James 1

Romani Ursari 2018 (Biblia Ande Chib Romani)

Jump to: Chapter 2 →

1Me o Santiago, kai sem esluga e Devleko ta e Gazdako e Jesukristoko, bichalav salami e desuduie vichenge katar o Israel kai zivin ande sa e phuvia.

2Phlalalen, tumen morabi te aven but vesele kana nakhen patnia pala o Kristo.

3Soke tumen llanen kai kana nakhen patnia, tumaro pachape si thodo ando zumadipe, ta gia tumen sikon te terpin.

4Ta gua terpipe morabi te avel chacho ta te cherel tumen te aven bare ando pachape, ta te na trubul tumen niso.

5Vareko tumendar te trubul le o bizaipe, te mangel le e Devletar, ta vou ka del le o bizaipe. Soke o Del saurren del o bizaipe kana mangenle letar.

6A morabi te mangel pachamaia, ta te na kovliol ando pachape, soke gua kai kovliol ando pachape, si sargo e valura e morake, kai e balav inllarel len pe suako rig.

7A te si vareko gia, te na mislilpe kai ka lel fiso e Gazdatar,

8soke gua lleno kai iek llive mislilpe iek ezgoda, ta aver llive mislilpe aver ezgoda, ni llal orta ande po zivoto.

9Te si maskar tumende iek phlal kai si chorro, morabi te veselilpe soke angla o Del si le liubao;

10a o phlal kai si barvalo, morabi te veselilpe kana o Del ka del le ando lallao, soke o barvalipe si sargo e lulunlla kai si ando vos ta ni zivin but.

11Soke kana likel o kham, tatarel gia zurale, kai cherel te sukon lake patra ta te perel e lulunllin ta te jasarel po sukaripe. Isto gia o barvalo, ni vou ni leko barvalipe ni ka achen ostade.

12Blagosime o lleno kai terpil o zumadipe, soke kana ka terpil le, ka lel e korona e zivotoki kai o Del phenda kai ka del golen kai volin le.

13Kana tumen ka aven ando zumadipe te cheren o bilachipe, na phenen tumen kai sen zumade e Devletar, soke o Del nasti avel zumado e bilachimatar, ta ni zumavel nika.

14Kana amen sam ando zumadipe, gua si soke amare bilache mislura, inllaren amen te pera.

15Ta katar gala bilache mislura avel o bilachipe, ta kana chera o bilachipe, ondaka avel o meripe.

16Phlalalen, na kojadon:

17sogo si lacho ta orta kai si amenge dino, avel upral katar o Del kai cherda e cheraia kai si ando miloso, ta vou nikada ni pharruvel pe mislura.

18O Del mangla te ava leke chave, goleke dia amen zivoto pala o alav o chacho te sai ava sargo e purve katar so vou cherda.

19Phlalalen kai voliv tumen, thoven sama pe gaia orba kai ka phenav tumenge: tumen morabi te asunen avere llenen, a na te joliaon ta te den but orbe.

20Soke gua lleno kai joliaol, ni cherel so si orta angla o Del.

21Goleke, chuden tumendar suako ezgoda pokalime ta o bilachipe kai pe gachin si pe gava sueto. Mai sukar si tumenge te len prostimaia e Devleko alav kai avilo thodo ande tumende, soke goia viasta si la e zor te braduil tumen.

22A inai dosta samo te asunen so phenel o alav o chacho; morabi te cheren so phenel, soke samo te asunen le ta ni kanden le, kojaven isto tumen.

23A o lleno kai samo asunel o alav o chacho ta ni kandel le, si sargo iek lleno kai dikhel po mui pe iek geldala:

24ta samo llaltar bristarelpe sar si leko mui.

25A o lleno kai dikhel, ta thovel sama po zakono o chacho kai mukliarel amen, ta kandel le, ta ni bristarelpe letar, ka avel blagosime ande so cherel.

26Te si vareko maskar tumende kai mislilpe kai si le o pachape o chachuno, a ni gazdaril pe pi chib, isto vou pe kojavel ta leko pachape ni blazil leke niso.

27O pachape chachuno angla o Del o Dad si gava: te pomozi e minonen kai inai len ni dad ni dei; te pomozin e phivlien kana nakhen nuzde, ta te arakhenpe katar o bilachipe kai si ando sueto.

Jump to: Chapter 2 →