James 2

Romani Ursari 2018 (Biblia Ande Chib Romani)

← Chapter 1 Jump to: Chapter 3 →

1Phlalalen, tumen kai pachan ande amaro baro Gazda o Jesukristo, morabi te thoven sama saurrenge.

2Mislin tumen kai iek barvalo lleno avel kote kai sen chidine, furiado ande patave barvalimake ta angrusti sunakuni ande leko nai, ta isto kote avel iek lleno chorro furiado ande patave purane.

3Te avilen mai pachivale e barvalea neko e chorrea, ta phenen e barvaleke: Bes chuke kate kai si e mai lachi estolicha, a e chorreke phenen: Achi kote pe porrne, o bes chuke pe phuv.

4Ondaka tumen isto maskar tumende thoven mai but sama nesave llenenge, ta ka aven sargo ogola kai chinen e kris e llenenge prema sar dikhon.

5Phlalalen, asunen gava: O Del esvirisarda e chorren katar gava sueto te aven barvale ando pachape, ta te len e charoina kai vou ka del golen kai volin le, soke gala si e alava kai vou mukla.

6A tumen, ni thoven sama e chorrenge ¿soke cheren gia lenchar? ¿Ni llanen tumen kai e barvale murzin pe tumende, ta kai von thoven tumen pe kris?

7¿Ni llanen tumen kai e barvale ni den sukar orba katar o Gazda?

8Tumen, te cherden chachimaia so phenel o glamno zakono prema sar phenel ando Pisipe, blago tumenge ka avel. Gua si: Volisar avere sar voli isto tu tut

9A te thoden mai but sama iekheke neko avereke, ondaka cheren o bilachipe ta tumen sen dosale angla o zakono e Devleko.

10Soke vareko te cherel sa so phenel o zakono a ni cherel iek lendar; gua si sargo kana ni kandel ni iek.

11Soke gua kai phenda: Na cheren o kurvaluko i phenda: Na mundaren. A te na chere kurvaluko, a te mundare, tu san iek lleno kai ni chere so phenel o zakono e Devleko.

12Gia morabi te da orba, gia morabi te chera, soke ando llive e krisako o Del ka chinel amenge e kris e zakonoia katar o mukliardipe.

13Soke sa gola kai inai lenge zao pala aver llene, ando llive e krisako, ni e Devleke ni ka avel zao lendar, soke sa gola kai si lenge zalba ka dobin ando llive e krisako.

14Phlalalen, ¿So dobil o lleno kai phenel kai si le pachape ta ni cherel e Devleki buchi? ¿So mislin tumen; gua lleno ka braduilpe samo pala o pachape?

15Te si iek phlal o iek phei kai inai len patave te thoven pe pete, ta inai len so te jan,

16a iek tumendar phenel lenge: llan ande pas; na nakhen sil, jan sogo kamen, a ni del len so trubul len, ¿so mol gole lleneke leko pachape?

17Isto gia o pachape si mulo kana ni cherdol e buchi e Devleki.

18Vareko sai phenel: Tut si pachape, a me cherav e buchi e Devleki. Sikau mange cho pachape bi te chere e buchi e Devleki, a me ka sikavav chuke mo pachape pala e buchi e Devleki kai me cherav.

19Tu pacha kai o Del si iek, sukar chere, i e llavolura pachan, ta izdran daratar.

20Dilea, ¿llane kai kana ni cheren so phenel o zakono e Devleko, o pachape si mulo?

21O Del llinda chacho e Abraame amaro dad, kana dia kurbano pe chaurre e Isaake upral po altar.

22E vera e Abraameki kai saia le ando Del, sikadili ande so cherda, goleke leko pachape lachardol cheres e buchi.

23Ondaka cherdilo so phenel o Pisipe: O Abraam pachaia e Devle, goleke o Del llindale chacho. Ta ikharde e Abraame: amal e Devleko.

24Dikhen, o Del llinel orta e manuse kana o manus cherel so phenel o zakono, a na samo pala o pachape.

25Isto gia e Rahab e kurvichka, o Del llinda la orta pala e buchi kai cherda, soke voi mukla te racharen late e llene kai sea bichalde ta pomozisarda len te nasen katar aver drom.

26Soke sargo iek esnaga kai kana inai la duo si muli, isto gia o pachape kana inai le buchi si mulo.

← Chapter 1 Jump to: Chapter 3 →