Psalms 119 — Romani Baltic (Библия - Пэ Балтитко Романи чиб (Романэс) 2019)

1Бахталэ́ исын одолэ́, савэнгиро джиибэ́н исын би дошэнгиро, савэ́ дживэ́на пир Ра́скирэ-Дэвлэ́скиро Зако́но.

2Бахталэ́ исын одолэ́, савэ́ рикирэнапэ кэ Лэ́скирэ допхэныбэна, савэ́ родэ́на Лэс сарэ́ илэ́стыр.

3Ёнэ адя́кэ-паць на кэрэ́на начачипэ́н: ёнэ псирэ́на Лэ́скирэ дромэ́нца.

4Раё Дэ́вла! Ту припхэндян ракхипныткэс тэ ракхэ́н Тырэ́ упхэныбэна́,

5соб (кай) тэ лыджа́н ман мирэ́ дрома́ пир Тырэ́ стату́ты (уставы).

6Тэ́ньци мэ на ява́ва ладжакирдо́, ке́ли мэ ява́ва тэ дыкха́в илэ́стыр пэ Тырэ́ припхэныбэна́.

7Ке́ли мэ уджинава Тыро́ чачипна́скиро сэ́ндо, тэды мэ ява́ва тэ парикира́в Ту́кэ сарэ́ илэ́стыр.

8Мэ ява́ва тэ ракхав Тырэ́ стату́ты: на мэк ман сарэ́са.

9Сыр могинэ́ла тэрно́ ману́ш тэ дживэ́л би дошэнгиро? Ке́ли ёв явэ́ла тэ рикирэлпэ кэ Тыро́ лав.

10Мэ родыём Тут сарэ́ мирэ́ илэ́са: на домэк, соб (кай) мэ тэ псирав кригал Тырэ́ припхэныбнэндыр.

11Мэ гарадём Тыро́ лав дро пэ́скиро ило́, соб (кай) ма́нгэ тэ на кэра́в грэ́хи проти Ту́тэ.

12Тэ шарэ́н зоралэ́с и тэ парикирэ́н Ту́кэ, о Раё Дэ́вла! Сыкля́кир ман Тырэ́ припхэныбнэнгэ.

13Мирэ́ уштэ́нца мэ пхэндём сарэ́нгэ пал сарэ́ чачипэна́, со Ту пхэндя́н.

14Мэ радындёмпэ джиибнастыр пир Тырэ́ нарипирибэна адя́кэ-паць, сыр барэ́ барвалыпнастыр.

15Мэ ява́ва тэ розлав Тырэ́ упхэныбэна́ и мэ ява́ва тэ думинав зоралэ́с пал Тыро́ сыклякирибэ́н.

16Мэ ява́ва тэ бахталёвав Тырэ́ статутэндыр, мэ на бистрава Тыро́ лав.

17Кэр лачхипэ́н Тырэ́ писхари́скэ, соб (кай) ма́нгэ сашты́ тэ явэ́л тэ джива́в, и мэ ява́ва тэ ракхав Тыро́ лав.

18Отпхандэ мирэ́ якха́ и мэ ява́ва тэ дыкха́в ди́вна рэ́нды Тырэ́ Законо́стыр.

19Мэ сом чу́жо ману́ш пэ пхув, на гарав Тырэ́ припхэныбэна́ ма́ндыр.

20Миро ди пхарадёла барэ́ патыва́са кэ Тыро́ чачипэ́н дывэсэ́ и раты́.

21Ту сыкадян банг пхутькирдэнгэ, Ту прокосцян одолэ́н, кон гия́ дрэ риг Тырэ́ припхэныбнэндыр.

22Лэ криг ма́ндыр банг и ладж, пал-дова́ со мэ приракхцём Тыро́ пририпирибэн.

23Тхага́рья (кня́зи) адя́кэ-паць бэшнэ́ и ракирэ́на пэ ма́ндэ, нэ Тыро́ писха́ри розлэла Тырэ́ зако́ны.

24Тыро́ пририпирибэн адя́кэ-паць радынэла ман и дэ́ла годыпэ́н ма́нгэ.

25Миро ди пририкирдо зоралэ́с кэ пра́хо; джидякир ман пир Тыро́ лав.

26Мэ пхэндём анги́л сарэ́ндэ, со мэ кэрдём и Ту отпхэндян ма́нгэ.

27Кэр, соб (кай) мэ тэ ґалёвав Тырэ́ упхэныбэна́ и мэ ява́ва тэ розлав Тырэ́ ди́вна бутя́.

28Миро ди калёла, зораля́кир ман Тырэ́ лавэ́са.

29Лэ криг ма́ндыр хохаибэ́н и сыка́в Тыри́ ла́ска пир Тыро́ Зако́но.

30Мэ выкэдыём чачипна́скиро дром, и мэ рискирдём годы́ кэ Тыро́ чачипэ́н.

31Мэ пририкиравпэ кэ Тыро́ допхэныбэ́н, о Раё Дэ́вла, на ладжакир ман.

32Мэ прастава дромэ́са пир Тырэ́ припхэныбэна́, ке́ли Ту дыя́н зор мирэ́ илэскэ.

33Сыкля́кир ман, Раё Дэ́вла, Тырэ́ стату́ты, и мэ ява́ва тэ рискирав годы́ кэ ёнэ кэ (ко́нцо) яго́ро.

34Кэр, соб (кай) мэ тэ ґалёвав лэн и мэ ява́ва тэ рикиравпэ зоралэ́с кэ Тыро́ Зако́но и мэ ява́ва тэ приракхав лэс сарэ́ мирэ́ илэ́са.

35Кэр, соб (кай) мэ тэ псирав дромэ́са пир Тырэ́ припхэныбэна́, пал-дова́ со лэ́ндыр мэ бахталёвава.

36Бандякир миро ило́ кэ Тыро́ нарипирибэн, а на кэ ґалкима.

37Ри́скир мирэ́ якха́ тэ на дыкха́в ма́нгэ пэ хартытка (фальшыва) рэ́нды, дэ ма́нгэ джиибэ́н тэ джав Тырэ́ дромэ́са.

38Дэ зор Тырэ́ лавэ́скэ ваш Тырэ́ писхари́скэ, лав, саво́ сыс дыно́ одолэ́нгэ, савэ́ дарэ́на Ту́тыр.

39Ри́скир криг ма́ндыр мири́ ладж, савья́тыр мэ дарава, пал-дова́ со Тыро́ сэ́ндо исын чачуно́.

40Ѓа́да, мэ тырдавапэ кэ Тырэ́ упхэныбэна́, дэ ма́нгэ джиибэ́н пир Тыро́ чачипэ́н.

41Мэк тэ явэ́л кэ мэ Тыри́ лачхэ́-илы́ткима, Раё Дэ́вла, зра́кх ман пир Тыро́ лав.

42И мэ отпхэнава одолэ́скэ, кон обракирэла ман, пал-дова́ со мэ зоралэ́с патя́ва Тырэ́ лавэ́скэ.

43На отлэ сарэ́са чачипна́скиро лав мирэ́ мо́стыр, пал-дова́ со мэ древа́н ужакирдём лачхипэ́н Тырэ́ сэндостыр.

44И мэ ўса́ды (сак) ява́ва тэ ракхав Тыро́ Зако́но и пэ сарэ́ ве́ки.

45И мэ ўса́ды (сак) ява́ва тэ псирав пир во́ля, пал-дова́ со мэ родава Тырэ́ упхэныбэна́.

46И мэ ява́ва тэ ракира́в пал Тырэ́ досыкаибэна анги́л кралье́ндэ, и мэ на ява́ва ладжакирдо́.

47И мэ ява́ва тэ бахталёвав Тырэ́ припхэныбнэндыр, савэ́ ячнэ́.

48И мэ ґазда́ва пэ́скирэ васта́ кэ Тырэ́ припхэныбэна́, савэ́ исын дро́га ма́нгэ, и мэ ява́ва тэ розлав Тырэ́ стату́ты.

49Ри́пир Тыро́ лав ваш Тырэ́ писхари́скэ, саво́ Ту дыя́н ма́нгэ тэ ужакирав лачхипэ́н.

50Дава́ подрикирэ́ла ман, ке́ли ман притасавэ́на, пал-дова́ со Тыро́ лав дэ́ла джиибэ́н ма́нгэ.

51Пхутькирдэ́ джинэ́ холямэ́с санапэ би меракиро, нэ мэ на рисиём дрэ риг Тырэ́ Законо́стыр.

52Мэ рипирава Тырэ́ сэнды ґаратунэ́ бэршэ́ндыр, о Раё Дэ́вла, адя́кэ мэ подрикирава пэс.

53Холякири зор лэ́ла упралыпэ́н пэ ма́ндэ, ке́ли мэ дыкха́ва, сыр фуй мануша́ мэкэ́на Тыро́ Зако́но.

54Пал Тырэ́ стату́ты мэ багава гиля́ дро кхэр, пашы́л саво́ мэ лодава.

55Мэ рипиравас Тыро́ лав раты́, о, Раё Дэ́вла, и мэ ракхцём Тыро́ Зако́но.

56Дава́ исын дыно́ ма́нгэ, соб (кай) мэ тэ рикиравпэ зоралэ́с кэ Тырэ́ припхэныбэна́.

57Мири́ до́ля Ту́тыр, о Раё Дэ́вла, сыр мэ пхэндём, исын дро дова́, соб (кай) ма́нгэ тэ рикиравпэ зоралэ́с кэ Тырэ́ лава́.

58Мэ родыём Тыри́ ла́ска сарэ́ мирэ́ илэ́са: яв лачхэ́-дескиро кэ мэ пир Тыро́ лав.

59Мэ роздуминдём хор пал дова́, сыр мэ дживавас и мэ рискирдём миро пиро́ (стопа) кэ Тырэ́ досыкаибэна.

60Мэ стариндёмпэ сыгэды́р, соб (кай) ма́нгэ тэ на отчхував дурэды́р тэ сполнинав Тырэ́ припхэныбэна́.

61Фуй мануша́ сы́рбы шэлэнца обпхандлэ́ трусця́л ман, нэ мэ на бистырдём Тыро́ Зако́но.

62Дрэ пашрат мэ уштава тэ парикира́в Ту́кэ пал Тыро́ чачуно́ сэ́ндо.

63Мэ сом дру́го (мал) сарэ́нгэ, кон дарэ́ла Ту́тыр, и кодолэ́нгэ, савэ́ рикирэнапэ кэ Тырэ́ упхэныбэна́.

64О, Раё Дэ́вла! Пхув исын пхэрды́ Тырэ́ дрогонэ́ лачхипна́са: сыкля́кир Ман Тырэ́ статутэнгэ.

65Ту кэрдя́н лачхипэ́н Тырэ́ писхари́скэ, о Раё Дэ́вла, пир Тыро́ лав.

66Сыкля́кир ман кучэс тэ сэндякирав пир Тыро́, пал-дова́ со мэ патя́ва Тырэ́ припхэныбнэнгэ.

67Анги́л дова́, сыр Ту притасадян ман, мэ хохадёмпэ, нэ какана́ мэ ракхава Тыро́ лав.

68Ту сан лачхо́ и кэрэ́са лачхипэ́н, сыкля́кир ман Тырэ́ статутэ́нгэ.

69Пхутькирдэ́ пэфроми хохадэ пэ ма́ндэ: мэ ж ява́ва тэ рикиравпэ кэ Тырэ́ упхэныбэна́ сарэ́ мирэ́ илэ́стыр.

70Лэ́нгиро ило́ исын тхуло, на шунэ́ла нисо́, нэ ма́нгэ исын древа́н дро́го Тыро́ Зако́но.

71Ту пририкирдян ман ваш миро лачхипэ́н, соб (кай) ма́нгэ тэ высыклёвав Тырэ́ стату́ты.

72Тыро́ Зако́но исын бут фэды́р ма́нгэ, сыр бара́ котэра́ сувнака́стыр ци рупэ́стыр.

73Тырэ́ васта́ создынэ ман и чхудэ́ ман, дэ ма́нгэ годы́ тэ сыклёвав Тырэ́ припхэныбнэнгэ.

74Одолэ́, савэ́ дарэ́на Ту́тыр, явэ́на зоралэ́с тэ радынэ́нпэ, сыр дыкхэ́на ман, пал-дова́ со мэ ужакирава лачхипэ́н Тырэ́ лавэ́стыр.

75Мэ джино́м (джина́в), о Раё Дэ́вла, со Тыро́ сэ́ндо исын чачуно́, и со Ту тасадян ман пир Тыро́ чачипэ́н.

76Мэк тэ явэ́л Тыри́ лачхэ́-илы́ткима тэ подрикирэ́л ман, Тырэ́ писхари́с, пир Тыро́ лав.

77Мэк тэ явэ́л кэ мэ Тыри́ лачхэ́-илы́ткима, соб (кай) мэ могинавас тэ джива́в, пал-дова́ со мэ бахталёвава Тырэ́ Законо́стыр.

78Мэк пхутькирдэ́ тэ явэ́н ладжакирдэ́, пал-дова́ со ёнэ пэфроми кэрдэ́ хохаибэ́н пэ ма́ндэ: нэ мэ ж ява́ва тэ розлав Тырэ́ упхэныбэна́.

79Мэк одолэ́, савэ́ дарэ́на Ту́тыр, тэ явэ́н кэ мэ, и сарэ́ одолэ́, кон джинэ́ла Тырэ́ досыкаибэна.

80Мэк тэ явэ́л миро ило́ бидошэ́нгиро дрэ Тырэ́ стату́ты, соб (кай) ма́нгэ тэ на явэ́л ладжаво.

81Миро ди мулёла пал Тыро́ зракхибэ́н, мэ ужакирава лачхипэ́н Тырэ́ лавэ́стыр.

82Мирэ́ якха́ хасёна со дывэ́с би – Тырэ́ лавэскиро, сы́рбы камэ́на тэ пхэнэ́н: “Ке́ли Ту подрикирэса ман?”

83Пал-дова́ со мэ сом сы́рбы цыпитко гоно́ пэ пхув, нэ мэ на бистырдём Тырэ́ стату́ты.

84Кицы́ дывэса́ Ту дэ́са Тырэ́ писхари́скэ? Ке́ли Ту сэндякирэса одолэ́н, савэ́ традэ́на ман?

85Пхутькирдэ́ мануша́, савэ́ на рикирэнапэ кэ Тыро́ Зако́но, выґанадэ ґанбиня́ (ямы) ма́нгэ.

86Сарэ́ Тырэ́ припхэныбэна́ исын патяибнытка, мануша́ традэ́на ман на пир чачипэ́н: дэ васт ма́нгэ.

87Ёнэ на́бут со на хасякирдэ́ ман пэ пхув; нэ мэ на мэкцём Тырэ́ упхэныбэна́.

88Зоралякир ман пир Тыри́ лачхэ́-илы́ткима, и мэ ява́ва тэ рикиравпэ кэ упхэныбэна́ Тырэ́ мо́стыр.

89О Раё Дэ́вла! Пэ сарэ́ ве́ки Тыро́ лав ячэ́лапэ пэ болыбэ́н!

90Тыро́ патяибэ́н пириджала екхэ родо́стыр кэ яви́р: Ту зачхудян пхув и ёй усады (сак) ячэ́лапэ адя́кэ.

91Саро́ исын тэрдо́ пир Тыро́ статутно упхэныбэ́н кэ/жы́ко ададывэ́с, пал-дова́ со ёнэ сарэ́ дынаринэна Ту́кэ.

92Тэ на бахталёвавас мэ Тырэ́ Законо́стыр, тэ́ньчи мэ хасёвавас дро миро калыпэ́н.

93Мэ ние́кхвар на бистрава Тырэ́ упхэныбэна́, пал-дова́ со Ту подрикирдян ман лэ́нца.

94Мэ сом Тыро́, зра́кх ман; пал-дова́ со мэ родыём Тырэ́ упхэныбэна́.

95Фуй мануша́ ужакирдэ пэ ма́ндэ тэ хасякирэ́н ман, нэ мэ ява́ва тэ розлав Тырэ́ пририпирибэна.

96Мэ дыкхцём ко́нцо (яго́ро) сарэскэ, со исын бидошэ́нгиро, нэ Тыро́ припхэныбэ́н исын би меракиро.

97О, ма́нгэ пир ило́ Тыро́ Зако́но. Мэ розлава лэс дывэсэ́ и раты́.

98Ту кэрдя́н ман годэдыр мирэ́ вэргэ́ндыр пир Тырэ́ припхэныбэна́, пал-дова́ со ёнэ исын усады (сак) ма́нца.

99Мэ ґалёвава буты́р сыклякирибнаскирьендыр, пал-дова́ со мэ розлава Тырэ́ пририпирибэна.

100Мэ ґалёвава буты́р пхурэ́ манушэ́ндыр, пал-дова́ со мэ рискирдём годы́ кэ Тырэ́ упхэныбэна́.

101Мэ рикирдём дрэ риг мири́ ґэро́й кажнонэ́ чорэ́ дромэ́стыр, соб (кай) тэ приракхав Тырэ́ упхэныбэна́.

102Мэ на рисиём криг Тырэ́ сэндостыр, пал-дова́ со Ту сыклякирдян ман.

103Сыр гудло́ исын дро миро муй Тырэ́ лавэ́ндыр. Ёнэ исын гудлэдыр авгинэстыр мирэ́ москэ.

104Тырэ́ упхэныбнэндыр мэ лыём тэ ґалёвав, пал-дова́ со мэ бидыкхава кажно начачуно дром.

105Тыро́ лав исын момолы́тко (свети́льнико) мирэ́ ґэрьякэ, и дуд пэ миро дром.

106Мэ совлахадём и мэ допхэнава дава́, со мэ рикиравапэ зоралэ́с кэ Тыро́ чачуно́ сэ́ндо.

107Мэ сом древа́н притасадо, о Раё Дэ́вла, джидякир ман пир Тыро́ лав.

108Мэ манга́ва, о Раё Дэ́вла, тэ прилэс Мирэ́-москиро парикирибэн Ту́кэ сыр свэ́нто дыибэ́н; и сыкля́кир Ман Тырэ́ сэндоскэ.

109Миро джиибэ́н исын усады (сак) дро миро васт, нэ мэ на бистрава Тыро́ Зако́но.

110Чорэ́ мануша́ кэрдэ́ фэлы́ пэ ма́ндэ, нэ мэ на рисиём дрэ риг Тырэ́ упхэныбнэндыр.

111Мэ прилыём Тыро́ досыкаибэн сыр миштыпэ́н пэ сарэ́ ве́ки, пал-дова́ со ёнэ радынэна миро ило́.

112Мэ прилыём мирэ́ илэ́са тэ кэрэ́л усе́нде (везде) саро́ пир Тырэ́ стату́ты кэ са́мо ко́нцо (яго́ро).

113Мэ бидыкхав дуемуенгирэ манушэ́н, нэ ма́нгэ исын дро́го Тыро́ Зако́но.

114Пал Ту́тэ мэ гарадёвава, и мэ зракхавапэ сыр пал шчы́то, мэ ужакирава лачхипэ́н Тырэ́ лавэ́стыр.

115Дурьён криг ма́ндыр, тумэ́-чорэ́ мануша́лэ. Мэ ява́ва тэ рикиравпэ кэ Дэвлэ́скирэ припхэныбэна́.

116Подрикир ман Тырэ́ лавэ́са, соб (кай) ма́нгэ сашты́ тэ явэ́л тэ джива́в, соб (кай) мэ тэ на явав ладжакирдо́ долэ́стыр, со́стыр мэ ужакирава лачхипэ́н.

117Подрикир зоралэ́с ман и мэ зракхавапэ, и мэ ўса́ды (сак) ява́ва тэ рискирав годы́ кэ Тырэ́ стату́ты.

118Ту на прилэса одолэ́н, савэ́ гинэ́ дрэ риг Тырэ́ статутэндыр, пал-дова́ со лэ́нгиро хохаибэ́н нисо́ на дэ́ла.

119Ту гинэса пал ґнэё (гноё) сарэ́н чорэ́ манушэ́н пэ дая́ пхув, палдава́ ма́нгэ исын дро́га Тырэ́ пририпирибэна.

120Мири́ лоч (плоть) издрала дара́тыр анги́л Ту́тэ; ма́ндэ исын трашаибэ́н анги́л Тыро́ сэ́ндо.

121Мэ кэрдём пир Зако́но и чачипэ́н, на мэк ман пэ одолэ́ндэ, савэ́ традэнапэ пал ма́ндэ.

122Затэрдёв пал Тырэ́ дынаристэ ваш лэ́скиро лачхипэ́н, на мэк, соб (кай) пхутькирдэ́ тэ притасавэн ман.

123Мирэ́ якха́ мулёна со дывэ́с, ке́ли Ту зракхэ́са ман, и ёнэ махтынэна пал Тыро́ чачипна́скиро лав.

124Отлыджапэ Тырэ́ писхариса пир Тыри́ лачхэ́-илы́ткима и сыкля́кир ман Тырэ́ статутэнгэ.

125Мэ сом Тыро́ писха́ри, дэ годы́ ма́нгэ тэ джина́в Тырэ́ пририпирибэна.

126Дава́ исын Тыро́ часо, Раё Дэ́вла, тэ кэрэ́с вари-со, пал-дова́ со мануша́ пхагирдэ́ Тыро́ Зако́но.

127Палдава́ Тырэ́ припхэныбэна́ исын дрогэдыр сувнака́стыр, фэды́р чачунэ́ сувнака́стыр.

128Палдава́ мэ гиндём Тырэ́ упхэныбэна́ пир саро́, сыр най чачунэдыр: мэ бидыкхава какана́ начачуно дром.

129Тырэ́ досыкаибэна исын древа́н дро́га, палдава́ миро ди рикирэ́лапэ зоралэ́с кэ ёнэ.

130Дова́, со сыкавэ́на Тырэ́ лава́, дэ́ла дуд и сыклякирэ́ла манушэ́н, савэ́ ишчо (инкэ́) на́бут джинэ́на.

131Мэ отпхандём муй и дрэ смэга/труш (жажда) дава́ ґондя́, пал-дова́ со мэ тырдавапэ кэ Тырэ́ припхэныбэна́.

132Рисёв мо́са кэ мэ и яв лачхэ́-дескиро кэ мэ, сыр Ту бут мо́лы кэрэ́са одолэ́нгэ, савэ́нгэ исын дро́го Тыро́ лав.

133Мамуякир (выпрямин) мирэ́ пирэ́ (сто́пы) тэ джав пир Тыро́ лав и на домэк, соб (кай) чорэ́ мануша́ тэ хулаинэн пэ ма́ндэ.

134Выракх ман манушэ́ндыр, савэ́ притасавэ́на ман, и мэ ява́ва тэ рикиравпэ кэ Тырэ́ упхэныбэна́.

135Мэк тэ зяинэл Тырэ́-москиро дуд пэ Тырэ́ писхаристэ, и сыкля́кир ман Тырэ́ статутэнгэ.

136Ясва сыр панинга́ тхадэна мирэ́ якхэ́ндыр, пал-дова́ со мануша́ на рикирэнапэ кэ Тыро́ Зако́но.

137Ту сан чачипна́скиро, о Раё Дэ́вла, и Тырэ́ сэнды исын чачунэ́.

138Ту дыя́н Пэ́скирэ чачунэ́ досыкаибэна; ёнэ исын древа́н патяибнытка.

139Миро зэвлэныпэн хачкирдя́ сыр яг ман, пал-дова́ со мирэ́ вэ́рги бистырдэ Тыро́ лав.

140Тыро́ лав исын древа́н пропатякирдо, и Тыро́ писха́ри выкэдэ́ла лэс.

141Мэ сом тыкно́ и сом дрэ тыкны паты́в, нэ мэ на бистырдём Тырэ́ упхэныбэна́.

142Тыро́ чачипэ́н явэ́ла ўса́ды (сак) чачипна́скиро, и Тыро́ Зако́но исын чачуно́.

143Пхарипэ́н и би́да пирилынэ ман: нэ мэ бахталёвава Тырэ́ припхэныбнэндыр.

144Тырэ́ досыкаибэна исын чачипнаскирэ пэ сарэ́ ве́ки: дэ годы́ ма́нгэ, и мэ ява́ва тэ джива́в.

145Мэ кхара́ва зоралэ́с сарэ́ мирэ́ илэ́стыр, о Раё Дэ́вла, отпхэн ма́нгэ: мэ ява́ва тэ рикиравпэ зоралэ́с кэ Тырэ́ стату́ты.

146Мэ кхара́ва Тут: зра́кх ман и мэ ява́ва тэ рикиравпэ кэ Тырэ́ припхэныбэна́.

147Мэ ґаздавапэ пэ са́мо зло́ко тасярла́киро анги́л дывэ́с и мэ да́ва го́дла тэ помогинэн: мэ ужакирава лачхипэ́н Тырэ́ лавэ́стыр.

148Мирэ́ якха́ исын джангадэ анги́л рати́тко стрэ́га, соб (кай) ма́нгэ тэ розлав Тыро́ лав.

149Вышу́н мири́ зан пир Тыри́ лачхэ́-илы́ткима: о Раё Дэ́вла, джидякир ман пир Тыро́ сэ́ндо.

150Одолэ́, савэ́ чорьёнапэ холя́са пал ма́ндэ, явнэ́ пашылэды́р: ёнэ исын дур Тырэ́ Законо́стыр.

151Ту сан пашы́л, о Раё Дэ́вла, и сарэ́ Тырэ́ припхэныбэна́ исын чачунэ́.

152Ѓара мэ уджиндём Тырэ́ допхэныбнэндыр, со Ту учхудян лэн пэ сарэ́ ве́ки.

153Дыкх ракхунэс, сыр ма́нгэ исын пхаро́ и зра́кх ман, пал-дова́ со мэ на бистырдём Тыро́ Зако́но.

154Затэрдёв зоралэ́с пал миро чачипэ́н и выракх ман, джидякир ман пир Тыро́ лав.

155Чорэ́ мануша́ исын дур зракхибнастыр, пал-дова́ со ёнэ на дыкхэ́на цямкэс пэ Тырэ́ стату́ты.

156О Раё Дэ́вла, Тыри́ лачхэ́-илы́ткима исын зоралы́; джидякир ман пир Тыро́ чачипэ́н!

157Кодолэ́, савэ́ традэнапэ пал ма́ндэ и исын мирэ́ вэ́рги, лэн исын бут; нэ мэ на рисиём дрэ риг Тырэ́ допхэныбнэндыр.

158Мэ дыкхцём кодолэ́н, савэ́ дэнапэ палэ и миро ило́ калыя, пал-дова́ со ёнэ на рикирэнапэ кэ Тыро́ лав.

159Придыкхпэ, сыр исын дро́га ма́нгэ Тырэ́ допхэныбэна! Раё Дэ́вла, джидякир ман пир Тыри́ лачхэ́-илы́ткима.

160Тырэ́ лавэскиро кучипэ́н исын дро чачипэ́н, кажно Тыро́ чачипна́скиро сэ́ндо ячэ́лапэ пэ сарэ́ ве́ки.

161Тхага́рья (кня́зи) рэсэна вэрги́ткэс кэ мэ би причынакиро, нэ миро ило́ дарэ́ла Тырэ́ лавэ́стыр.

162Мэ бахталёвава Тырэ́ лавэ́стыр сы́рбы кодова́ ману́ш, кон латхя́ бари бажын.

163Мэ бидыкхава и дыкха́ва вучипна́стыр пэ кодолэндэ, савэ́ хохавэна, нэ ма́нгэ исын дро́го Тыро́ Зако́но.

164Мэ вышарава Тут эфта́ мо́лы пэ дывэ́с пал Тыро́ чачипна́скиро сэ́ндо.

165Пхэрдо́ рама́нё (миро) исын кодолэндэ, савэ́нгэ исын дро́го Тыро́ Зако́но и ёнэ на обштавэнапэ пир бар.

166О, Раё Дэ́вла! Мэ ужакирдём, соб (кай) Ту тэ зракхэс ман и пир Тырэ́ упхэныбэна́.

167Миро ди рикирэ́лапэ кэ Тырэ́ допхэныбэна, савэ́ исын древа́н дро́га ма́нгэ.

168Мэ рикиравапэ кэ Тырэ́ припхэныбэна́ и кэ Тырэ́ допхэныбэна, и сарэ́ мирэ́ дрома́ исын анги́л Тырэ́ якха́.

169Мэк тэ джал пашылэды́р кэ Ту миро роибэ́н, о Раё Дэ́вла: дэ годы́ ма́нгэ пир Тыро́ лав.

170Мэк тэ явэ́л мири́ па́тери (моли́тва) кэ Ту: зра́кх ман пир лав, со Ту дыя́н.

171Мэк тэ шарэ́н мирэ́ ушта́ Тут, ке́ли Ту сыклякирэса ман Тырэ́ статутэнгэ.

172Мэк тэ выпхэнэл зоралэ́с мири́ чиб пал Тыро́ лав, пал-дова́ со Тырэ́ припхэныбэна́ исын чачипнаскирэ.

173Мэк тэ помогинэл Тыро́ васт ма́нгэ, пал-дова́ со мэ выкэдыём Тырэ́ упхэныбэна́.

174Мэ тырдавапэ илэ́са, соб (кай) Ту тэ зракхэс ман, о Раё Дэ́вла и мэ бахталёвава Тырэ́ Законо́стыр.

175Мэк тэ дживэ́л миро ди и ёв явэ́ла тэ шарэл Тут; мэк тэ дэл васт ма́нгэ Тыро́ чачипэ́н.

176Мэ гиём дрэ риг сыр бакри, сави́ нашадыя: придыкхпэ пашылэды́р кэ Тыро́ писха́ри; пал-дова́ со мэ на бистрава Тырэ́ припхэныбэна́.