Ecclesiastes 1

Kirundi (Bibliya Yera 1951, 1967 (Burundi))

Jump to: Chapter 2 →

1Amajambo y’Umusiguzi, ni we mwene Dawidi, umwami aba i Yerusalemu.

2N’ubusa gusa, ni k’Umusiguzi agize; n’ubusa gusa, vyose n’ubusa.

3Mbeg’ umuntu aronka inyungu ki mu butame bgiwe bgose ubg’ atamira musi y’izuba?

4Urwaruka rumwe ruragenda, rukabisa urundi; isi igahorah’ ibihe vyose.

5Izuba na ryo rikarasa, hanyuma rikarenga, rikihutira gusubira ahantu haryo rizorasira.

6Umuyaga ushira i bumanuko, ugahindura ushira i burārūko; uhindagura akanya kose mu rugendo rwawo, maz’ ugasubira mu gushira irya n’ino kwawo.

7Inzūzi zose zitembera mu kiyaga, yamar’ ikiyaga nticuzura; ahantu inzūzi zija ni ho zama zishishikara.

8Ibintu vyose vyuzuye uburuhe; n’ubg’ umuntu atovuga: ijisho ntirihāga kurāba, n’ugutwi ntiguhāga kwumva.

9Icāhozeho ni co kizobaho, kand’ icākozwe ni co kizokorwa: kandi nta kintu gisha kiriho musi y’izuba.

10Mbega har’ ikintu abantu bavuga, bat’ Ehe rāba, iki ni gisha? Erega kiba carabayeho kera, mu bihe tutaribgabeho.

11Ivy’ ibihe vyahise ntibicibukwa, kand’ ivy’ ibihe bizoza ntibizoba bicibukwa n’abazobikurikira.

12Jewe Umusiguzi nar’ umwami w’Abisirayeli i Yerusalemu.

13Nashize umutima wanje ku kuronderesha ubgenge no kubuserangurisha ibikorerwa musi y’ ijuru vyose: n’umuruho ugoye, Imana yahaye abana b’abantu ng’ ubaruhishe.

14Namaze kubona ibikorwa vyose bikorerwa musi y’izuba; nasanze vyose ar’ ubusa, ar’ uguhahamira umuyaga.

15Ikigoramye ntigishobora kugororwa, kand’ igihaze ntigishobora guharūrwa.

16Nibgiye mu mutima wanje, nt’ Ehe nironkeye ubgenge bginshi kurusha abanyitangiye imbere bose i Yerusalemu: mber’ umutima wanje wiboneye ubgenge bginshi n’ukumenya.

17Kandi nashize umutima wanje ku kumenya ubgenge, no ku kumenya ubujuju n’ubupfu ivy’ ari vyo: na vyo nyene nabonye kw ar’ uguhahamira umuyaga.

18Kuko mu bgenge bginshi harimw’ intuntu nyinshi, kand’ ūgwiza ukumenya aba agwije umubabaro.

Jump to: Chapter 2 →