quiché Bible)

← Chapter 12 Jump to: Chapter 14 →

1“Chupam c'ut ri k'ijol ri' cäjakataj na jun bulbuxalaj ja', rech chupam quecuin wi quequich'aj tak ri qui mac ri e rija'lil ri David xukuje' ri aj Jerusalen.

2Pa ronojel we ulew ri' quinsachisaj na qui wäch xukuje' ri qui bi' tak ri diosib, rech man cätakex ta chic qui nataxic. Xukuje' quebenwesaj na chupam ri ulew ri e k'axal tzij xukuje' ronojel tz'ilalaj uxlabal. In, ri Ajawaxel, quinya' ri nu tzij.

3We c'u ne c'o jachin jun craj cuk'axej tzij, ri kas u tat u nan caquibij na che: ‘¡At kas catcäm na, rumal rech chi are ta cawaj quec'amowax tak ri e a banoj tak tzij ri je ta ne chi are tzijol ri u yo'm ta ri Ajawaxel!’ ¡Kas e are' ri u tat u nan quejulupin na chi ch'ich' aretak cätajin cuban rib chi k'axal tzij!

4Chupam ri k'ijol ri', ri e k'axal tzij queq'uix na chque tak ri e qui c'utwächinic aretak quequik'axej ri nu tzij. Man c'o ta jun casubun ta na cucoj ta ri qui k'u' ri e k'axal tzij ri e re tz'um.

5Xane' chquijujunal caquibij na: ‘In man in ta k'axal tzij, xane' in tajinel. Kas pa ri nu ch'utinal in chacuninak pa ri juyub.’

6We c'u ne c'o jachin cäto'w che: ‘¿Jas c'u wa' chi e socotajic ri e c'o che ri a cuerp?, ri are' cutzelej na u bixic: Xeban chwe pa ri cachoch ri e wachil.’ ”

7Ri Ajawaxel ri c'o ronojel u cuinem cujiquiba' u bixic: “¡Chatwalijok, ch'ich' re ch'o'j, che u banic c'ax che ri wajyuk' xukuje' che ri wachil! ¡Chacämisaj ri ajyuk', are c'u ri jumulaj cujabuj na rib, are c'u ri in quintzelej chi na che qui c'ulelaxic ri alaj ama'ib tak chij!

8Quecäm na quieb roxil ri winak ri e jekel chupam we ulew ri': xuwi cac'asi' canok ri jun roxil chque. Are c'ut we jun roxil ri' ri cacanajic quinban na che chi coc'ow chupam ri k'ak'; quinch'ajch'obirisaj na jacha' ri cäban che ri sak puak, quinpilimarisaj na jacha' ri cäban che ri k'an puak. C'äte c'u ri' ri e are' quetz'onon na chwe, are c'u ri in quinya' na ri caquitz'onoj chwe. ‘Nu tinimit’, quincha' c'u na chque, ri e are' caquitzelej na u bixic: ‘Ri Ajawaxel are' ka Dios.’ In, ri Ajawaxel, quinya' ri nu tzij.”

← Chapter 12 Jump to: Chapter 14 →