Psalms 68

Kirundi (Bibliya Yera 1951, 1967 (Burundi))

← Chapter 67 Jump to: Chapter 69 →

1Imana ikūre hasi, abansi bayo basābagire, Kand’ abayanka na bo bahunge bave imbere yayo.

2Nk’uk’ umwotsi utumuka, abe ari k’ubatumura: Nk’ukw ishashara iyagira i ruhande y’umuriro Abe ari kw abanyakibi barandukira imbere y’Imana.

3Arikw abagororotsi ni banezerwe, bavugirize impundu imbere y’Imana: Mbere banezerwe, bagire akanyamuneza.

4Ni muririmbire Imana, muririmbire izina ryayo ishimwe: Muharurire umuharuro Imwe ica mu bugaragwa igendera mu mukogote ukwegwa n’ amafarasi; Izina ryayo ni YA; ni muvugirize impundu imbere yayo.

5Imana ir’ ahayo hēra Ni se w’impfuvyi, n’umucamanza ahagarikira abapfakazi.

6Imana ishira mu ngo abatagira shinge na rugero, Ibohora imbohe, ikaziha kugubga neza: Arikw abagarariji bakaba mu gihugu cumye.

7Mana, hamwe waja imbere y’abantu bawe, Hamwe wagenda mu bugaragwa;.

8Isi yahinze agashitsi, Amajuru ashongera imbere y’Imana: Sinayi uriya uhindira agashitsi imbere y’Imana, ni yo Mana y’Abisirayeli.

9Mana, warekuriye ishamvu yawe imvura y’ubuntu: Wahashubijemw’ intege hamwe hari harushe.

10Abantu bawe bayigerereyemwo: Mana witeguriye umugorwa kubgo kugira neza kwawe.

11Umwami Imana yaravuze: Abagore bakwiza inkuru baba ingabo nyinshi.

12Abami bari kumwe n’ingabo barahunga, barahunga: Umugore asigaye mu rugo ni we agabanganya iminyago.

13Mukiryama mu mpongore z’ intama, amababa y’inuma akayanganakw ifeza, N’amoya yayo akayanganakw izahabu y’umuhondo.

14Hamwe Īshobora vyose yashwiragiriza abami mu gihugu, Shelegi yarikw iragwa kuri Tsalumoni.

15Umusozi w’i Bashani n’umusozi w’Imana, Umusozi w’i Bashani n’umusozi w’udutwe twinshi.

16Mwa misozi miremire, n’iki gituma murābana ishari Umusozi Imana yagomwe ngw iwubeko? Mbere, Uhoraho azowubakw ibihe bidashira.

17Imikogote y’Imana n’ibihumbi cumi, ibihumi cumi, Mbere n’ibihumbi n’ibihumbi: Umwami Imana ari hagati yayo; Sinayi ur’ ahēra ho mu rusengero.

18Uradūze, uja iyo hejuru, ujanye iminyago, Uhērewe ingabire hagati y’ abantu: Mbere uzihērewe hagati y’ abagarariji na bo, kugira ng’ Uhoraho Imana abane na bo.

19Umwami ahimbazwe, atwikorerera umutwaro uko bukeye, Ni we Mana itubera agakiza.

20Imana itubera Imana y’agakiza, idukiza kenshi; Kand’ Uhoraho, Umwami, ni we ashobora gukūra mu rupfu.

21Arikw Imana izomenagura imitwe y’abansi bayo, N’agahanga kamerak’ umushatsi k’umuntu wese ashishikara kugendera mu bimutsindisha.

22Umwami Imana yaravuze, ati Nzobagarukana bave i Bashani, Nzobagarukana bave i bgina mu kiyaga:

23Kugira ng’ ushire ikirenge cawe mu maraso, Kandi ngw indimi z’imbga zawe zihabge imitigiri y’ abansi bawe.

24Mana, bārāvye ingendo yawe, Ingendo y’Imana yanje, ni yo Mwami wanje, yinjira ahēra.

25Abaririmvyi bagiye imbere, abacuraranzi barabakurikira, Hagati y’abigeme bavuza udushako tw’ingoma.

26Muhimbarize Imana mu makoraniro, Ni yo Mwami, yemwe abākomotse kw isōko ari yo Isirayeli.

27Nguriya umuryango wa Benyamini umuhererezi, ni wo ubagaba, Bo n’abaganwa b’aba Yuda n’ingabo zabo, N’abaganwa b’aba Zebuloni, n’abaganwa b’aba Nafutali.

28Imana yawe ikugereye inkomezi, Mana, komeza ivyo wadukoreye;

29Kubg’ urusengero rwawe i Yerusalemu Abami bazokuzanira ingorore.

30Enda ni wāmire ca gikōko co mu rufunzo, N’amapfizi menshi n’inyana zo mu mahanga, Gushitsa aho bazogukomera amashi, bakugororere amafeza: Sābagiza amahanga ahimbarwa n’intambara.

31Abaganwa bazoza bavuye muri Egiputa, Etiyopiya hazokwihutira kurāmvurira Imana amaboko yaho.

32Yemwe bihugu vy’abami bo mw isi, muririmbire Imana; Muririmbire Umwami ishimwe;.

33Ni we agendera kw ijuru ryo hejuru y’amajuru yose, ryamyeho uhereye kera hose: Rāba avuga ijwi, ijwi rihambaye.

34Mwaturire Imana kw ifise ubushobozi, Ubgiza bgayo buri hejuru y’Abisirayeli, Ubushobozi bgayo buri mu bicu.

35Mana, urateye ubgoba ur’ ahēra hawe: Imana y’Abisirayeli ni yo iha abantu bayo inkomezi n’ ubushobozi. Imana ihimbazwe.

← Chapter 67 Jump to: Chapter 69 →