Matthew 26 — Romani Ursari 2018 (Biblia Ande Chib Romani)

7ta avili iek diskinia kai inllarela iek taso alabastroko pherdo meriso kai saia but kuch. Kana o Jesus saia po stali, voi thoda o meriso upral pe leko soro.

8E disipulura, kana dikhle jolaile ta thodepe te phenen: ¿Soke chuden o meriso?

9Gava meriso sai bichindea le pe but love, te pomozilpe gole lovenchar e llenen kai si chorre.

10O Jesus asunda, ta phenda lenge: ¿Soke cheren gia gale diskiniaia? Voi cherda manchar iek lachi ezgoda.

11Soke e chorre ka aven suako llive tumenchar, a me ni ka avav suako llive tumenchar.

12So cherda gaia diskinia, kana chudia pe ma gava meriso, gua si kai voi lacharel man e merimake.

13Chachimaia phenav tumenge kai ande varesavi phuv kana ka phenen gaia lachi viasta, ka den orba i katar so cherda gaia diskinia, ta gia ka denpe golli latar.

14Iek katar e desudui disipulura, kai ikhardola Judas Iskariote, llelo te dikhel e mai preche poponen.

15Ta phenda lenge: ¿Pe gachin mangen te den man, ta me ka dav tumen e Jesuse? Von phende leke pe gachin ka den le: Tranda tolaria rupune.

16Ta kotar angle vou rodela te sai phandel e Jesuse.

17O purvo llive katar e eslava kana jalpe o marrno kai inai le levadura, e disipulura avile pasa o Jesus ta puchle le: ¿Kai mange te lachara e sinia katar e Paskua?

18Vou phenda lenge: Llan ando foro, kai iek lleno ta phenen leke: O Kovachi phenel: Mo vreme si pase, ta llau kai cho cher te nakhav e Paskua me disipulonenchar.

19E disipulura cherde gia sar o Jesus phenda lenge, ta lacharde e sinia katar e Paskua.

20Kana peli e riat, o Jesus saia pe sinia pe desuduie disipulonenchar.

21Ta kana von jana, phenda lenge: Chachimaia phenav tumenge iek tumendar ka bichinel man.

22Von tristosaile but, ta thode te puchen le: Gazda ¿Sem me?

23O Jesus phenda lenge: Gua kai chingarel o marrno isto ande gua charo kai me chingarav, gua ka bichinel man.

24O Chavo e Manuseko morabi te llal po drom kai phenel o Pisipe, a tesko goleke kai bichinel le. Mai sukar avilaia leke te na biandiloia.

25Ondaka o Judas gua kai mangela te bichinel le, puchla le: Gazda, ¿Sai avelpe kai sem me? O Jesus phenda: Tu phendanle, gua phenda leke o Jesus.

26Kana jana, o Jesus lia o marrno ta dia fala e Devle, phagla le ta diale kai e disipulura, ta phenda: Jan, gaia si mi esnaga.

27Mapalal lia iek taso, dia fala e Devle, diale lende ta phenda: Pien saurre katar gava taso,

28gava si mo rat katar o nevo alav, kai chordol pala but llene te sai aven prostime katar o bilachipe.

29A phenav tumenge kai ni ka piau ios katar gaia septelia drakhaki lligo ni ka avel o llive kana ka piau tumenchar e nevi mol ande charoina me Dadeki.

30Kana von llilabie e salmura, lleletar kai o burdo e Maslinkengo,

31Ondaka o Jesus phenda lenge: Sa tumen ka jasaren o pachape ande ma gaia riat. Soke gia si pisime: Ka mundarav e chobano ta e bakre ka aven rispime.

32A kana me ka ustav katar o meripe, ka llau ande Galilea mai oma tumendar.

33O Pedro phenda leke: A sa te jasarena o pachape ande tute, me ni ka jasaraule.

34O Jesus phenda leke: Chachimaia phenav chuke kai isto gaia riat mai anglal te basel o basno ka phene trin droma kai ni pinllare man.

35O Pedro phenda: I te merava tuia, ni ka phenav kai ni pinllarav tut. Ta sa e disipulura phenena isto gia.

36Mapalal o Jesus llelo pe disipulonenchar pe iek rig kai ikhardol Jetsemani, ta phenda lenge: Besen kate, kai me llau te moliv man.

37Ta inllarda pea e Pedro ta e duie chaven e Zebedeoke, ta tristosailo but ta i brigisailo.

38Ondaka o Jesus phenda lenge: Si ande mo zivoto iek zalba merimaki. Achen tumen kate, ta achen llungade manchar.

39Ondaka o Jesus llelo mai angle, bangilo llik te thovel po chikat pe phuv, ta phenda molimaia: Dade, te sai avelpe, le mandar gaia buka cherki, a te na cherdol so me mangav, te cherdol so tu mange.

40O Jesus irisailo oma kote kai sea e disipulura, ta malada len kai sovena ta phenda e Pedroke: ¿Nasti achilen iek saiato llungade manchar?

41Achen llungade ta molintumen, te na peren ando zumadipe. Tumen mangen, a e esnaga inai la zor.

42Pale o duito llelotar, ta molisailo gia: Dade, te nasti lelpe mandar gaia duk kai si te nakhav, te cherdol chi volia.

43Kana irisailo, malada pale kai e disipulura sovena, soke lenge akha phangliona lindratar.

44Mukla len ta llelo te molilpe o trito drom, ta phenda isto gola alava.

45Ondaka irisailo kai sea e disipulura, ta phenda lenge: ¿Pale thoden tumen te soven? Avilo o vreme kai o Chavo e Manuseko ka avel dino ande va e bilachenge.

46Usten, aventar, etalo pase gua kai ka bichinel man.

47O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura ta i katar e phure e foroke.

48O Judas, gua kai phukavela le, phendaia lenge gia: Gole kai me ka chumidau, gua si, phanden le.

49Goleke, kana avilo pasa o Jesus phenda: ¡Lachi chi riat kovachi! Ta chumidia le.

50O Jesus phenda leke: Amala, so avilan te chere, cher le. Ondaka e llene avile pasa le, ta thode o va pe lete ta phangle le.

51Kana nakhena gala ezgode, iek lleno kai saia e Jesusea ikanda po jarni ta chinda o kan katar iek esluga e mai bare popoko.

52O Jesus phenda leke: Guruv cho jarni pe pi rig. Soke sa gola kai marenpe e jarniea isto e jarniea ka meren.

53¿Ni llane kai isto me sai mangav me Dadetar ta vou isto akana sai bichalel mange desudui milie suechura?

54A te cherava gaia ezgoda ¿sar ka cherdon e alava kai si pisime?

55Ondaka o Jesus phenda e llenenge: ¿Soke tumen avilen jarnienchar ta kastenchar te phanden man sargo kana me sem iek chor? Suako llive sikavava ando cher e Devleko ta nikada ni phanglen man.

56A sa gala ezgode nakhen te sai cherdol gia sar phende e poraukura ando Pisipe. Ondaka sa e disipulura mukle korkorre e Jesuse ta nasle.

57Gola kai phanglea e Jesuse inllarde le ando cher e Kaifaseko, o mai baro popo, kote kai e kovacha sikaven o zakono ta e phure sea chidine.

58O Pedro llelo pala lende duratar llik pasa o cher katar o mai baro popo. Nakhlo, ta achilo besindo e llenenchar kai arakhena o cher e Devleko, te sai dikhel so ka avelpe.

59E gazda e poponenge ta sa e mai bari kris rodela varesavi dos ando Jesus te sai mundaren le,

60ta ni malade nisavi dos, a but llene avile pe kris te dosaren le. Pala sa gala ezgode avile ios dui llene,

61kai phenena: Gava manus phenda: Me sai zatriv o cher e Devleko ta sai vazdaule ande trin llive.

62Ondaka o mai baro popo ustilo ta puchla e Jesuse: ¿Ni phene niso? ¿So si gava kai phenen tutar?

63A o Jesus ni phenda niso. Ondaka o mai baro popo phenda leke: Ando anav katar o Del o llundo phenav chuke te phene o chachipe. Phen amenge: San tu o Mesias, o Chavo e Devleko.

64O Jesus phenda leke: Tu phendanle. Ta me phenav tumenge kai tumen ka dikhen e manuseke Chave besindo pe Devleki rig e chachi, ta sar ka avel pe oblakura e milosoke.

65Ondaka o mai baro popo pharrada pe patave te sai llanen kai saia joliariko, ta phenda: ¡Gale alavenchar kusel e Devle! Ia ni trubun ios llene te dosaren le. Tumen asunden gala alava bilache,

66¿So mislin tumen? Von phende: Vou si dosalo, morabi te merel.

67Ondaka chungardie le po mui ta marde le. Aver chalade le po mui,

68ta phenena leke: Tu kai san o Mesias, ¡apogodisar, ko chalada tut!

69O Pedro, saia besindo avri katar o cher. Ondaka iek diskinia esluga avili pasa le ta phenda leke: I tu llaia e Jesusea, gua katar e Galilea.

70A o Pedro angla sa phenda kai ni pinllarela le ta phenda: Me ni llanav savi orba de.

71Mapalal llelotar kai o udar, kote aver diskinia dikhla le ta phenda ogolenge: Gava llala e Jesusea, gua katar o Nazaret.

72Pale o Pedro phenda kai ni pinllarela le, ta jala sovel ta phenela gia: ¡Ni pinllarav gole manuse!

73Mapalal e llene kai sea kote avile pasa o Pedro ta phende leke: O chachipe i tu san iek lendar. I sar de orba achardol chuke.

74Ondaka thoda te jal sovel ta phenela: ¡Me ni pinllarav gole llene! Ondaka isto kote baslo o basno,

75Ondaka o Pedro diape golli so phendaia leke o Jesus: Mai anglal te basel o basno, ka phene trin droma kai ni pinllare man. Ta o Pedro likisto kotar, ta rovda zalbaia.