1 Thessalonians 2

Romani Ursari 2018 (Biblia Ande Chib Romani)

← Chapter 1 Jump to: Chapter 3 →

1Phlalalen, tumen llanen kai kana llelam tumende ni cherdamle samo gia.

2Tumen llanen kai omanglal kusle amen ta marde amen ando Filipos ta o Del pomozisarda amen te phena e lachi viasta tromanimaia ta ande iek bari nuzda.

3Soke phenaia o chachipe, ta ni cheralale bilachimaia ta ni te kojava nika.

4A o Del pomozisarda amen ta dia amende o rado te phena e lachi viasta, ta goia si e orba kai da. Ni kamam te ava drago e manusenge, manga te ava drago e Devleke kai llanel sa so si ande amaro lio.

5Tumen llanen kai nikada ni phendam tumenge alava sukar te ava tumenge drago, ta ni kojadam tumen te la tumendar love. Angla o Del phenale tumenge.

6Nikada ni rodiam e llenendar te den amen liubao: ni tumendar ni averendar.

7Amen sai cherdama te acharen kai gazdari pe tumende soke sam apostolura e Kristoke, a cherdilam sargo minone maskar tumende. Sargo iek dei kai bariarel ta arakhel pe minonen,

8isto gia amen voli tumen soke diam tumen e lachi viasta e Devleki, ta sai dia man i amaro zivoto pala tumende.

9Phlalalen, den tumen golli sar radia ta sar trudia amen te la love te zivi. Sorro llive radia te na ava tumenge iek pharipe, ta phenaia tumenge e lachi viasta e Devleki.

10O Del ta i tumen dikhlen kai sa gola ezgode cherdam len chachimaia ta orta tumenchar kai sen e llene kai pachan.

11Tumen llanen kai suakone llenea tumendar sama sargo iek dad pe chaurrenchar,

12ta phendam tumenge te llan sar o Del mangel, vou ikharda tumen te aven ande iek than lea ande leko foro ta ande leko blagosipe.

13Goleke amen da fala e Devle, soke kana asunden e poroka kai andam tumenge lienla sargo e Devleki poroka a na sargo e manusengi. A chachimaia si e poroka e Devleki, soke cherel te achardol pe tumende kai sen llene kai pachan.

14Tumen nakhlen isto so nakhle e llene katar e Devleki khanlliri kai si ande Judea, soke e llene katar tumaro foro cherde tumen te nakhen patnia isto sar e judiura cherde te nakhen patnia e llene katar gola khanllira.

15Gola judiura mundarde e Gazda e Jesuse isto sar omanglal mundarde e profetanen ta tradie amen. E Devleke inai drago sar si von, ta si silne saurrenchar,

16soke ni muken amen te da orba e llenenchar kai inai judiura, te sai braduinpe i von. Golea von cheren te pherdol lengo bilachipe. A o Del ka patil len zurale.

17Phlalalen, kana fuladilam tumendar ta nakhlo o vreme, tumen inai sena dur soke sena ande amaro lio ta zelia te lla te dikha tumen.

18But droma manglam te lla, ta i me o Pablo mangava te llau, a o Satanas ni mukla amen.

19Tumendar adurichara but ta tumen ka aven amari veselia ta amaro baripe angla o Gazda o Jesus kana vou ka irilpe.

20Tumen sen amaro baripe ta amari veselia.

← Chapter 1 Jump to: Chapter 3 →