John 11

Romani Ursari 2018 (Biblia Ande Chib Romani)

← Chapter 10 Jump to: Chapter 12 →

1Iek lleno kai ikhardola Lasaro saia nasualo, ta vou saia katar e Betania o foro e Mariako ta e Martako kai sea leke pea.

2Goia Maria kai lako phlal saia o Lasaro, saia goia kai jaladaia e Jesukristo e merisoia, ta koslaia leke porrne pe balenchar.

3Ta e dui phea bichalde te phenen e Jesuseke: Gazda, cho amal kai voli si nasualo.

4O Jesus, kana asunda gava, phenda: Gava nasualipe inai merimako, Gava nasualipe si te sikadol e zor e Devlekita ta i leke Chaveki.

5Ta o Jesus volila e Marta, lake phea ta e Lasaro,

6kana phende leke kai o Lasaro saia nasualo, achilo kote kai saia, dui llive ios.

7Mapalal phenda e disipulonenge: Aven pale ande Judea.

8A leke disipulura phende leke: Kovachi, e judiura mangena te mundaren tut e barrenchar, ¿a tu pale mange lla incha?

9O Jesus phenda lenge: ¿Inai e llivese desudui saiata? Ko llal ollivesea, ni perel soke dikhel o villelo gale suetoko.

10A ko llal orachaia, perel, soke inai villelo.

11Mapalal katar gala orbe, phenda lenge: Amaro amal o Lasaro sovel, a me ka llau te llungavav le.

12E disipulura phende leke: Gazda, te sovela, ka sastol.

13A so phenela lenge o Jesus saia kai o Lasaro muloa, a von mislina kai dela lenge orba katar e lindri kana o manus sovel.

14Ondaka o Jesus phenda lenge bristomaia: O Lasaro mulo.

15Ta veseliu man kai me ni sema kote, pala tumende, te sai pachan. Akana aven lete.

16Ondaka o Tomas, kai phenena leke Didimo, phenda e disipulonenge: Aven i amen te mera lea.

17Kana avilo o Jesus, malada kai cherela star llive sar kana o Lasaro saia ando limori.

18Betania saia pasa o Jerusalem preko trin kilometrura,

19ta but katar e judiura avilea kai e Marta ta i e Maria te den len zor cheres lengo phlal.

20Kana e Marta asunda kai avela o Jesus, lleli te malavel le. A e Maria achili ando cher.

21Ondaka e Marta phenda e Jesuseke: Gazda, te avilana kate, mo phlal ni muloa.

22Ta me llanav kai sogo ka mange e Devletar ka del tut.

23O Jesus phenda lake: Cho phlal pale ka zivil.

24E Marta phenda leke: Ea, me llanav kai vou pale ka zivil kana ka usten e mule ando llive mai anglal.

25Ondaka o Jesus phenda lake: Me sem o llundipe ta o zivoto. Ko pachal ande mande, i te avela mulo, ka zivil.

26Ta i kogo zivil ta pachal ande mande, nikada ni ka merel. ¿Pacha gava?

27Voi phenda leke: Ea, me pachau kai tu san o Mesias, o Chavo e Devleko kai saia te avel ando sueto.

28Kana phenda gava, e Marta lleli te ikharel pe phea e Maria, ta phenda lake po chorial: O Kovachi si kate ta ikharel tut.

29Kana e Maria asunda gava ustili oma, ta avili lete.

30O Jesus ni resloia te del ando forichi, vou saia po than kai e Marta maladaia le.

31Kana e judiura kai sea ando cher ta dena la zor, dikhle kai e Maria ustilia oma ta likistia, llele pala late soke mislina kai llala kai o limori te rovel.

32Kana e Maria avili kote kai saia o Jesus, dia changa angla leke porrne, ta phenda leke: Gazda, te avilana kate, mo phlal ni muloa.

33O Jesus kana dikhla kai e Maria rovela ta i e judiura kai avile laia rovena, izdraia ando duo ta tristosailo,

34ta puchla len: ¿Kai thoden le? Von phende leke: Aide ta dik, Gazda.

35Ta o Jesus rovda.

36Ondaka e judiura phende: ¡Dikhen sar volila le!

37Ta nesave lendar phenena: Gava, kai putarda e korreke akha, ¿ni sai cherdaia o Lasaro te na merel?

38O Jesus but tristome, avilo kai o limori. Kai saia ande iek anadipe ta iek pechina ucharela le.

39O Jesus phenda: Ikanen e pechina. E Marta, e phei goleki kai muloa, phenda leke: Gazda, khandel soke cheren star llive kai mulo.

40O Jesus phenda lake: ¿Ni phendem chuke kai te pachaia, ka dikhe e zor e Devleki?

41Ondaka ikande e pechina, ta o Jesus vazdia pe akha upre ta phenda: Dade, dav tut fala soke asundan man.

42Me llanav kai tu suako drom asune man, a phendem le pala o sueto kai si kate, te pachan kai tu bichaldan man.

43Ta kana phenda gava, urkisarda: ¡Lasaro, like avri!

44A o Lasaro kai muloa, likisto, ta leke va ta i leke porrne sea phangle e dorienchar, ta leko soro saia ulime iekhe chitea. Ta o Jesus phenda lenge: Putaren le ta muken le te llaltar.

45A but llene katar e judiura kai avilea e Mariaia pachaie, soke dikhle so cherdaia o Jesus.

46A nesave llene llele kai e fariseura, ta phende lenge so cherdaia o Jesus.

47Ondaka e fariseura ta e mai preche popura chidie e kris, ta phende: ¿So ka chera? Gava lleno cherel but bare ezgode.

48Te mukaia le, sa ka pachan ande lete, ta ka aven e rromanura ta ka zatrisaren amaro cher e Devleko ta amari phuv.

49A iek lleno lendar, kai ikhardola Kaifas kai saia o mai baro popo gua burs, phenda lenge: Tumen ni llanen niso,

50ta ni mislin kai mai lache tumenge te merel samo iek lleno pala o foro, a na te zatrilpe sa amari phuv.

51A o Kaifas ni phenda gaia orba vou petar, soke gua burs vou saia o mai baro popo, ta kana phenda kai o Jesus saia te merel pala e phuv vou phenda iek poroka.

52Ta inai kai o Jesus saia te merel samo pala e judiura, vou mulo i pala sa e chave e Devleke kai si ando sueto.

53Sar kotar die pe orba te mundaren e Jesuse.

54Ta o Jesus llala po chorial katar e judiura, goleke llelotar katar e phuv e Judeaki ta llelo pasa o pusto ande iek foro kai ikhardola Efrain, ta kote achilo pe disipulonenchar.

55Saia pase e Paskua, ta but llene katar e forura llelea ando Jerusalem te sai chistonpe prema o zakono katar o jaladipe mai anglal te avel e Paskua.

56Ta rodena e Jesuse ta puchena iek avere ando cher e Devleko: ¿So mislin tumen? ¿Ka avel pe eslava o iok?

57E fariseura ta e mai preche popura phende kai te llanela vareko kai saia o Jesus te phukavel le te sai phande le.

← Chapter 10 Jump to: Chapter 12 →

Recommended Reading

Commentary John Commentaries → Devotional John Devotional Guide → Get This Bible Romani Ursari (Biblia Ande Chib Romani) Study Bible →