Romans 3

Romani Ursari 2018 (Biblia Ande Chib Romani)

← Chapter 2 Jump to: Chapter 4 →

1Goleke ¿so mol e manuseke te avel judio? ¿mol la vareso e sirkunsision?

2Ea, pe suako ezgoda, soke mai anglal lende o Del dia pe alava.

3Llana kai nesave judiura ni thode sama katar e Devleke alava, a o Del ni mukla te avel chacho lenchar cheres nesave llene kai ni pachaie.

4Soke i te avena kojamne e manusa, o Del suako drom phenel o chachipe. Ando Pisipe phenel: Ka phenen kai san chacho pe chi orba, Ta kana ka den tut pe kris, tu ka dobi.

5Soke sa o bilachipe kai chera, sikavel kai o Del si chacho kana joliaol ta dukhavel amen ¿a kana dukhavel amen, ka phene kai o Del inai chacho?

6¡iok! O Del te na aviloa chacho, ¿sar sai krisil e sueto?

7Vareko sai mislilpe kai inai sukar te dukhavel le o Del, soke leko kojaipe cherel te dikhol bristomaia o chachipe e Devleko, a te si gia ¿soke akana sem dino pe kris sargo iek bilacho?

8A te avena gala ezgode gia, ondaka sai phena kai sai chera o bilachipe te sai avel o lachipe, gaia si e buna kai ikanen pe mande ta von phenen kai me sikavav gala ezgode.

9¿A so? ¿gaia orba phenel kai amen e judiura sam mai lache neko sa ogola llene? ¡iok! Soke sikadam kai saurre sam bilache, e judiura ta i gola kai inai judiura.

10Soke gia si pisime: ¡Inai ni iek te avel chacho!

11Inai niko te acharel, inai niko te rodel e Devle.

12Saurre lleletar po bilacho drom, Saurre cherdile bilache. ¡Inai niko te cherel o lachipe! ¡Inai ni iek!

13Lengo gurtano si sargo iek limori putardo, lengi chib si kojamni. Pe alavenchar dukhaven sargo iek sap kana dandarel

14Ta lengo mui si pherdo armaia ta zalba.

15But oma joliaon ta vareka mundaren,

16kaigo llan muken zatrania,

17ta ni pinllarde o drom kai si le pas.

18Ni daran e Devletar.

19Llana kai sa so phenel o lil katar o zakono phenel le golenge kai si telal tala o zakono, te sai phangliol suako mui, ta sa o sueto te llanel kai si dosalo angla o Del,

20Soke niko nasti ka avel llindo chacho angla o Del samo soke kandel so phenel o zakono, soke o zakono samo sikavel amenge kai sam bilache.

21A akana bi e zakonoia, o Del sikada amenge sar llinel amen chache, ta sikadale amenge isto e zakonoia ta e profetonenchar.

22O Del llinel chache sa golen kai pachan ando Jesukristo ni chitilpe dal si judiura o inai judiura:

23saurre cherde o bilachipe ta si dur katar o Del.

24A o Del ande po volipe ta llabe llinel amen chache, ta cheres o Kristo Jesus braduisarda amen katar e duk kai saia te la pala amaro bilachipe.

25Goleke o Del bichalda pe Chave te avel amaro kurbano ta te chordol leko rat. A te pachaia kai o Jesus mulo pala amende, o Del ka prostil amen. Gia si sar mangla o Del te sikavel sar llinel amen chache soke prostisarda amen o bilachipe kai cherdam omanglal,

26soke vou mangla te sikavel ande gava vreme po chachipe ta te llinel amen chache gia sar si vou chacho ta llinel chache sa golen kai pachan ando Jesus.

27¿Kai talo akana o baripe e manuseko angla o Del? ¡gua baripe achel mulo! ¿Pala so? ¿Pala o zakono? Iok, pala o pachape.

28Goleke pala sa gala ezgode sai phena: kai o Del llinel chacho e manuse cheres o pachape bi te cherel bucha e zakonoke.

29¿A so o Del si samo o Del e judionengo? ¡iok! o Del si saurrenge, e judionengo ta i golengo kai inai judiura.

30Soke samo iek Del si: O Del kai llinel chache sa golen kai pachan ando Jesukristo ta ni thovel sama dal si judiura o inai judiura.

31A te pachaia ando Jesus galea ni phena kai o zakono ni trubul amen, soke te pachaia ande lete o zakono ios mai mol.

← Chapter 2 Jump to: Chapter 4 →