1 Thessalonians 3

Romani Ursari 2018 (Biblia Ande Chib Romani)

← Chapter 2 Jump to: Chapter 4 →

1Goleke sar nasti terpisardam ios achilam korkorre ande Atenas

2ta bichaldam e Timoteo, vou radil e Devleke te phenel e lachi viasta e Kristoki. Bichala le te pomozil tumen ta te del tumen zor ande tumaro pachape,

3ta te na kojadol niko ande gala nuzde, soke isto tumen llanen kai morabi te nakha gala ezgode.

4Soke kana sama tumenchar phendama tumenge kai ka nakha duk, ta tumen llanen kai gia avilape.

5Goleke me nasti terpisailem ta bichaldem te puchen sar llala tumaro pachape, soke saia mange dar te na zumavel tumen o dusmano ta te jasaol sa amaro rado.

6A o Timoteo irisailo katar e Tesalonika, ta anda amenge lache orbe katar tumaro pachape ta katar o volipe kai si tumen. Phenel amenge kai den tumen golli amendar volimaia, ta kai zelin te dikhen amen isto sar amen zeli te dikha tumen.

7Goleke phlalalen, ande sa amare nuzde ta ande amari duk, liam but zor soke llanglam kai tumen llan orta ande tumaro pachape.

8Akana kai llana kai tumen sen e Devlea, gua del amen mai but zivoto.

9Inai amen alava te da fala e Devle pala tumende ta pala e bari veselia kai si amenge cheres tumende angla o Del.

10Suako llive manga e Devletar te mukel amen te dikha tumen ta te getolpe so trubula tumen ande tumaro pachape.

11Manga katar amaro Del amaro Dad ta amaro Gazda o Jesus te pomozil amen te lla tumende.

12O Del te bariarel tumen ta te cherel te avel tumen mai but volipe maskar tumende ta pe sa e llene, isto sar amen voli tumen.

13Ta te avel tumen zor ande tumare lie, te aven sante te na dosarel tumen niko angla o Del amaro Dad kana ka irilpe amaro Gazda o Jesukristo ta leko santo foro lea. Gia te avelpe.

← Chapter 2 Jump to: Chapter 4 →